Voronežan agj
Воронежская область

Voronežan agjan flag Voronežan agjan znam
Pälidn	Voronež
Pind - Ühtes - saum vezid (%).	51-nz' 52 216 km² 1,23
Eläjiden lugu - Kaik - Sageduz	23-nz' 2,333,768 ristitud (2018) 44,69 rist./km²
Regionaline KSP - Kaik, nügüdläižiš arvoiš - Ühtele hengele	22-nz' 841,4 mlrd rub. (2016) 360,4 tuh. rub.
Federaline ümbrik	Keskuzline
Venäman ekonomine region	Keskuzliž-Mustmaine
Valdkundkel' (-keled)	venäkel'
Gubernator	Aleksandr Gusev (velgusentäutai)
Ohjastusen ezimez'	hän-žo
Agjan Duman ezimez'	Vladimir Netösov
Avtokod	36, 136
Aigvöd	UTC+3 (MSK+0)

Voronežan agj (ven.: Воронежская область) om Venälaižen Federacijan subjekt.

Se mülüb Federaližhe keskuzümbrikho.

Agjan administrativine keskuz da kaikiš suremb lidn om Voronež.

Valdkundkel' om üks'jäine — venäkel'.

Voronežan agj om olmas vs 1934 kezakun 13. päiväspäi.

Voronežan agjan Päkäskuz^[1] om vahvištadud vn 2006 25. päiväl semendkud Agjan Duman ezitajil, tuli väghe sen-žo voden 7. päiväl kezakud da om väges nügüd' äiluguižidenke vajehtusidenke. Se vajehti endišt Päkäskust, kudamb oli vahvištadud vn 2001 2. päiväl heinkud.

Agj röunatab Saratovan agjanke päivnouzmas, Volgogradan agjanke suvipäivnouzmas, Rostovan agjanke da Ukrainanke (sen Luganskan agjanke) suves, Belgorodan agjanke päivlaskmas, Kurskan agjanke lodehes, Lipeckan da Tambovan agjoidenke pohjoižes. Voronežan agj om mererandatoi.

Pind om 52 216 km². Agj mülüb mecan da stepin zonha. Mustma otab territorijan nell' videndest, mec — 8,4%. Znamasine jogi om Don sen ližajogidenke (Voronež, Bitüg, Hopr da tž.).

Reljef om kukhikaz da vanoikaz. Kaikiš korktemb čokkoim sijadase agjan lodehes^[2] (259 m), kaikiš madalamb om Don-jogen kendäk suviröunal (57 m).

Klimat om ven kontinentaline. Heinkun keskmäine lämuz om +20..+21 C°, vilukun lämuz om −9..−10 C°. Paneb sadegid 500..550 mm vodes.

Londuseližed varad oma metallad (vas'k, nikel', platin), sauvondmaterialad (mouckivi, saved, letked, granit), pol'kalližarvoižed kived, mel, mineraližed mujud, fosforitad, mustma.

Agjan pämez' nimitase gubernatoraks. Kaik rahvaz valičeb händast videks vodeks, ei sa enamba kaht strokud jäl'geten. Gubernator om mugažo agjan Ohjastusen ezimez', hän märičeb sen strukturad da paneb Ohjastusen ühtnijoid radnikusile. Aleksandr Gusev tegeb gubernatoran velgusidme vs 2017 tal'vkun 25. päiväspäi. Koume varagubernatorad, kaks' Ohjastusen ezmäšt varaezimest da nell' muite Ohjastusen varaezimest oma hänele abhu.

Käskusenandai tobmuz om üks'kodine parlament — Agjan Dum. Kaik rahvaz valičeb sen 56 ezitajad videks vodeks. Vladimir Netösov radab Agjan Duman ezimeheks vs 2015 sügüz'kun 25. päiväspäi.

Radonoigendai tobmuz om Voronežan agjan Ohjastuz. Agjan departamentad, ohjandused da inspekcijad alištudas Ohjastusele.

Gubernatoran järgenduseližed valičendad oliba vn 2014 14. päiväl sügüz'kud, edeline gubernator sai vägestust ezmäižel tural (88,75%) da oli ranu kahtenden strokun. Agjan Duman ühtnijoiden järgenduseližed valičendad oliba vn 2015 13. päiväl sügüz'kud (6. kucund).

Vn 2010 Venäman rahvahanlugemižen mödhe eläjiden lugu oli 2 335 380 ristitud. Kaikutte kahtenz' ristit koumespäi om lidnalaine.

Kaik om vižtoštkümne lidnad agjas da 17 lidnanvuittušt žilod. Toižed järedad lidnad (enamba 50 tuh. ristituid vl 2015, surembaspäi penembha): Borisoglebsk, Rossoš, Liski. Vl 2017 kaik oli 19 eländpunktad enamba mi 10 tuh. eläjidenke.

Rahvahad (enamba 0,4% vl 2010): venälaižed — 91,0%, ukrainalaižed — 1,8%, armenijalaižed — 0,4%, toižed rahvahad — 2,1%, rahvahuden ozutandata — 4,7%.

1. ↑ Voronežan agjan Päkäskusen tekst. — Constitution.garant.ru. (ven.)
2. ↑ Voronežan agjan reljef. — Priroda36.ru. (ven.)

• Voronežan agjan gubernatoran da Ohjastusen oficialine portal (govvrn.ru). (ven.)
• Voronežan agjan Duman oficialine sait (vrnoblduma.ru). (ven.)

Venälaižen Federacijan subjektad
Tazovaldkundad	Adigejan • Altajan • Baškortostanan • Burätijan • Čečenijan • Čuvašijan • Dagestanan • Hakasijan • Ingušetijan • Kabardinijan da Balkarijan • Kalmikijan • Karačajan da Čerkesijan • Karjalan • Komin • Marii Elan • Mordovijan • Pohjoižosetijan — Alanijan • Saha (Jakutijan) • Tatarstanan • Tuvan • Udmurtijan
Randad	Altajan • Baikalantagaine • Habarovskan • Kamčatkan • Krasnodaran • Krasnojarskan • Merenrandaline • Permin • Stavropolin
Agjad	Alalidnan • Amuran • Arhangel'skan • Astrahanin • Belgorodan • Bränskan • Čeläbinskan • Irkutskan • Ivanovon • Jaroslavlin • Kaliningradan • Kalugan • Kemerovon • Kirovan • Kostroman • Kurganan • Kurskan • Leningradan • Lipeckan • Magadanan • Moskvan • Murmanskan • Novosibirskan • Omskan • Orelan • Orenburgan • Penzan • Pskovan • Rostovan • Räzanin • Sahalinan • Samaran • Saratovan • Smolenskan • Sverdlovskan • Tambovan • Tomskan • Tulan • Tverin • Tümenin • Ul'janovskan • Uz'lidnan • Vladimiran • Volgogradan • Vologdan • Voronežan
Federaližen alištusen lidnad	Moskv • Piter
Avtonomižed agjad	Evrejan
Avtonomižed ümbrikod	Čukotkan • Hantin da Mansin (Jugr)1 • Jamalan Nenciden1 • Nencan2
Toižed	Krim3 • Sevastopol'3
1 Tümenin agjan pala      2 Arhangel'skan agjan pala      3 Dejure — Ukrainan pala