廣州地鐵22號綫
| 廣州地鐵22號綫 | |
| |
| 概覽 | |
|---|---|
| 營運地區 | 中華人民共和國，廣州 |
| 服務類 | 城市軌道交通 |
| 線路類 | 市域快綫 |
| 線路長 | 30.8km |
| 車站總數 | 8 |
| 軌道標準 | 1435mm |
| 列車偏組 | 8節市域快綫列車 |
| 營運資訊 | |
| 營運單位 | 廣州地鐵集團有限公司 |
廣州地鐵22號綫，第個名叫南站快綫，係廣州起緊嘅一條地鐵快綫。預計將會喺2017年內動工，喺2022年前後通車。
綫路
[編輯]概況
[編輯]廣州地鐵22號綫由荔灣區白鵝潭去到番禺區番禺廣場，全長31km，設置8座車站、1座停車場。除咗陳頭崗站同市廣路站，其餘車站都係換乘站。呢條綫採用大站快車模式運營。
走向
[編輯]綫路由喺芳村隧道口嘅白鵝潭站引出，向南沿花地大道行到沖口村，下穿西塱車輛段庫房後到達西塱站，出站後向東南下穿花地大道南同廣鋼地塊，設置東沙工業園站後，沿東新高速擦過南浦島，設置西三站，之後喺鱷魚公園附近轉向西南，喺陳頭崗停車場旁邊設置陳頭崗站之後，喺石壁村北轉向東南，沿石浦大道行到廣州南站，再轉向東行上興業大道，一路去到鐘村再轉向東南，沿市廣路行進，喺金山大道口以南設置祈福站，去到市橋客運站度轉向東，沿東環路行落去，喺番禺廣場以北轉向南，同18號綫並軌，之後到達喺廣場東路下邊嘅番禺廣場站。
運營方式
[編輯]大站快車
[編輯]為咗縮短全程嘅旅行時間，綫路設置咗快慢車，快車淨係喺大站停靠，通過減少停站同加減速時間嚟縮短全程旅行時間。綫路喺祈福站設置咗越行綫，快車可以喺呢度超越慢車。
車站
[編輯]全綫車站由北向南初定為：芳村、西塱、東沙、南浦西、陳頭崗、廣州南站、市廣路、番禺廣場。
- 括弧嘅車站名係規劃嘅陣用
- 全部車站都係地下站。
- 站名以實際使用為準。
換乘站
[編輯]- 芳村站：換乘1號綫、11號綫同19號綫。
- 車站喺1號綫西面，同1號綫車站平行，預計係站廳換乘；如果要換乘11號綫同19號綫，可能要經過1號綫站廳。
- 西塱站：換乘1號綫、10號綫同廣佛綫。
- 車站喺1號綫西面嘅地底，同1號綫車站平行。預計同其它3條綫都係長通道換乘。
- 廣州南站：換乘2號綫、7號綫同佛山2號綫。
- 車站喺廣州南站東廣場、石浦大道嘅地下，預計同其它3條綫都係長通道換乘。
- 番禺廣場站：換乘3號綫、17號綫，與18號綫並綫。
- 車站喺廣場東路地底，同3號綫可能係站廳換乘，17號綫嘅情況暫時唔知。
用車
[編輯]綫路將會採用同18號綫一樣嘅六動兩拖8節編組市域快綫列車，最高時速可以去到160km/h。
車場
[編輯]- 陳頭崗停車場位於石壁村以北嘅綠地入邊，係22號綫嘅專用停車場。接軌站係陳頭崗站。
- 隴枕停車場位於番禺大道北以東、市南路以北、草龍沙河二街以西嘅地塊入邊，係18號綫同22號綫共用嘅停車場。接軌站係番禺廣場。
- 萬頃沙車輛段位於X298縣道以東、蕉門水道以西、南沙八涌以北嘅地塊入邊，係18號綫同22號綫共用嘅車輛段，承擔18同22號綫列車嘅架大修任務。接軌站係萬頃沙站。
附屬設施
[編輯]綫路設置陳頭崗主變一座，喺陳頭崗停車場入邊。
延伸計劃
[編輯]拆解
[編輯]綫路喺番禺廣場站以南預留咗遠期拆解獨立延伸條件。至於拆解之後嘅延伸計劃，目前都未有定論。南沙區有規劃等22號綫行返東涌蕉門一綫，而中山就有建議話由番禺廣場直接向南去到中山站，重可能繼續去珠海澳門。
向北延長
[編輯]棠溪火車站嘅規劃方案入邊提出等22號綫向北延長，經過棠溪火車站去到白雲機場，再次同18號綫交匯。不過呢個依家都重未入到官方規劃。
歷史
[編輯]規劃時期
[編輯]喺2003年嘅綫網規劃方案入邊，嗰時嘅7號綫由西塱出發，穿過廣鋼去到廣州新客站（依家嘅廣州南站），再去到大學城。不過後嚟7號綫冇咗西塱去到廣州南站呢段嘅規劃。
直到2008年，喺當年嘅兩個遠期綫網建設方案入邊，嗰時嘅20號綫接過咗呢段兼向兩邊延長，由滘口出發，順住芳村大道同東新高速向廣州南站行，再沿興業大道同市廣路去到市橋，最後行經規劃嘅廣州新城去到清流。呢條綫係遠期綫路，主要嘅功能係支持廣州新城嘅發展。後嚟隨著廣州新城規劃嘅取消，呢條綫亦迎嚟咗調整。
2010年，當年嘅2011~2015建設規劃入邊取消咗原嚟嘅20號綫，等白鵝潭快綫接過咗呢段，由廣州南站去到西塱，再去到石圍塘。白鵝潭快綫全長14km，建設定位係加強廣州南站同白鵝潭商務區嘅聯繫、支持白鵝潭商務區發展，計劃同城際軌道統籌考慮。[1]不過呢條綫卒之冇納入2015嘅建設方案。
後嚟白鵝潭快綫又短暫取消過，不過冇耐之後，2012年嘅綫網遠期規劃正式提出咗同依家相近嘅18號綫。嗰時18號綫由廣州南站開始向東行，經過祈福新邨後轉向南，再經過番禺廣場後入南沙區。中間經過東涌、蕉門同橫瀝，最後到廣州南沙自貿區明珠灣起步區南邊嘅萬頃沙。亦有計劃沿用舊時白鵝潭快綫嘅規劃，從廣州南站向北延長，去到荔灣區芳村石圍塘。綫路按快綫模式嚟設計，設置咗好少車站。
2014年，22號綫正式出現。嗰時嘅22號綫由客村站出發，向東南斜穿出海珠區後沿南沙港快速行落去，終點喺萬頃沙。後嚟綫路又作出咗較大嘅調整，起點由客村換咗去廣州東站，而路徑就由行南沙港快速同京港澳高速調整為行經廣園路、馬場、琶洲西區、華南快速、番禺大道同欖核、大崗，同時18號綫南沙段亦改成行S111省道，同22號綫共綫運營。
喺2015年，原嚟嘅18號綫同原嚟嘅22號綫編號調轉咗，22號綫改成由白鵝潭去到萬頃沙，同依家嘅樣差唔多。嗰陣22號綫重有10個站，綫路行經大崗鎮區，功能定位係實現南沙自貿區快速連接廣州南站同市區。不過之後喺官方文件入邊，22號綫都按照白鵝潭到番禺廣場計，而共綫段就計入18號綫。
雖然當時18、22號綫兩者都屬遠期規劃路綫，但由於市政府要發展南沙自貿區，同時地鐵方亦考慮到3號綫過度擁擠嘅問題，所以決定要先起呢兩條地鐵路綫。[2][3]。
喺2016年，南沙段綫路拉直咗，改成沿番禺大道南下，唔再兜入欖核同大崗鎮區，同時亦取消咗欖核同大崗站。呢個改變遭遇咗好多質疑同批評。改咗之後，22號綫車站由10個減少到8個，同時增加咗快慢綫設置，以達到縮短旅行時間嘅目標。[4][5]年底，白鵝潭站亦由石圍塘調整咗去芳村隧道口。同年8月，有關部門提出，要22號綫廣州南站主體結構同前後部分區間以廣州南站軌道交通銜接工程嘅名義提前開工。[6]到咗第二年2月，項目開始進行前期準備。[7]
2017年初，廣州將22號綫同其他9條綫路打包成為第三期建設規劃，上報俾國家發改委。到咗3月20號，廣州地鐵第三期建設規劃獲得國家發改委批復，22號綫喺埋入邊。[8]
2017年3月23號，22號綫進行咗環評第一次公示。[9]到咗4月17號，綫路進行咗環評第二次公示。[10]入邊提到，綫路喺西塱到陳頭崗之間加咗東沙工業園同西三共兩個站，同時，綫路長度縮到咗31.0km。
建設歷程
[編輯]註
[編輯]- ↑ 〈廣州市軌道交通2011~2015建設方案同2020規劃方案公示〉。原著喺2020年3月16號歸檔。喺2017年4月15號搵到。
- ↑ 〈壕气！投三千来亿，广州未来15年新建15条地铁线〉。《广州日报》。2015-12-22。原著喺2015-12-23歸檔。
- ↑ 〈广州新一轮地铁规划将杀到 15条线路详解〉。《南方日报》。2015-12-22。原著喺2016-03-04歸檔。
- ↑ 〈地鐵18、22號綫站點出爐〉。原著喺2020年9月8號歸檔。喺2017年4月15號搵到。
- ↑ 〈市國規委主任：18號綫擬今年開建〉。原著喺2020年9月8號歸檔。喺2017年4月15號搵到。
- ↑ 〈廣州南站軌道交通銜接工程概況〉。原著喺2020年3月16號歸檔。喺2017年4月14號搵到。
- ↑ [1] 互聯網檔案館嘅歸檔，歸檔日期2020年3月16號，. 廣州市住房和城鄉建設委員會關於「廣州南站廣州市軌道交通銜接工程建設嘅通告」 公開徵求意見嘅通知
- ↑ 〈廣州市軌道交通第三期建設規劃獲批〉。原著喺2018年8月30號歸檔。喺2017年4月15號搵到。
- ↑ 〈廣州地鐵第三期規劃各新綫環評第一次公示〉。原著喺2020年3月16號歸檔。喺2017年4月14號搵到。
- ↑ 〈22號綫環評第二次公示〉。原著喺2020年3月16號歸檔。喺2017年4月17號搵到。
| 營運緊 | |
|---|---|
| 起緊 | |
| 規劃緊 | |
| 城際地鐵 | ■廣佛綫 |
| 捷運 | |
| 有軌電車 | |
Template:廣州地鐵22號綫
Text is available under the CC BY-SA 4.0 license; additional terms may apply.
Images, videos and audio are available under their respective licenses.
