選舉係香港政治制度中唔少得嘅一環，居民選舉權同被選舉權、需進行選舉嘅公職都受《基本法》訂明。香港所有內部嘅選舉都係冇強制性，用唔記名方式進行，由冇政治性嘅獨立法定機構選舉管理委員會安排同監管、同埋政府嘅選舉事務處執行，確保選舉以公開、誠實、公平嘅原則進行。選舉管理委員會共有三個成員，而家個主席係彭鍵基大法官。

香港嘅選舉政治起源自殖民地時代，發展簡述如下：

• 1883年，殖民地政府成立潔淨局，管理公共衛生，除咗官守議員、委任議員，當時嗰個局重包括兩名由選舉產生嘅議員。
• 1981年，香港政府發表《地方行政白皮書》，推行地區選舉，並取消對選民資格嘅種種限制，凡年滿21歲、居港滿七年嘅香港居民都可以登記做選民。
• 港英政府首先響1982年設立香港區議會、並設置選舉，成立地方政制
• 1984年7月發表《代議政制綠皮書》諮詢代議政制發展方面嘅意見後，發表白皮書宣佈1985年立法局首次引進兩項間選：由市政局、區域市政局同區議員組成嘅「選舉團」，以及代表社會各個行業及組織嘅「功能組別」，分別選出12個議席
• 1989年市政局加入地區直選議席
• 1991年立法局第一次加入直選議席

1997年主權移交後嘅政治爭議，多數涉及《香港基本法》架構下香港民主發展嘅步伐。當中《基本法》第45條同第68條分別寫明，香港行政長官同香港立法會議席都要根據「實際情況同循序漸進嘅原則」以普選做目標；而隨住時間推移，香港社會要求實行立法會同埋行政長官普選嘅呼聲日漸高漲。呢篇文將集中介紹香港各項選舉同已經落實嘅制度，相關發展爭論請睇香港政治制度改革。

香港唔同嘅選舉都有自己一套嘅選舉制度：

• 單議席單票制（區議會、村代表、立法會多數功能組別、特首）
• 比例代表制（立法會地方選區、超級區議會）
• 全票制（港區人大、選舉委員會、立法會勞工界）
• 按排序淘汰制（立法會鄉議局、漁農界、保險界、航運交通界）

而行政長官選舉其實都算單議席單票制，不過唔同嘅係，特首選舉係採用絕對多數制，即係得票過半先會當選。港區人大選舉實行嘅全票制就要揀齊36個名額，張票先至會有效。

呢篇香港選舉係關於香港政治或者香港政府嘅楔位文章，重未完成嘅。麻煩你幫手補充佢嘅內容。