Minotourus
Die Minotourus of Minotaurus (Grieks: Μῑνώταυρος; Minotauros) was in die Griekse mitologie ’n kreatuur met die kop van ’n bul en die lyf van ’n man,[1] of soos deur Ovidius beskryf, "half man; half bul".[2] Hy is aangehou in die Kretensiese Labirint, ’n soort doolhof [3] wat vir dié doel vir koning Minos van Kreta gebou is. Dit is uiteindelik deur Theseus, die seun van Aigeas, doodgemaak.
Geboorte en voorkoms
Nadat hy die troon van Kreta bestyg het, het Minos met sy broers gestry oor die reg om te regeer. Minos het vir Poseidon gevra om vir hom ’n sneeuwit bul te stuur as ’n teken van sy goedkeuring. Hy moes die bul aan Poseidon offer, maar het besluit om dit eerder te hou omdat dit so mooi was. Om hom te straf het Poseidon Pasiphaë, Minos se vrou, laat verlief raak op die bul van die see, die Kretensiese Bul. Sy het die argitek Daidalos gevra om vir haar ’n houtkoei te maak, waarin sy toe geklim het om met die bul te paar. Hul kind was ’n monster, die Minotourus. Hy het later wild en boosaardig geword en Minos het die labirint laat bou om hom binne te hou.
In die klassieke kuns word die Minotourus gewoonlik uitgebeeld met die lyf van ’n man en die kop en stert van ’n bul. Later is hy ook soms uitgebeeld met die lyf van ’n bul en die kop van ’n man. Dié voorstelling word soms steeds aangetref, soos in Steele Savage se illustrasies vir Edith Hamilton se Mythology (1942).
Theseus
Minos se seun is later deur die inwoners van Athene doodgemaak (of deur die Kretensiese Bul wat koning Aigeus van Athene hom gevra het om dood te maak). Minos het oorlog teen die Atheners gevoer om sy seun se dood te wreek en het gewen. Om ’n einde te bring aan die offerande van jong Atheners aan die Minotourus het Aigeus sy seun, Theseus, gestuur om die Minotourus dood te maak.
In Kreta het Ariadne, Minos se dogter, op Theseus verlief geraak en hom deur die labirint gelei, waar hy die Minotourus doodgemaak het.
Verwysings
- ↑ "Minotaur" by dictionary.reference.com
- ↑ semibovumque virem; semivirumque bovem, volgens Ovidius, Ars Amatoria 2.24
- ↑ Labirinte het nie doodloopgangetjies soos ’n doolhof nie, maar ’n enkele paadjie wat met draaie na die middel lei. Sien Kern, Through the Labyrinth, Prestel, 2000, hoofstuk 1, en Doob, The Idea of the Labyrinth, Cornell University Press, 1990, hoofstuk 2.
Eksterne skakels
- Hierdie artikel is merendeels vertaal vanaf die Engelse Wikipedia-artikel en:Minotaur
Text is available under the CC BY-SA 4.0 license; additional terms may apply.
Images, videos and audio are available under their respective licenses.
