分析語（粵拼：fan1 sik1 jyu5）係一種按構詞方式嚟將語言分類嘅方法。如果話隻語言係分析語，意思係指佢主要靠語序同幫手字詞（包括助詞同介詞呀噉）嚟表達啲字詞之間嘅關係，而毋靠詞形變化。例如粵語同標準官話就無乜詞形變化，公認係非常分析嘅語言。

啲詞彙嘅英文嗌法：

• 分析語：analytic language
• 幫手字詞：helper words

用時態做例子。好似英文、法文同埋日文等嘅多種語言，都會用詞形變化嚟表達「件事係幾時發生嘅」呢一件資訊。相比之下，粵語就係齋靠「加多幾隻字詞」嚟表達同樣嘅資訊^[1][2]。想像例句

「我坐喺度食叉燒包。」

可以變成

「琴日下晝四點，我坐喺度食叉燒包。」（表達咗過去）

「聽日朝早九點，我會坐喺度食叉燒包。」（表達咗未來）

——多咗嘅字詞，幫手表達「件事係喺咩時間發生嘅」呢一件資訊^{[註 1]}。

喺 5 至 15 世紀期間，英文被指係演變到愈嚟愈傾向分析語。例如由古英文變到去中古英文嗰段期間，英文喪失咗大部份嘅文法格系統：古英文曾經有一個變格系統，同拉丁文、希臘文、同埋德文等好相似，簡單噉講即係一隻字詞要視乎佢喺句子入邊做乜嘢角色而變樣；到咗中古英文嘅時期，呢啲系統都逐漸失傳。而到咗廿一世紀初，英文淨係得屬格仍然存在，而屬格以外嘅文法格近乎唔見晒咁滯，係得例如男性第三人稱代詞做主語嗰陣係 he（主格）但係做賓語嗰陣要變做 him（賓格）呀噉。

• 孤立語
• 中文字