明
京城	初為南京， 朱棣遷都北京
君主  -開國君主  -亡國君主	朱元璋 朱由榔
成立	1368年
滅亡	1662年

大明^[1]（粵拼：daai6 ming4，1368年—1662年），又叫大明國^{[註 1]}，亦叫明^[2]，係中國史上一個國。以斷代史來睇，叫明代或者明朝，係最尾一個由唐人建嘅正統朝代。開國皇帝朱元璋推翻元朝，破各地羣雄，喺公元1368年建立。初都南京，佢個仔朱棣將京城搬去北京。

大明初年國力強盛，後尾國力漸落，到後期百姓生活每況愈下，社會唔穩定，引致大規模嘅民變。公元1644年，李自成攻佔北京，崇禎帝自縊，立大順國。大明變到羣龍無首，朝臣來到南方，另推朱氏皇帝，後人叫呢段時間做南明，即係大明、大順同大清三國分立。最後大清滅大順，1662年再全滅大明。

大明國祚，由1368年，計到1662年，永曆帝朱由榔死爲止。斷代史計，明朝只去到1644年，思宗朱由檢自縊爲止。

元朝末期，朝政腐敗，國庫空虛。為咗彌補財政虧空，元朝除咗加稅之外，重狂印新鈔「至正寶鈔」，通貨膨脹極嚴重，搞到民不聊生。至正十一年（1351年），大元徵調百姓兵士十幾萬人嚟治黃河水患。黃河兩岸嘅百姓本來都飽受災荒之苦，治河時又成日畀監工鞭打，重剋扣口糧，搞到人神共憤。於是，「治河」同「變鈔」就成為大規模民變嘅導火線，部分重組埋紅巾軍反抗政府。

至正十一年（1351年）5月，發生騷亂。第二年，郭子興聚眾反抗，攻佔濠州（今安徽鳳陽）。無幾耐，安徽鳳陽農民朱元璋投奔郭子興，屢立戰功，郭子興器重兼信任佢。至正十四年（1354年）郭子興病死，朱元璋繼位領軍。至正十六年（1356年），朱元璋率兵佔領集慶（今江蘇南京），改名為應天府，然後攻下周圍一啲軍事要地，獲得一塊立足嘅基地。呢個時候嘅朱元璋「地狹糧少」、「孤軍獨守」，遠遠唔及其他民變軍隊嘅勢力，處境非常艱難。朱元璋採納咗謀士朱升「高築牆，廣積糧，緩稱王」策略，努力咗幾年，朱元璋軍事同經濟實力迅速壯大。朱元璋先後響至正二十三年（1363年），消滅陳友諒，至正二十七年（1367年）滅埋張士誠，同降伏割據浙江沿海嘅方國珍。1368年正月，朱元璋喺應天稱帝，建立大明，同年攻佔大都（今北京），元朝滅亡。

大明建立之後，朱元璋一方面減輕農民負擔，恢復返社會經濟生產；一方面懲治貪官污吏，就算係皇親國戚，開國功臣都唔手軟。又分封皇子鎮守各地，佢死咗之後，皇太孫朱允炆繼位，朱元璋第四仔燕王朱棣發動靖難之變，奪取皇位。朱棣起咗北京城，響1421年遷都北京。期間重派鄭和七下西洋；又編纂《永樂大典》。

朱棣之後，朱高熾、朱瞻基兩任皇帝都做得唔錯，史稱仁宣之治。

1435年，未滿9歲嘅朱祁鎮繼位，寵信宦官王振。導致1449年嘅土木堡之變，皇帝俾瓦剌俘虜。但係喺于謙率領之下，大明另立朱祁鈺為帝，發動全國軍民抗戰，打退入侵嘅瓦剌軍，大明一度復興。之後有朱祐樘做皇帝，年號弘治，係大明政治最清明嘅時期，呢位皇帝勤勉唔專制，信任大臣，內閣權力大為提升。

到咗朱厚熜做皇帝，年號嘉靖，佢信道教，唔理朝政，大臣嚴嵩把持朝綱，導致政治腐敗，出現財政危機，以至海瑞話「嘉靖嘉靖，家家皆盡」。

喺15、16世紀，中國沿海有倭寇之禍。唐人同倭人勾結做海盜，走私打家劫舍乜都做。因為咁，大明就加強海防，亦有派人攻打倭寇。

朱翊鈞做皇帝，年號萬曆。萬曆初年，佢得到內閣首輔張居正輔佐。內政方面，提出「尊主權，課吏職，行賞罰，一號令」，推行考成法，裁撤政府機構冗官冗員，整頓郵傳同埋銓政。經濟上，清丈全國土地，抑制豪強地主，改革賦役制度，推行一條鞭法，減輕農民負擔。軍事上，加強武備整頓，平定西南騷亂，重用抗倭名將戚繼光總理薊、昌、保三鎮練兵，令邊境安然。萬曆初年呈現出明代中葉以嚟最好形勢。

但張居正逝世後，中興之象消失，大明從此走上衰敗之路。神宗非常貪婪，佢大肆侵佔土地，搜刮民財；又廢除考成法，形成皇帝黷貨、臣下貪污、黨爭激烈嘅狀況。

明末三案、魏忠賢專權、李自成起義都導致大明嘅衰落。

朱翊鈞嘅腐敗招致國庫空虛，邊關危機。呢一個時期，位於東北嘅後金崛起，同大明對立。此時大明民不聊生，有覆亡之危。

大明後期，統治腐朽。宦官魏忠賢專政，迫害異己、殘害百姓。百姓都好難頂，加上連年災荒，水深火熱。1628年，戰爭喺陝北爆發，湧現咗高迎祥、李自成、張獻忠等幾十支民變軍隊。李自成提出「均田免糧」口號，深得百姓擁護。1644年（崇禎十七年），李自成攻佔西安，建立大順政權。同年三月，攻佔北京，皇帝朱由檢喺景山吊頸自殺身亡，大明國大亂。之後大清軍入山海關，打走大順，入北京。喺北方，因為李自成嘅政策失敗，唔少原明臣投清；同年喺南方，明臣另立福王朱由崧為皇帝，史稱南明。佢初頭都重想聯清打順，後尾國內唔團結內鬥，最後大清滅咗大明。

大明嘅疆域雖然唔及大元，但喺大明前期極盛，北控內蒙古，西到新疆東部，東北控制住女真地區，西南方管轄雲南、貴州，南方建立交趾布政使司。明朝喺少數民族地區實行羈縻衛所制度同土司、土官制度。

• 直隸：京師、南京
• 布政使司（省）：山東、山西、河南、陝西、四川、江西、湖廣、浙江、福建、廣東、廣西
• 都指揮使司：奴兒幹都指揮使司（統管黑龍江流域——西起阿嫩河、東至庫頁島，北達烏第河，南瀕日本海嘅廣大地區），1409年建立，共持續25年，之後廢咗。遼東都指揮使司，1371年建立，1642年間俾大清起兵攻佔廢咗。

• 中央官制：
  • 六部：吏部、戶部、禮部、兵部、刑部、工部
  • 五軍都督府：中軍都督府、前軍都督府、後軍都督府、左軍都督府、右軍都督府
  • 禦史台
• 地方官制
  • 承宣佈政司
  • 提刑按察司
  • 都指揮使司

大明設有特務機構監視大臣言行。洪武年間設錦衣衛，永樂設東廠，成化設西廠，正德設內行廠。

大明早期軍隊嘅來源，有諸將原有之兵，即所謂從徵，有元兵同群雄兵歸附嘅，有獲罪而謫發嘅，而最主要來源就係籍選，亦即垛集軍，由戶籍中抽丁而嚟。除此之外重有簡拔、投充同收集等方式。此外，大明中期以後又有強民為軍，不過都係少數，整體嚟講，衛所制仍然係最主要軍制。重有，明朝會謫發啲囚犯去做兵。

衛所制係喺全國各地軍事要地設立衛所註軍，衛有軍隊五千六百人，下面依序有千戶所、百戶所、總旗同埋小旗等單位，各衛所都隸屬於五軍都督府，亦隸屬於兵部，有事從徵調發，無事則還歸衛所。

軍隊來源為世襲軍戶，由每戶派一人為正丁到衛所當兵，軍人喺衛所中輪流戊守以及屯田，屯田所得以供給軍隊同埋將官等所需。佢嘅目標係養兵而不耗國家財力，但宣德年以後漸漸無法維持，軍人生活水準同社會地位日漸低下，逃兵漸多，軍備因而廢馳。

因此喺嘉靖年間，喺應付倭寇之亂嗰陣，將領戚繼光喺浙江地區採用招募民兵加以訓練嘅方式，嚟取代不堪嘅衛所兵。

大明初年，因為明初朝貢貿易厚往薄來，造成好多日本人冒充朝貢使者到大明呃錢。日本實際上係處於割據狀態，冇統一嘅中央政權，好多到中國冒充朝貢使者嘅日本人冇日本政府嘅管轄，朝貢完咗之後佢哋滯留喺中國沿海搶劫。呢啲就係明初嘅倭寇。為防止倭寇朱元璋就頒佈咗海禁政策。

朱隸即位後，喺永樂年間，派遣著名航海家三寶太監鄭和率遠洋船隊七下西洋，最遠去到非洲東海岸，又派遣吏部驗封司員外郎陳子魯出使撒馬兒罕、吐魯番、火州等西域十八國，加強明王朝同世界各國經濟政治往來，引導中國走向世界，體現永樂年間嘅鼎盛同埋開放。朱隸之後，佢個仔朱高熾繼位。佢聽從朝中一啲大臣意見，認為下西洋太浪費，收效唔大，宣佈停止下西洋活動。唔夠一年，朱高熾病，朱瞻繼位，改年號宣德。宣德五年（1431年）閏十二月初六日，派鄭和第七次亦係最後一次下西洋。到成化年間，曾經有太監向憲宗提議再下西洋，於是皇帝下詔到兵部索要鄭和出使海圖等資料。但由於劉大夏等官員認為下西洋係一大弊政，有害無益，故此將當年鄭和出海地圖等資料收埋（有指係將佢銷毀），兵部尚書項忠命吏入庫搜索但冇結果，於是再下西洋一事就此作罷。後來倭寇橫行，大明加強海禁，直到大明中後期，倭寇逐漸平息，先至廢除海禁。

西元16世紀，新航路開闢之後，葡萄牙人1511年佔領馬剌呷，亦渴望同中國往來。正德七年（1513年），葡萄牙國王派出一支對華使團前往中國，並喺廣州登陸，希望同明府建交。後來，皇帝同意葡萄牙人喺澳門開設洋行，起洋房，畀佢哋每年嚟廣州「越冬」。正德十六年（1521年）大明喺屯門之戰打贏葡萄牙人。呢個係西方第一次正式登陸中國並且同中國接觸。西方國家嘅東來，令到唔少新事物傳入中國。萬曆二十年（1592年），羅馬教宗派利瑪竇去中國教區做嘢。由於萬曆援朝之戰爆發，利瑪竇一行未能及時到達中國。後來中國打贏咗，利瑪竇先可以進入中國境內。因為利瑪竇好快學識中文，並着儒服、通儒書，故此幾得士大夫好感。後尾舉薦到北京，幾得皇帝朱翊鈞信任。佢向中國進獻坤輿萬國地圖、自鳴鐘、日晷、西洋炮、望遠鏡、火槍、西藥聖母像、聖十字等貢品。先後喺北京、肇慶等地展出。利瑪竇唔單止傳播天主教，重啟發徐光啟、李之藻等人學習西學，另外佢重將中國各種文化傳入歐洲，例如儒家思想、佛道學說、圍棋等，可謂「貫通中西第一人」。另外，喺明末有唔少大明軍隊曾經裝備火器，尤其係西洋大炮。崇禎十年（1637年）喺虎門之戰打赢英國。

明朝最強嘅時候有63個附屬國。

大明農業發展無論係產量定係生產工具，都比宋元時期高，為明朝中葉開始嘅人口穩步增長提供堅實基礎。

自大明初年起，以江南地區為代表嘅手工業高度發展，促進咗市場經濟化同城市化。然而大明推行「重農抑商」嘅原則以及嚴厲嘅海禁政策，令到商業受到一定嘅壓制。隨住銀紙「大明寶鈔」嘅流通失敗，整個貨幣體系轉向為以白銀為主。日本同拉丁美洲嘅白銀大量流入亦進一步促進大明嘅經濟發展。明嘉靖、萬曆時候，各地出賣絲綢、酒肉、蔬果、煙草、農作物、瓷器等商品不計其數，外國嘅唔少嘢，例如歐洲嘅西洋鐘，美洲嘅煙草，各城都有賣。當時商業大都會有北京、南京、揚州、蘇州、廣州、西安、成都等，出名嘅商業集團有徽商、川陝商、蘇商、京畿商、粵商等，喺世界上，大明係16世紀、17世紀時期手工業、經濟最繁華嘅國家之一。

大明嘅科學文化發展比較迅速，中國小說史上嘅四大名著中嘅《西遊記》、《水滸傳》、《三國演義》三本就係出於呢個時期。《金瓶梅》亦係呢個時期嘅作品。湯顯祖嘅戲劇《牡丹亭》至今仍然有演出。

傳統雅文學嘅發展喺明代繼續發展，著名文人有劉基、宋濂、高啟、方孝孺、唐寅、歸有光、徐渭、王世貞、袁宏道、錢謙益、張岱、吳偉業等人。散曲家就有王磐、馮維敏、薛論道、陳譯、康海等人。

大明民間文學好發達，唐伯虎係傑出嘅代表人物。民間盛行對聯，重有鎖南枝等山歌，一片欣欣向榮。

喺思想上，王陽明嘅新哲學「心學」喺嘉靖以後盛行，形成一股反對傳統束縛嘅思想浪潮，塑造咗新社會風尚，亦令明代後期士大夫有一種別於其他時代嘅生命哲學。如「異端」思想家李贄就係最好嘅例子。

大明初期至中期嘅科技有較大發展，直到16世紀，都一直係世界前列。

呢一個時期出現嘅科學著作有：李時珍嘅《本草綱目》、宋應星嘅《天工開物》、徐光啟嘅《農政全書》、方以智嘅《物理小識》。重有《徐霞客遊記》等著作係而家研究同埋借鑒古代技術嘅珍貴文獻資料。

于謙寫得《詠煤炭》詩歌說明當時煤炭已經普遍應用。計成嘅《園冶》就係園林建築嘅專著。

大明嘅軍事科技亦比較發達，明末已經有火銃槍，重有威力巨大嘅火炮。據講有個叫萬戶嘅人，坐喺綁滿火藥棍嘅櫈度，試圖利用火藥嘅推力上天，不過失敗咗，成為世界上第一個為探索太空而犧牲嘅人。

• 注：

1. ^ 此為南明弘光年間追崇，清朝乾隆年間，追諡為恭閔惠皇帝。
2. ^ 本來叫「太宗」，嘉靖時改為「成祖」。
3. ^ 清朝諡為懷宗，後改諡莊烈閔皇帝。南明政權諡為思宗紹天繹道剛明恪儉揆文奮武敦仁懋孝烈皇帝，後來又改諡為毅宗，唐王謚為威宗。
4. ^ 潞閔王、魯王（明義宗）政權都叫做「監國」而未有稱帝，故此冇年號。
5. ^ 依顧誠《南明史》所述，韓王（明平宗）朱本鉝嘅「定武」（1646年-1663年）年號同埋政權乃以訛傳訛之說。以查繼佐之《罪惟綠》啟其開端，直至近代先至考據為謬。

1. ↑ 對外自稱係中國，如《明萬曆皇帝冊封豐臣秀吉為日本國王聖旨》『咨爾豐臣平秀吉，崛起海邦，知尊中國』
2. ↑ 《明史，卷四十，志第十六》明朝疆域「計明初封略，東起朝鮮，西據吐番，南包安南，北距大磧，東西一萬一千七百五十里，南北一萬零九百四里。自成祖棄大寧，徙東勝，宣宗遷開平於獨石，世宗時復棄哈密、河套，則東起遼海，西至嘉峪，南至瓊、崖，北抵雲、朔，東西萬餘里，南北萬里。」

• 劉基
• 常遇春
• 解縉
• 張居正
• 魏忠賢
• 鄭和
• 海瑞
• 于謙
• 戚繼光
• 袁崇煥
• 鄭成功
• 袁宏道（「三袁」）
• 歸有光
• 朱載堉
• 文徵明
• 唐寅
• 黃宗羲
• 李贄
• 徐光啟
• 湯顯祖
• 史可法

• 中國史
• 中國皇帝
• 中國歷史年表
• 元明清歷史年表
• 明十三陵

• 顧誠，《南明史》，中國青年出版社，1997年5月版。

• 《明史》全文（大陸簡體）
• 中國大百科全書——明