Samaran agj
Самарская область

Samaran agjan flag Samaran agjan znam
Pälidn	Samar
Pind - Ühtes - saum vezid (%).	50-nz' 53 565 km² 4,22
Eläjiden lugu - Kaik - Sageduz	12-nz' 3,193,514 ristitud (2018) 59,62 rist./km²
Regionaline KSP - Kaik, nügüdläižiš arvoiš - Ühtele hengele	11-nz' 1275,1 mlrd rub. (2016) 397,9 tuh. rub.
Federaline ümbrik	Volgaveren
Venäman ekonomine region	Volganrandaline
Valdkundkel' (-keled)	venäkel'
Gubernator	Dmitrii Azarov (velgusentäutai)
Ohjastusen ezimez'	Aleksandr Nefödov
Gubernijan Duman ezimez'	Viktor Sazonov
Gimn	Samaran agjan gimn
Avtokod	63, 163
Aigvöd	UTC+4 (MSK+1)

Samaran agj (ven.: Самарская область) om Venälaižen Federacijan subjekt.

Se mülüb Volgaveren federaližhe ümbrikho.

Agjan administrativine keskuz da kaikiš suremb lidn om Samar.

Valdkundkel' om üks'jäine — venäkel'.

Samaran agj om olmas vs 1928 semendkun 14. päiväspäi. Vozil 1929−1935 nimitihe sidä Keskvolgan randaks, vozil 1935−1936 — Keskvolgan agjaks, vozil 1936−1992 — Kuibiševan agjaks.

Samaran agjan Päkäskuz^[1] om vahvištadud vn 2006 5. päiväl tal'vkud Gubernijan Duman ezitajil, om allekirjutadud gubernatoral sen-žo voden 18. päiväl tal'vkud da om väges möhembaižidenke vajehtusidenke. Se vajehti endišt Päkäskust, kudamb oli vahvištadud vn 1998 22. päiväl sügüz'kud Gubernijan Duman ühtnijoil da oli allekirjutadud sen-žo voden 13. päiväl redukud.

Agjal om röunoid Orenburgan agjanke suvipäivnouzmas, Kazahstananke (sen Päivlaskmaižen Kazahstanan agjanke) suves üks'jäižel čokkoimel, Saratovan da Ul'janovskan agjoidenke päivlaskmas, Tatarstanan Tazovaldkundanke pohjoižes. Samaran agj om mererandatoi.

Pind om 53 565 km², sidä kesken mec otab 7 601 km² (territorijan 13 %). Samaran agj levigandeb Volgan keskjoksmusen randpolil. Kaikiš surembad ratud vezištod oma Kuibiševan da Saratovan vezivaradimed.

Kaikiš korktemb čokkoim om Kaclii-kukkaz (381 m).

Londuseližed varad oma kivivoi, londuseline gaz, palab šoidkivi, sauvondmaterialad (letked, mouckivi, dolomit, saved), reskvezi, gidroenergii.

Agjan pämez' nimitase gubernatoraks. Dmitrii Azarov tegeb gubernatoran velgusidme vs 2017 sügüz'kun 25. päiväspäi. Hänen valdatusiden strok om viž vot. Gubernator märičeb Ohjastusen strukturad da paneb sen ühtnijoid radnikusile. Ezmäine varagubernator radab Ohjastusen ezimeheks, Aleksandr Nefödov om pandud Ohjastusen ezimehen radnikusele vn 2012 kezakun 19. päiväl ühtmel'žen sättutandan jäl'ghe Gubernijan Dumas. Mugažo viž muite varagubernatorad da ühesa Ohjastusen varaezimest oma gubernatorale abhu.

Samaran agjan üks'kodine parlament om Gubernijan Dum. Kaik rahvaz valičeb sen 50 ezitajad videks vodeks. Viktor Sazonov radab Gubernijan Duman ezimeheks vn 2001 tal'vkun 18. päiväspäi nelländen strokun jäl'geten.

Radonoigendai tobmuz om Samaran agjan Ohjastuz. Agjan ministrused, departamentad, ohjandused, radnikoičendad da valdkundaližed inspekcijad alištudas Ohjastusele.

Valitihe gubernatorad vn 2014 14. päiväl sügüz'kud, edeline gubernator sai vägestust ezmäižes turas (91,35 %) da oli ranu kahtenden strokun. Gubernijan Duman ühtnijoiden järgenduseližed valičendad oliba vn 2016 18. päiväl sügüz'kud (6. kucund).

Vn 2010 Venäman rahvahanlugemižen mödhe agjan eläjiden lugu oli 3 215 532 ristitud^[2]. Kaikutte nellänz' ristit videspäi om lidnalaine.

Kaik om üks'toštkümne lidnad agjas da 14 lidnanvuittušt žilod. Toižed järedad lidnad (enamba 100 tuh. eläjid, surembaspäi penembha) oma Tol'jatti, Sizran' da Novokuibiševsk. Vl 2017 kaik oli 17 eländpunktad enamba mi 10 tuh. eläjidenke.

Rahvahad (enamba 0,4 % vl 2010): venälaižed — 82,3 %, totarlaižed — 3,9 %, čuvašalaižed — 2,6 %, mordvinalaižed — 2,0 %, ukrainalaižed — 1,3 %, armenijalaižed — 0,7 %, kazahlaižed — 0,5 %, azerbaidžanlaižed — 0,4 %, uzbekalaižed — 0,4 %, toižed rahvahad — 2,0 %, rahvahuden ozutandata — 3,9 %.

1. ↑ Samaran agjan Päkäskusen tekst. — Constitution.garant.ru. (ven.)
2. ↑ Venäman kaikenaigaine ristitišt vl 2010. — Rosstat (gks.ru). (ven.)

• Samaran agjan gubernatoran da Ohjastusen oficialine sait (samregion.ru). (ven.)
• Samaran Gubernijan Duman oficialine portal (samgd.ru). (ven.)

Venälaižen Federacijan subjektad
Tazovaldkundad	Adigejan • Altajan • Baškortostanan • Burätijan • Čečenijan • Čuvašijan • Dagestanan • Hakasijan • Ingušetijan • Kabardinijan da Balkarijan • Kalmikijan • Karačajan da Čerkesijan • Karjalan • Komin • Marii Elan • Mordovijan • Pohjoižosetijan — Alanijan • Saha (Jakutijan) • Tatarstanan • Tuvan • Udmurtijan
Randad	Altajan • Baikalantagaine • Habarovskan • Kamčatkan • Krasnodaran • Krasnojarskan • Merenrandaline • Permin • Stavropolin
Agjad	Alalidnan • Amuran • Arhangel'skan • Astrahanin • Belgorodan • Bränskan • Čeläbinskan • Irkutskan • Ivanovon • Jaroslavlin • Kaliningradan • Kalugan • Kemerovon • Kirovan • Kostroman • Kurganan • Kurskan • Leningradan • Lipeckan • Magadanan • Moskvan • Murmanskan • Novosibirskan • Omskan • Orelan • Orenburgan • Penzan • Pskovan • Rostovan • Räzanin • Sahalinan • Samaran • Saratovan • Smolenskan • Sverdlovskan • Tambovan • Tomskan • Tulan • Tverin • Tümenin • Ul'janovskan • Uz'lidnan • Vladimiran • Volgogradan • Vologdan • Voronežan
Federaližen alištusen lidnad	Moskv • Piter
Avtonomižed agjad	Evrejan
Avtonomižed ümbrikod	Čukotkan • Hantin da Mansin (Jugr)1 • Jamalan Nenciden1 • Nencan2
Toižed	Krim3 • Sevastopol'3
1 Tümenin agjan pala      2 Arhangel'skan agjan pala      3 Dejure — Ukrainan pala