Vlag van El Salvador
![]() |
|
Gebruik | Staats- en Oorlogsvlag en Vlootvaandel ![]() ![]() |
---|---|
Verhouding | 189:335 |
Goedgekeur | Basiese vorm: 1912, Huidige wysigings: 27 September 1972 |
Ontwerp | Drie horisontale bane in blou, wit en blou met die landswapen in die middel van die wit baan. |
![]() |
|
Gebruik | Burgerlike- en Staatsvlag ![]() ![]() |
Verhouding | 3:5 |
Ontwerp | Drie horisontale bane in blou, wit en blou. |
![]() |
|
Gebruik | Burgerlike vaandel en Staatsvlag en vaandel, en Oorlogsvlag ![]() ![]() |
Verhouding | 3:5 |
Ontwerp | Drie horisontale bane in blou, wit en blou met die woorde Dios, Union, Libertad in die wit baan.. |
Die nasionale vlag van El Salvador is op 27 September 1972 amptelik in gebruik geneem. Die vlag vertoon drie ewe wye horisontale bane in (van bo na onder) blou, wit en blou. Die drie variasies van die vlag verskil daarin dat in een ’n suiwer wit baan vertoon word, in die tweede verskyn die landswapen in die middel van die wit baan en in die derde verskyn die woorde DIOS UNION LIBERTAD (Spaans vir God, Eenheid, Vryheid).
Simboliek
[wysig | wysig bron]’n Bespreking van die simboliek van die vlag kan ten beste in drie dele verduidelik word nl. die simboliek van die blou-wit-blou kleurkombinasie, die betekenisse van die elemente in die wapen en die simboliek van die nasionale leuse.
Volgens die huidige interpretasie dui die kleure aan:
Kobalt: Die groot hemel en twee massiewe oseane van Sentraal-Amerika.
Wit: Vrede en solidariteit met die wêreld.
Amber: Die hele vet uitdrukking in die vlag, die wapen van El Salvador; die vergelykende ewewydige driehoek, vyf inheemse spiese, sonstrale, blaai, die vet motto (DIOS UNION LIBERTAD) en die dapper etimologie (Republiek El Salvador in Sentraal-Amerika).
Bou-wit-blou
[wysig | wysig bron]Die kleurkombinasie van blou-wit-blou is afgelei van die vlag van die Federale Republiek van Sentraal-Amerika.[1] Die Federale Republiek van Sentraal-Amerika was ’n federasie van Sentraal-Amerikaanse state wat van 1823 tot 1841 bestaan het. Die land het ’n blou-wit-blou vlag gebruik met die land se nasionale wapen in die middel van die wit baan. Die blou-wit-blou is gebaseer op die vlag van Argentinië omdat Argentinië die eerste land was wat onafhanklikheid verkry het van Spaans-Amerika.[2] Naas dit het die kleurvolgorde die volgende voorgestel: die ligging van die "suiwer" (wit) Amerika tussen die Atlantiese en die Stille Oseane.
Dit is opmerklik dat die simboliek van die vlag van El Salvador steeds verwys na die ligging van die land tussen die twee oseane, terwyl die land slegs aan een oseaan ’n kuslyn het.
Nasionale wapen
[wysig | wysig bron]![](https://upload.wikimedia.org/wikipedia/commons/thumb/e/e6/Coat_of_arms_of_El_Salvador.svg/220px-Coat_of_arms_of_El_Salvador.svg.png)
Die wapen van El Salvador stem redelik ooreen met die wapen van die Federale Republiek van Sentraal-Amerika. Dit vertoon enersyds geografiese elemente wat moet simboliseer dat Sentraal-Amerika baie vulkane het en tussen twee oseane geleë is. Andersyds vertoon dit vryheids- en gelykheidsimbole soos die frigiese mus, die reënboog en die driehoek.
Dios, Union, Libertad
[wysig | wysig bron]In militêre vlae van die Federale Republiek van Sentraal-Amerika het dikwels die leuse "DIOS, UNION, LIBERTAD" ("God, Eenheid, Vryheid") gestaan. Hierdie liberale leuse verwys na die katolieke geloof en die wens van die Criollo-ondernemers en koopliede wat vir beter omstandighede in terme van vryheid, vryhandel en die handhawing van die maatskaplike stabiliteit.[3] El Salvador het die leuse later oorgeneem as nasionale leuse.
Ontwerp
[wysig | wysig bron]![](https://upload.wikimedia.org/wikipedia/commons/thumb/9/99/%22_The_Maya_People_%22.jpg/220px-%22_The_Maya_People_%22.jpg)
![](https://upload.wikimedia.org/wikipedia/commons/thumb/3/33/MayanCalendar.png/220px-MayanCalendar.png)
![](https://upload.wikimedia.org/wikipedia/commons/thumb/5/53/Salcoatit%C3%A1n%2C_El_Salvador_-_panoramio_%289%29.jpg/220px-Salcoatit%C3%A1n%2C_El_Salvador_-_panoramio_%289%29.jpg)
Die Bandera magna het deurgaans ’n ongewone hoogte-breedteverhouding van 189:335. Volgens die Salvadoraanse wet moet hierdie vlag 3,35 meter breed en 1,89 meter lank wees, maar daar mag van die afmetings afgewyk word indien die omstandighede dit vereis. Presies in die middel van die Bandera magna is die nasionale wapen.[4]
Die ander twee variante het ’n hoogte-breedteverhouding van 3:5. Die drie bane is ewe wyd en elkeen neem dus een derde van die vlag in beslag.[4]
Geskiedenis
[wysig | wysig bron]Die eerste Salvadoraanse vlag
[wysig | wysig bron]Die elites van San Salvador en San Vicente het hulle in 1822 onafhanklik van Meksiko verklaar. Hulle wou Sentraal-Amerika in een onafhanklike staat verenig. Hulle het in Februarie 1822 ’n blou-wit-blou aangeneem wat geskoei is op die Argentynse vlag. Hoewel El Salvador nog nie bestaan het nie kon die opstandelinge beskou word as die voorlopers van El Salvador en die vlag wat hulle aangeneem het as die eerste ‘Salvadoraanse’ vlag. Die opstandelinge het in hul opstand geslaag en in 1823 is die Federale Republiek van Sentraal-Amerika gestig. Op 5 Maart 1824 is El Salvador amptelik gestig as ’n deelstaat van die federasie. Die Salvadoraanse wapen is in die middel van die vlag geplaas en hierdie vlag sou — ook na onafhanklikheid in Januarie 1841 — tot 1865 in gebruik bly, waarby opgemerk moet word dat die afgebeelde wapen wel by tye aangepas is.
Vlae van die Federale Republiek van Sentraal-Amerika
[wysig | wysig bron]- Die hoofartikel vir hierdie afdeling is: Federale Republiek van Sentraal-Amerika.
Die huidige vlag van El Salvador is in feite afgelei van die vlag van die Federale Republiek van Sentraal-Amerika wat op sy beurt weer beïnvloed is deur die Salvadoraanse opstandelinge wat Sentraal-Amerika wou verenig. Hierdie vlag het bestaan uit drie horisontale bane in blou-wit-blou, met die nasionale wapen in die middel. In die periode van die bestaan van die federasie (1823–1841, vanaf 1825 bekend as die Federale Republiek van Sentraal-Amerika) was die Salvadoraanse vlag die deelstaatvlag en die federale vlag die nasionale vlag.
Die ander lande wat uit die federasie ontstaan het (Costa Rica, Guatemala, Honduras en Nicaragua) het elk ook hul vlae op die vlag van die Federale Republiek van Sentraal-Amerika gebaseer. Die vlae van hierdie lande bestaan ook uit die blou-wit-blou. Slegs Costa Rica het rooi tot die vlag toegevoeg en die vlag van Guatemala is vertikale bane.
Die Salvadoraanse Stars and Stripes
[wysig | wysig bron]Tussen 1865 en 1912 het die land ’n reeks ander vlae, wat baie lyk soos die vlag van die Verenigde State, gebruik, daarom is daar soms verwys na die Salvadoraanse Stars and Stripes. Die vlag het nege horisontale bane in blou en wit gehad met ’n rooi skildhoek en ’n aantal vyfpuntige wit sterre. Die rooi blok in die skildhoek wat altyd vierkantig en die aantal sterre het ooreengestem met die aantal departemente waarin die land onderverdeel was. Omdat ’n aantal departemente deur splitsing uitgebrei het, het die aantal sterre ook verander.
Die eerste Stars and Stripes is in April 1865 aanvaar. Dit het nege sterre bevat in drie rye van drie elk as verwysing na die departemente Chalatenango, Cuscatlán, La Libertad, La Paz, San Miguel, San Salvador, Santa Ana, San Vicente en Sonsonate.[5]
In Junie 1865 is die aantal departemente, en dus die aantal sterre op die vlag, uitgebrei na elf (La Unión en Usulután is gestig) waarna daar in 1869 nog een bygekom het (Ahuachapán). Die vlag van 1869 het dus twaalf sterre in drie rye van vier getoon. In 1873 het daar nog ’n departement bygekom (Cabañas) en een ster is by die middelste ry gevoeg.
In 1875 sou die aantal sterre uitgebrei word na veertien omdat die veertiende departement gestig is (Morazán, tot 1877 bekend as Gotera). Dit was die laaste toevoeging van ’n departement. Die sterre is in drie rye geplaas, twee van vyf met een van vier in die middel. Daar was ook ’n variant in omloop met vier rye van 4-3-4-3 sterre.[5]
Hierdie laaste vlag sou tot in 1912 in gebruik bly totdat dit vervang is deur die huidige vlag. Tussendeur war die vlag egter een maand buite gebruik. In 1896 het El Salvador saam met Honduras en Nicaragua die Federale Republiek van Sentraal-Amerika gevorm. Hierdie republiek het op 2 November 1898 ’n eie vlag in gebruik geneem wat ook as die vlag van El Salvador gedien het. In dieselfde maand is die republiek egter ontbind en op 1 Desember is die Salvadoraanse vlag van 1875 weer in gebruik geneem.
Ander vlae
[wysig | wysig bron]Verwysings
[wysig | wysig bron]- ↑ (en) Flags of the World (2006): El Salvador, URL besoek op 22 Mei 2019.
- ↑ (en) Flags of the World (2006): Nicaragua, URL besoek op 22 Mei 2019.
- ↑ (nl) Hans Vogel (2002): Geschiedenis van Latijns-Amerika, Het Spectrum, Utrecht, blz. 162-163.
- ↑ 4,0 4,1 (es) Asamblea Legislativa de la República de El Salvador (14 september 1972): D. O. No 171, Tomo No 236.
- ↑ 5,0 5,1 (en) Flags of the World (2005): El Salvador – Historical Flags (1865–1912), URL besoek op 8 Julie 2007.
Eksterne skakels
[wysig | wysig bron]![]() |
Wikimedia Commons bevat media in verband met Vlae van El Salvador. |
- (en) El Salvador by Flags of the World.
- (en) "Flag of El Salvador". Encyclopædia Britannica. Besoek op 22 Mei 2019.
Soewereine state | Antigua en Barbuda · Bahamas · Barbados · Belize · Costa Rica · Dominica · Dominikaanse Republiek · El Salvador · Grenada · Guatemala · Haïti · Honduras · Jamaika · Kanada · Kuba · Meksiko · Nicaragua · Panama1 · St. Kitts en Nevis · St. Lucia · St. Vincent en die Grenadine · Trinidad en Tobago1 · Verenigde State | ![]() |
---|---|---|
Afhanklike- en ander gebiede | Groenland (Denemarke) · Guadeloupe / Martinique / Saint-Martin / Sint Bartholomeus / Sint Pierre en Miquelon (Frankryk) · Aruba1 / Bonaire1 / Curaçao1 / Saba / Sint Eustatius / Sint Maarten (Nederland) · Anguilla / Bermuda / Britse Maagde-eilande / Kaaimanseilande / Montserrat / Turks- en Caicoseilande (Verenigde Koninkryk) Amerikaanse Maagde-eilande / Puerto Rico (Verenigde State) | |
1 Gebiede wat ook deel kan uitmaak van Suid-Amerika |
Hierdie artikel is in sy geheel of gedeeltelik vanuit die Nederlandse Wikipedia vertaal. |
Text is available under the CC BY-SA 4.0 license; additional terms may apply.
Images, videos and audio are available under their respective licenses.