粵語係分析語，句中嘅字詞次序決定成句嘅意思；主題通常都放喺一句開頭，所以粵語算做話題優先語言。

粵語詞素毋會用變位表示語法功能；要表達時間、性別或者單眾數，會加補充詞：用副詞嚟表達時態；用疑問詞變一句做條問題；用感嘆詞表達語氣。有時亦要靠上文下理推斷。

代名詞

好似第啲漢藏系語言咁，粵語嘅代名詞一身兼擔主格同賓格嘅文法功能。粵語用下面呢啲代名詞：

另外，粵語重由文言文道繼承徂相當一部份第二人稱敬稱，包括：

連繫詞

粵語嘅「係」更多係用來做聯繫詞。

• 例：「尋日係中秋節。」

粵語嘅形容詞可以直接做謂語，形容詞前面唔一定要加「係」。

• 例一：「間房好大。」
• 例二：^✲「間房係好大。」
• 例二：「間房係好大，不過家私就有啲陳舊嘞。」

• 「係」[hai6]同「喺」[hai2]係兩個唔同嘅字。「喺」同「響」[hoeng2]係用嚟表示時間同地點，相當於普通話嘅「在」。
  • 例如：「我爾今喺圖書館。」

否定句

粵語最常見嘅否定成份包括「唔」、「無」同「未」。

「唔」

維基辭典有佢嘅解釋：

唔

「唔」係最常見嘅否定語素，可以否定名詞、動詞、形容詞、副詞甚至介詞等。

例如：「我食得花生。」

• 加「唔」字就變：「我唔食得花生。」／「花生我唔食得。」

「無」、「冇」

維基辭典有佢嘅解釋：

無

「無」（俗寫「冇」^{[註 1]}）除徂係「有」嘅反義詞之外，重經常做動詞嘅否定語素，強調「動作喺過去無發生」。

• 「有」嘅相反係「冇」，唔係「唔有」。

喺其他一啲粵語方言（例如南寧白話）裡面，「冇」同「唔」係唔分嘅。

• 喺呢啲方言入邊，「有」嘅相反係「冇有」，「係」嘅相反係「冇係」。

「無」、「冇」用法有以下分別：（例中「無」指「無」讀平聲，「冇」指「無」、「冇」讀上聲）

• 「無」前綴名詞可以解「不附帶」，「冇」前綴名詞淨係解「缺乏」。例：「無條件投降」／「冇條件投降」。^[1]
• 「無」前綴名詞時，該名詞可後綴名詞或動詞；「冇」前綴名詞時，該名詞只可後綴動詞。例：「無條件投降」／「冇條件投降」。
• 「無」前綴名詞時，兩詞可成複合詞形容其後名詞；「冇」前綴名詞時，該名詞亦可後綴名詞，令後兩詞成爲複合詞。例：「無汽水」=缺乏氣體嘅水，「冇汽水」=缺乏氣體嘅水／缺乏汽水。^{[註 2]}

「未」

「未」係另一隻否定語素，通常祇可以否定動詞、形容詞同副詞，否定經歷、短時經過：

• 佢會去，但佢而家未去。

• 你仲未去？
• 我未食飯。
• 我未食過燒鵝。

否定經歷時，「未」「冇」好多時都幾近：

• 我未食過燒鵝。
• 我冇食過燒鵝。

但「未」會喺以下語境同「冇」有區別，側重「動作喺過去冇發生，但係本應發生／喺未來有可能發生」嘅含義，而「冇」就純粹表示「動作喺過去冇發生」：

• 我冇去到現場。
• 我未去到現場。

表示過去動作嘅否定，就用「冇」：

• 幾日冇見，……

有啲方言或者舊時粵語入邊，有用「未曾」或者合音字「吂_(mang6)」表示「未」。

「唔好」同「咪」

「唔好」同「咪」係專門用來否定動詞命令式嘅否定語素，用來阻止動作發生。

要用命令嘅口氣阻止人做某啲嘢，就要用「唔好＋動詞」或者「咪＋動詞」咁樣嘅形式。

例如：「唔好睇戲。」／「咪睇戲。」

• 「唔」字除咗可以將肯定句變成否定句之外，重可以將一個字轉成佢嘅反義詞。有時加咗「唔」字意思會有啲唔同。

• 意思變咗嗰啲可以有「咗」字跟喺後面，冇變嗰啲就唔可以。

啱　　我唔見咗我本書「I lost my book」
毋啱　我唔食咗嘢「I did not eat」　　　

問題

是非題

最常見嘅是非問題詞序係：（主語／定語＋）動詞＋唔＋動詞（＋賓語）（＋語氣助詞）

• 例1：「你識唔識講廣東話？」
• 例2：「有冇紅綠燈？」

如果個動詞有多過一個字，舊陣時嘅粵語係重複澌成個動詞嘅，但係今日嘅穗港粵語淨係重複動詞嘅頭一個字。

• 例1：「你鍾唔鍾意食年糕？」
• 例2：「你跑唔跑步？」

有其他方言保留徂重複澌成個動詞嘅作法。

• 例1：「你鍾意唔鍾意食年糕？」
• 例2：「你跑步唔跑步？」

「係唔係」穗港粵語通常都縮成「係咪」。

• 例：「佢係咪加拿大人？」

如果想用強調語氣，可以用另一種語序：（主語／定語＋）「係唔係」＋動詞（＋賓語）＋語氣助詞。

• 例1：「你係唔係跑步先？」
• 例2：「你係唔係鍾意食年糕先？」
• 例3：「你係唔係畀錢我㗎？」

有啲方言或者用家傾向將否定詞置尾。

• 例：「有紅綠燈冇？」

疑問詞

粵語嘅疑問詞有：

指示詞

粵語指示詞分方位指示、程度指示、方式指示；方位指示一般分遠近（「呢」「嗰」），有啲地方分埋遠中近；程度指示（「咁」）、方式指示（「噉」）唔分遠近。

量詞

粵語量詞有好多種，有表示唔同排列組合方式嘅「迾」、「摣」、「幫」等等，有表示唔同形狀嘅「嚿」、「𤗲」、「幡」、「塊」、「轆」、「橛」、「柵」、「粒」、「笪」等等，亦有表示時間嘅「字」、「骨」、「排」、「秋」（年齡）、空間嘅「笪」、「揇」之類。比較特殊嘅量詞係「個」、「啲」，分別係泛用嘅單數量詞同複數量詞（「啲」本意指不定複數_（讀di1）、或者少數_{（讀dit1）}）。有啲埞會用「隻」代替「個」作為單數泛量詞。

粵語當中嘅量詞可以喺受領屬名詞前，名詞、代詞後，表示領屬、指代：

• 我個仔
• 我啲仔
• 佢哋幫友

前面唔接名詞表特指：

• 個仔
• 啲仔

特別係廣府粵語當中，量＋名亦都會表示不定指，即都會默認有「一」：

• 畀杯水我

有啲量詞（譬如時間嘅「排」）唔可以帶數詞：

• 呢排／＊呢三排

擁有格

領屬可以用「嘅」表示：

• 阿爸嘅屋_{（領屬定語）}
• 間屋係阿爸嘅_{（領屬表語）}
• 阿爸嘅仔_{（領屬定語）}

領屬亦可以用量詞表示領屬定語，但唔作表語。量詞表領屬帶特指抑或強調意味。因為量詞本身有單數複數、有唔同排列抑或形狀，受領屬名詞嘅數、排列、形狀等等性質都會透過表示領屬嘅量詞體現出嚟：

• 阿爸間屋_{（領屬定語）}
• 間屋係阿爸嘅屋_{（領屬定語）}
• 阿爸啲屋_{（領屬定語，複數）}
• 阿爸迾屋_{（領屬定語，複數，成迾）}
• 阿爸個仔
• 阿爸啲仔
• 阿爸嚿仔
• 阿爸橛仔

體、時、助詞

體

完成體／完整體

「咗」用嚟講啲嘢係完咗。

• 啲冬甩凍咗快啲食啦。

進行體

「緊」用嚟講啲嘢係發生當中。

• 煮緊飯，咪搞我。

持續體

「住」用喺表達某啲持續動作嘅狀態，抑或動作結果嘅狀態，好多時唔可以單獨成句：

• 你戴住頂帽做乜嘢？
• 佢望住個天唔知惗緊乜。

「定」「實」作為持續體嗰陣強調穩定唔喐：

• 企定喺度。
• 揸實支槍。

經歷體

「過」作為經歷體，表示有過某啲經歷。

• 我未去過日本。

開始體

「起上嚟」「起身」表示動作、狀態變化嘅開始：

• 熱起上嚟
• 睇起上嚟
• 熱起身
• 睇起身

有時又可以用「起」作開始體：

• 講起就唔停。

有時「開」都可以作開始體：

• 講開又講……

繼續體

「落去」表示動作嘅繼續：

• 噉樣食落去點會唔肥。

始續體

「開」又可以表示動作開唨頭，並有持續落去嘅趨勢。

• 食開飯就唔好睇電視啦。

慣常體

「開」亦表示某啲動作、狀態不溜係噉：

• 飲開奶茶。

有人認為「開」嘅呢兩種體態，衹係一種詞綴喺具體情況下嘅語用分別。

始成體

同始續體對應，有啲學者^[2]認為「落」作詞尾係始成體，強調動作開始之後先至會觸發後尾動作、狀態；基本上始成體「落」唔單用，因為跟接續動作、狀態有拏褦：

• 啲嘢做落就知喇。

以下兩種體（「回復體」、「重行體」），有啲學者認為鑑於佢哋描述嘅係外部觀察到嘅動作過程、而唔係動作內部本身嘅開始、結束等等，所以唔應作為「體態」。

回復體

「返」表示中斷、暫停嘅動作又繼續。

• 睇返條片。

又或者動作結果令到對象回復某啲狀態抑或回復到某啲埞：

• 畀返啲錢我。

又或者回復到形容詞表達嘅狀態：

• 天好返喇。

有時，「返」又喺現實狀態（本有狀態）同預想狀態（應有狀態）唔啱嗰陣時，某啲動作（會）令到現實「回復」（實質上係重新符合）預想嘅情況：

• 高返少少就好喇。

喺「得返」、「剩返」入邊，「返」仲表達現實少過預想嘅情況：

• 得返一文。
• 剩返兩件。

有啲地方會用「回」表示回復體。

重行體

「過」喺作為重行體嗰陣表示（好多時結果唔啱心水）重做啲動作：

• 唔該你睇過條片啦。

其他一啲體態：

準備體

「定」可以作為準備體，表示預先做某事、為唨將來作準備：

• 買定先。

短時體

「吓」「陣」表示過程好短嘅動作：

• 睇吓就知。
• 唞陣先。

「吓」嘅時間仲要短。

嘗試體

「吓」仲表示嘗試：

• 畀我飲吓。

時

過去

似好多漢語一樣，冇單獨表示過去嘅助詞。但完整體助詞「咗」有時可以表達啲事發生喺過去：

• 做咗兩年警察。

將來

「會」係發生喺將來嘅意思。

• 個天會幫我。

• 我遲早會轉校。

補語助詞

結果補語

粵語結果補語有好多，一般攞動詞、形容詞充任：

「完」用嚟講啲嘢係做咗。

• 食完飯，打完機，上吓網先。

「扂」用嚟表示成功。

• 搞扂！

能性補語

「得」可以插入謂補結構（即類似「瞓著」）中間構成能性補語，又可以作為「最細能性補語」直接加喺謂語後尾：

• 瞓得著。
• 睇得。

呢種能性補語用嚟表示可能、使能、能力：

• 搞得扂嘅。（可能性）
• 唔忍得佢。（可能性否定1）
• 忍唔得佢。（可能性否定2，罕）
• 忍唔忍得？（可能性正反問）
• 呢啲嘢唔玩得。（使能性否定）
• 佢好食得。（能力）

有啲方言入邊，「得」插入抑後置作能性補語衹表示可能，使能就用前置成分表示，句法上區分兩種含義：

• 落得車。（可能性）
• 毋落得車。（可能性否定，指「落車」行為受阻、譬如人多；抑或個人能力限制、譬如腳跛）
• 得落車。（使能性，「允許落車」）
• 毋得落車。（使能性否定，指「落車」行為受規章禁止）

量化詞

加添量化詞

「埋」用嚟表示擴充動作嘅對象範圍：

• 睇埋爾啲。

全稱量化詞

「嗮」表示動作涵蓋對象最大範圍：

• 食嗮佢。

亦作完成、加強語氣嘅作用。

• 啲飯食晒啦。
• 攞晒啲衫褲出去曬太陽。
• 唔該晒。

註

參考

出面網頁

• 鄧思穎。2015。《粵語語法講義》。香港：商務印書館。
• 張洪年。2007。《香港粤語語法的研究》。香港：中文大學出版社。
• 香港粵語慣用語研究
• 共性與差異：粵方言名詞短語研究／Similarities and Differences: A Study of Nominals in Yue Dialects
• 普通話、粵語比較義系詞句的句法差異及相關問題／The Copular Construction with a Comparative Interpretation in Mandarin and Cantonese
• 粵語謂詞性語氣詞／Predicative utterance particles in Cantonese
• 晚清粵語中八個特有的句末語氣詞／Eight Special Cantonese Sentence-final Particles in Late Qing Dynasty
• 試論粵語中的“區別詞”／Non-Predicative Adjectives in Cantonese
• The Interclausal Functions of the Cantonese Progressive Marker Gan: Evidence from the Early and Contemporary Cantonese Corpus Data
• 粵語詞尾“定”的語法特點／Linguistic Properties of Suffix Ding6 in Cantonese