'n Alkalimetaal is 'n chemiese element van die eerste groep in die periodieke tabel. Saam met die aardalkalimetale vorm dit die s-blok van die tabel.

Dit bevat die elemente litium (Li), natrium (Na), kalium (K), rubidium (Rb), sesium (Cs) en die radioaktiewe element frankium (Fr).

Partykeer word ook die eerste element van die tabel waterstof (H) tot hierdie groep gereken. Dit het nogtans taamlik afwykende eienskappe.

Die kenmerkende eienskap van hierdie elemente is dat hulle elektronkonfigurasie bestaan uit 'n edelgaskonfigurasie plus een valenselektron in 'n s-tipe orbitaal wat baie deur die edelgaskonfigurasie se volle skille afgeskerm word. Byvoorbeeld het kalium een 4s-elektron wat maklik deur ionisasie verwyder word. Dié elemente het die laagste elektronegatiwiteit van die tabel. Dit neem verder af na die onderkant van die kolom. Die gevolg is dat hulle baie reaktiewe metale en sterk reduksiemiddels is wat gewoonlik 'n 1+ katioon vorm in verbindings wat deur ioonbinding gekenmerk word. Hierdie gevormde stowwe is gewoonlik goed in water oplosbaar.

Die metale self is so reaktief dat hulle van die lug afgesluit moet word, anders sal hulle met die vog daarin reageer, met die suurstof en partykeer selfs met die stikstof van die atmosfeer. Hulle word daarom onder olie of in afgeslote glasbuisies gestoor.

• Wikiwoordeboek het 'n inskrywing vir alkalimetaal.

Hierdie artikel is ’n saadjie. Voel vry om Wikipedia te help deur dit uit te brei.