廣州地鐵3號綫
概覽
營運地區	中國廣東廣州
服務類	城市軌道交通
線路類	市區幹綫
線路長	73km
- 營運長	64.41km
車站總數	28
軌道標準	1435mm
列車偏組	6格編組B型列車
營運資訊
營運時期	2005.12.26～而家
營運單位	廣州地鐵集團有限公司
乘客量	2,200,000（2016.5.1統計）[1]

 廣州地鐵3號綫（粵拼：gwong2 zau1 dei6 tit3 saam1 hou6 sin3） ，第個名係南北快綫（naam4 bak1 faai3 sin3）／機場綫（gei1 coeng4 sin3）／市橋綫（si5 kiu4 sin3），係廣州第3條通車嘅地鐵綫路，全長64.41km，有一條主綫同一條支綫。首通段喺2005年12月26號通車。綫路代表色係■橙色。

佢既係依家廣州地鐵入面最長嘅地鐵綫路，又係世界上最長嘅地鐵線路。

喺1997年嘅規劃入面，方案B入邊嘅5號綫（唔係依家嘅5號綫）環綫嘅東邊，體育西路到客村嗰段，就係依家3號綫嘅中間嗰段。

到咗2000年嘅規劃入面，由於番禺撤市設區，加上天河區西部快速發展，呢條綫就被拆開同延長咗，北面延長到廣州東站，南面就按返原嚟咁行，不過就沿著新光快速延長到去番禺廣場嗰邊。佢重喺體育西路分咗條支綫，行天河路到崗頂，跟住轉向北面行，去到天河客運站。同時期重出現咗連接新白雲機場嘅機場快綫。之後廣州東站到番禺廣場段同支綫陸續開工。

2003年嘅初步方案入面，之前喺2號綫入面嘅機場快綫畀咗去3號綫入面，重改行咗去白雲山嘅東邊。而南面都延長埋，就係喺番禺廣場一直向東，行到廣州新城之後轉向南，沿住京珠高速同市南大道行落去，去到南沙嗰邊；嗰陣嘅4號綫去到廣州新城之後再向東轉彎，跟住行到海鷗島嗰邊。但無耐又改咗份方案，將3號綫同4號綫嘅轉車車站位——廣州新城（而家係海傍站）以南同以東嘅綫路調轉，綫路亦變成向東行到海鷗島。北面嗰條機場快綫都修改咗下。

2007年5月，由於原先計劃喺嘉禾望崗以北嘅高架綫路受拆遷同高壓綫問題影響，加上有人利用媒體搞破壞，地鐵公司為咗保證工期而將原先計劃嗰17.03km高架段冚唪唥改嗮喺地下^[2]，但噉重未夠，佢為咗慳錢重將原先嘅快慢車設計都取消埋。

2016年6月，廣州市規劃局答覆話3號綫東延段暫時凈起到海傍，唔入亞運城同海鷗島^[3]。估計同海鷗島有生態保護^[4]及廣中珠澳城軌方案唔穩定嘅原因。

2017年初，廣州將3號綫東延段同其他9條綫路打包成為第三期建設規劃，上報俾國家發改委。到咗3月20號，廣州地鐵第三期建設規劃獲得國家發改委批復，3號綫東延段喺埋入邊。^[5]3月23號，3號綫東延段進行咗第一次環評公示^[6]。

• 2001年12月26號，大塘站作為試驗段率先動工。
• 2003年5月18號，主綫同埋支綫嘅分軌站體育西路站動工。
• 2004年8月3號，珠江新城到客村區間嘅右綫盾構順利通過咗640米闊嘅珠江。
• 2004年11月26號，3號綫第一個轉車車站——客村站完工。
• 2005年2月28號，體育西路站完工。
• 2005年12月26號，3號綫首通段開通試運營。
• 2006年11月20號，3號綫全線停止服務40日嚟搞全綫（天河客運站往返番禺廣場）聯調。
• 2006年12月30號，3號綫恢復服務，一期全綫通車。行車交路更改為：天河客運站—番禺廣場同埋廣州東站—體育西路。兩者需要喺體育西路站轉車。
• 2009年1月15號，同永嘉區間左綫隧道貫通，呢個係3號綫北延段第一條貫通嘅隧道^[7]。
• 2009年11月20號，燕塘站封頂^[8]。
• 2010年4月20號，燕（塘）梅（花園）盾構區間雙綫貫通，意味著三號綫北延段全綫隧道貫通^[9]。
• 2010年10月10號，工程師鍾吉章話嘉禾望崗到龍歸站嗰橛嘅聯絡通道入面，混凝土嘅抗壓強度有嚴重嘅安全隱患。後來地鐵公司話呢個重喺安全嘅範圍入面，重話呢件事唔會影響3號綫北延段嘅通車。

• 2005年12月26號，3號綫首通段（廣州東站往返客村）喺14:00開通。
• 2006年11月20號，3號綫全綫停止服務40日，進行3號綫嘅全綫（天河客運站往返番禺廣場）通車之前嘅調試。
• 2006年12月30號，3號綫恢復返服務，一期全線通車。行車嘅綫路改咗行天河客運站往返番禺廣場同廣州東站往返體育西路。
• 2010年10月30號，3號綫北延段（機場南往返體育西路）喺14:00開通。
• 2017年12月28號，高增站喺12:00正式對外營運。
• 2018年4月26號，機場北站（2號航站樓）正式對外營運。

• 2014年開始，3號綫喺工作日早高峰開行同和到大石嘅單向貫通車，增加擠逼路段嘅運力。目前貫通車班數已經達到每次八列，交路重合段最細行車間隔已經壓縮到1分58秒。
• 2015年8月初，有消息話3號綫會喺近期改營運，正式加發機場南往返番禺廣場嘅雙向貫通車，而支綫班次將會減少，但實際未實行呢項計劃^[10]。
• 2017年11月13號，廣州地鐵亦發佈消息話3號綫同10號綫將會貫通營運。

• 2009年5月15號，3號綫北延段9標區間發生土層有毒氣體洩漏，導致三名工作人員當場死亡。事後，工地停工進行全面排查^[11]。
• 2016年3月18號，由於前一日收車後，一部工程車唔小心將機油滲透到燕塘到廣州東站區間到軌道，嗰時地鐵就快開出頭班車。地鐵收到料後啟動咗緊急措施，從06點55分（UTC+8）開始，列車喺呢個區間限速通行，機場南去體育西路嘅列車相比平時慢咗大概5分鐘，同時亦組織部分列車喺燕塘、廣州東站同林和西站，重喺同和站落客之後通過站後折返綫返轉頭，同時重喺好多個車站實施客流控制。經過處理，從09:30開始，路線列車逐步恢復正常營運^[12]。

• 廣州地鐵3號綫主綫由花都嘅廣州白雲國際機場開始，經過花都、白雲、天河、海珠同番禺，南北貫穿廣州嘅新城區，到達番禺嘅番禺廣場；而支綫由天河客運站開始，喺體育西路接入主綫，全綫都喺天河區入邊。
• 綫路全長64.41公里，計埋有28個站，設置兩個車輛段。
• 呢條地鐵投資係159.05億。
• 通車初期使用3節B型列車，後嚟喺2010年4月28號之後全綫升級到六節B型列車。

全綫設置咗28座車站，都係地下車站。

• • 主綫由南到北：

    番禺廣場、市橋、漢溪長隆、大石、廈滘、瀝滘、大塘、客村、廣州塔、珠江新城、體育西路、林和西、廣州東站、燕塘、梅花園、京溪南方醫院、同和、永泰、白雲大道北、嘉禾望崗、龍歸、人和、高增、機場南、機場北。

  • 支綫由北到南：

    天河客運站、五山、華師、崗頂、石牌橋、體育西路。

3號綫目前設有兩個車輛段，同2號綫共用嘉禾車輛段，位於嘉禾望崗站東北邊。三號綫用呢個車輛段嘅北半部。而專用嘅廈滘車輛段就位於廈滘站東邊。

• 嘉禾望崗：轉2號綫同埋14號綫。

  呢個站轉2號綫係平行跨站台轉車站，而轉14號綫係平行站廳轉乘車站，喺地鐵2、3號綫呢個站嗰陣，冇事先留低轉車條件，同時亦係2號綫嘅終點站。佢做成咗順向同台，亦嗻係2號綫同機場方向幾個站之間往返都可以直接過對面上車，而由2號綫往返體育西路方向幾個站就要上去轉換層話者站廳先得。

• 廣州東站：轉1號綫。

  喺地鐵1號綫起緊呢個站嗰陣，冇事先留低轉車條件，但係經過改造，轉換層有去到1號綫月台嘅通道。

• 林和西：轉APM。

  由於呢個站嘅付費區去唔到APM，所以必須要出咗閘之後先至可以轉。

• 廣州塔：轉APM。

  由於呢個站嘅付費區去唔到APM，所以必須要出咗閘之後先至可以轉。

• 體育西路：轉1號綫。

  呢個站係T形站廳轉車，利用咗喺起緊1號綫嗰陣留低俾黃埔輕軌嘅站廳轉車結構。佢重係天河客運站-番禺廣場同北延段機場北-體育西路兩個交路之間嘅轉車車站。

• 珠江新城：轉5號綫。

呢個站係十字島側轉車站，3號綫站台有分別連接5號綫兩個方向站台嘅樓梯，落去前先要睇啱方向。

• 客村：轉8號綫。

  呢個站係十字節點轉車站，兩條綫喺站台兩端都有樓梯通往轉換層，可以通過轉換層實現快速換乘。

  喺舊時嘅2號綫車站設計嗰陣，呢個站重唔係轉車站，但係動工之後又突然改到要同3號綫換乘，所以要緊急停工嚟改設計，做咗轉車嘅預留條件。即使係噉，喺起緊3號綫嗰陣，重係要托住舊時2號綫月台入面嘅樁基。

• 燕塘：轉6號綫。

  呢個站係十字節點轉車站。但係由於客流管制，3號綫轉6號綫就比較麻煩，要上去站廳先至得。

• 天河客運站：轉6號綫。

  呢個站係平行站廳轉車站。喺3號綫起緊呢個站嗰陣，冇事先留低轉車條件，如估要轉車嘅話必須要行出去站廳，行到6號綫站廳再落去先至到。

• 漢溪長隆：轉7號綫。

  呢個站係L形站廳轉乘站，喺地鐵3號綫起緊呢個站嗰陣，冇事先留低轉車條件，要通過新起嘅站廳通道轉車

• 高增：轉9號綫。

呢個站係平行站廳轉車站。由於9號綫設計嗰陣，3號綫車站已經有咗方案，為咗減少改動，9號綫淨係平行引入到3號綫車站隔籬，而唔係改成跨月台

• 瀝滘：轉廣佛綫。

已經預留咗廣佛綫嘅側式站台，係L形島側節點換乘。

• 番禺廣場：轉18號綫同22號綫。

  喺地鐵3號綫起緊呢個站嗰陣，冇事先留低轉車條件，要通過新起嘅站廳通道轉車。

• 華師：轉11號綫。

  喺地3號綫起緊呢個站嗰陣，冇事先留低轉車條件。11號綫嘅方案話，3號綫站廳將會同11號綫站廳打通，同時新建站台轉乘通道，實現L形節點換乘。

• 大塘：轉11號綫。

  喺3號綫起緊呢個站嗰陣，冇事先留低轉車條件。11號綫嘅方案話，3號綫站廳中部將會同11號綫站廳打通，實現T形站廳轉乘。

• 體育西路：轉10號綫同13號綫

  1、3號綫起緊嗰陣冇預留換乘條件，估計可能係新建長通道實現換乘。

• 廣州東站：轉11號綫同18號綫。

  1、3號綫起緊嗰陣冇預留換乘條件，11號綫將同3號線響北站廳實現站廳換乘，同時新建暗挖通道連接3號綫站台層同1號綫；18號綫亦會通過北站廳同新建嘅換乘大廳同3號綫實現站廳轉乘。

• 海傍：轉4號綫。

  4號綫起呢個站嗰陣預留咗換乘節點，不過依家4號綫車站東面俾樓盤擋住咗，3號綫嘅車站可能要揾其它地方重新起過。

• 廣州塔：轉12號綫同19號綫。

  喺3號綫起緊呢個站嗰陣，冇預留換乘條件，同時12同19號綫嘅嶺南廣場站距離較遠，預計可能係出閘虛擬換乘。

• 京溪南方醫院：轉23號綫。

  喺3號綫起緊呢個站嗰陣，冇預留換乘條件，預計係新建通道實現轉車。

以下內容出自《廣州地鐵三號綫工程設計研究與實踐》。

• 大石：本嚟呢個站話要換乘7號綫，喺站廳嘅北邊預留咗側式月台嘅部分結構，但係由於7號綫改行漢溪長隆站嗰邊，所以呢個結構暫時冇用到。不過規劃緊嘅佛山4號綫可能會經過呢個站，未知個結構會唔會用得返。
• 市橋：3號綫嘅車站部分冇用盡車站嘅橫向結構，喺車站西半部分預留咗嗰時嘅10號綫（紫坭－蓮花山）嘅車站空間。呢條10號綫就係依家17號綫嘅雛形，但依家改咗去番禺廣場換乘，冇用到呢個結構。

原先3號綫東延段由番禺廣場去到海鷗島，不過依家海鷗島劃咗入保護區，地鐵惟有縮短到海傍站。

而家綫路規劃納入咗廣州軌道交通2017-2023年規劃，立項亦已經獲得咗國家發改委批復，預計會喺2019年開工。

喺3號線設計嗰陣，支線係體育西路同主線並軌並同主線南段貫通運營，北段則獨立係體育西路中間路軌折返。南段同北段由正線相接。

但係噉嘅安排好快被證明係唔合理嘅：支線喺市區分岔，令北延段要獨立運營，而體育西中間路軌最初設計為機場快線嘅折返點，岔道離車站太遠，極限間隔有成4分半30秒咁多，好難應付北延段班次嘅加密，即使列車加到6節都不堪重負。於是後來到咗2013年，喺早高峰嘅時候，3號線加插咗幾部南北貫通嘅短線車救火，但噉樣又限制咗支線嘅班次。矛盾就產生咗。

喺2007年嘅市兩會上，陳韶章提出份報告話將支線拆解並獨立延伸，成為而家嘅10號綫^[13]。呢份規劃最初喺2010年嘅徵求意見之後確定咗，西邊總站最初喺東沙，但2015年嘅方案話延長到西塱^[14]。

由於2002年起3號綫嗰時冇留低任何拆解條件，拆解工程係一個有危險性同社會風險嘅挑戰：

• 首先係工程可能要將3號綫支線停運，而且石牌橋站西端係拆解位，但上邊係BRT車站，西邊仲要順次下穿1號線、18號線、APM線同埋3號線體育西路到林和西區間並喺夾縫中設站。
• 同時3號綫嘅支線拆畀10號綫之後唔可以用返而家嘅體育西路站，需要喺天河路地底新起個車站先至得，轉車不便，可能重慢過港鐵嘅中環站同香港站；開工之後，會令BRT系統同埋天河西邊嘅交通出現災難性影響（因為支線停運嗰陣，會增加其他地面公交線路嘅客流負擔，導致超負荷運轉；而且施工封路令天河路通行受阻）。由此睇來，3號線支線拆解可能係廣州地鐵史上最難完成嘅任務。

但由於3號線客流持續增長，同時支線班次同埋北延線貫通車相互牽制，運能提升遇到樽頸，拆離支線使主線南北貫通成為咗必要之舉。目前10號線已經被納入廣州地鐵下一輪建設計劃，正在進行前期方案嘅設計同埋編寫。

下面兩個表格僅供參考：

廣州地鐵3號綫
（轉主綫北段：←行機場北嗰邊） ＞ █體育西路 - █珠江新城 - █廣州塔 - █客村 - 大塘 - ▇瀝滘 - 廈滘 - 大石 - █漢溪長隆 - 市橋 - ██番禺廣場 　（支綫：←天河客運站嗰邊） 主綫北段：機場北（T2） - 機場南（T1） - █高增 - 人和 - 龍歸 - ██嘉禾望崗 - 白雲大道北 - 永泰 - 同和 - 京溪南方醫院 - 梅花園 - █燕塘 - █廣州東站 - █林和西（→喺體育西路轉） 支綫：█天河客運站 - 五山 - 華師 - 崗頂 - 石牌橋（→番禺廣場方向） 註：3號綫分為兩部份營運，其中： 主綫：機場北⇆番禺廣場 支綫：天河客運站⇆體育西路。 但實際營運交路同上邊嘅劃分唔同，分別係： 南瓜車：天河客運站⇆番禺廣場 飛機車：番禺廣場⇆機場北
未來發展 海鷗島 - 廣州新城東 - █海傍 - 金光大道 - 廣州新城西 - 番禺客運站 - ██番禺廣場 - 市橋 - █漢溪長隆 - 大石 - 廈滘 - ▇瀝滘 - █大塘 - █客村 - █廣州塔 - █珠江新城 - █體育西路 - █林和西 - ███廣州東站 - █燕塘 - 梅花園 - 京溪南方醫院 - 同和 - 永泰 - 白雲大道北 - ██嘉禾望崗 - 龍歸 - 人和 - █高增 - 機場南 - 機場北
睇 • 論 • 改 • 歷