神舟路站（粵拼：san4 zau1 lou6 zaam6；英文：Shenzhoulu Station），規劃嗌過科學城西站（fo1 hok6 sing4 zaam6；Science City West Station），施工期間先後嗌過珠吉路站（zyu1 gat1 lou6 zaam6；英文：Zhujilu Station）同玉樹站（juk6 syu6 zaam6；英文：Yushu Station），係廣州地鐵21號綫嘅車站，2019年12月20號開通，喺黃埔區廣州科學城，科學大道同神舟路口嘅交界。

呢個站喺開通早期淨得慢車停，快車基本上都飛站。直到2021年7月14號先至變成快車停靠站。

呢個站一共有2層樓嘅地下區域，其中地下1樓係站廳，有票務設施，客務中心同商鋪；地下2樓係21號綫月台。雖然車站冇休息室，但廁所同母嬰室喺月台西邊。

神舟路站嘅站廳收費區喺車站北邊，南邊係過街通道。收費區有好多部扶手電梯同樓梯、專用𨋢往返月台都得。

呢個站有一個島式月台，喺科學大道嘅地底。

不過，由於21號綫實行咗快慢綫，兩綫嘅列車行嘅軌道都唔同。其中慢綫列車喺車站埋邊嗰兩條軌道停站，而快綫列車直接喺車站開邊嗰兩條軌道飛站唔停。喺埋邊同開邊兩條軌道之間都有棟牆隔開咗，不過兩邊嘅圍牆長度唔同。若果搭緊快綫，喺行緊增城廣場嗰邊，經過呢個站時凈睇到月台嘅10%部份；喺行緊員村嗰邊，經過呢個站時凈睇到月台嘅80%部份。不過21號綫嘅快車重未加密，所以快車喺大多數情況下經埋邊嗰兩條軌道直接飛站唔停，得好少班次喺開邊嗰兩條軌道飛站唔停。

另外，呢個站埋邊兩條路軌同西端都有條波口位連埋；喺1號月台行增城廣場嗰邊條向西延長幾百米而形成條存車線。所以喺21號綫出冬瓜豆腐時，列車到呢個站做臨時尾站，屆時去廣汕公路、鎮龍、增城一帶啲人要轉搭其它交通工具。

呢個站冇商舖，但得三臺自助服務。

神舟路站冚唪唥嘅出入口
A出入口  B出入口

呢個站有2個出入口，分别係A同B。

冧巴	標記	方位	去到邊度
出入口A	科學大道	西南	神舟路、科學大道西（地鐵神舟路站）巴士站（東行）
出入口B	科學大道	東南	神舟路、科學大道西（地鐵神舟路站）巴士站（西行）、神舟路南巴士站、彩頻路
註： 有盲人引導徑 | 有輪椅升降臺 | 有斜道 | 有專用𨋢 | 有扶手電梯

配線圖
█ 21號綫 ▲　科學城站
▼　天河智慧城站

呢個站最先喺2010年份地鐵規劃方案出現。嗰時地鐵方為咗解決科學城同智慧城當地啲交通唔方便，加上蘿崗同埋永和、廣州教育城一帶啲新城發展，及增城市區啲市民出行問題而重新攞返喺2008年規劃嘅4號綫北段方案嗰橛（黃村⇆廣州科學城）重向兩邊延長。規劃出嚟嘅路線亦經過呢個站。隨後規劃正式落實。 不過嗰時因為呢個站喺科學城西邊而嗌科學城西站。

2010年底，規劃緊嘅4號綫北段（黃村⇆水西）變成21號綫一部份，重話搞快綫。初期諗住將呢個站合併兼移到科珠路口近玉樹公園一帶，重將車站改名做珠吉路站^{[註 1]}同玉樹站。不過喺2012年8月14號環評又話一分為二而重新喺神舟路口搞站，最後定名做神舟路站^[1]。即使係2018年3月29號申報21號綫站名時都冇變到站名^[2]。不過快車始終都冇呢個站份。

2014年10月14號，車站正式逳手起。本嚟話施工諗住到2017年就起好而開通，不過因施工遇難題而一拖再拖。呢個站嘅主體結構雖然喺2016年7月8號封頂^[3]兼諗住喺2018年底開通21號綫嚟到呢個站做西邊總站^[4]，但係喺2018年1月26號喺長平站附近爆出三死一傷嘅坍塌事故^[5]而直接停工，令開通時間繼續拖。施工直到2019年7月15號先至三權移交^[6]。

2019年12月20號朝頭早，由於21號綫西邊部份正式開通，呢個站亦正式開放^[7]。

2021年7月30號中午，因廣州落大水，車站北邊起緊嘅出入口部份地面擋土牆冧咗，令地面積水通過通道入去車站導致水浸。結果令21號綫淨去到蘇元站為止，原先喺呢站入閘或出站嘅乘客出現滯留，不過好快全部疏散，未造成死傷。事發後，地鐵方馬上封咗缺口重安排接駁巴士往返黃村到蘇元範圍^[8]。雖然直到同日挨晚先至恢復雙向通車，但係呢個站嘅列車重係繼續飛站^[9]直到天黑晒恢復營運。

神舟路站喺廣州科學城西邊，附近有好多間寫字樓、軟件園同科技園等辦公區同廠房，所以除工作日上落班高峰期有好多人上落之外，其它時間都好少人上落^[10]。

• 廣州綠地中央廣場
• 合景科匯金谷
• 歐菲影像技術（廣州）有限公司
• 廣東軟件科學園
• 光寶廣州科技園區
• 視聯科技園
• 金鵬智慧產業園
• TCL文化產業園

維基同享有多媒體嘅嘢：
Shenzhoulu Station

註

攷

廣州地鐵21號綫
█員村 – 天河公園 – 棠東 - █黃村 – 大觀南路 – 天河智慧城 – 神舟路 – 科學城 - █蘇元 – █水西 – 長平 – 金坑 – 鎮龍西 - █鎮龍 – 中新 – 坑貝 – 鳳崗 – 朱村 – 山田 – 鍾岡 – 增城廣場 特別提醒：21號綫有分開快慢車營運：其中黑藍底白字嘅係快車停靠站。
睇 • 論 • 改 • 歷