Johannes (Johan) Hartog (☆ 16 di mei 1912 na Baarn (Hulanda)^[1] – † mei 1997 na Salzburg) tabata un historiador, escritor y bibliotecario antiano. E ta ser considera un di e pioneronan cu a pone e base pa investigacion cientifico socio-cultural di Caribe Hulandes.^[2]

Johannes Hartog a nace na Hulanda unda el a completa gymnasium y seguidamente e bay studia historia. Originalmente protestant el a converti na catolismo y na 1937 a doctora den teologia riba e disertacion titula The Sacrifice of the Church na Western University na London.^[3] E kier a sigui specialisa como orientalista, pero mester a bandona e estudio postgrado na Roma pa motibo di Guera Mundial II. Durante e periodo aki e tabata miembro y activista di e Asociacion Esperanto di Hulanda. Pa corant e tabata skirbi articulo tokante literatura y historia di Esperanto y despues tabata redactor di un antologia hulandes di Esperanto.^[4][5] Hartog tabata no-ortodoxo y un personahe markante; e tabata biaha hopi, entre otro den tur skina di Europa y Medio Oriente, acumulando conocemento na diferente universidad, pais y sociedad.^[3] Na juni 1940 el a yega Corsou, unda su ruman homber tabata traha pa refineria Shell.^[1]

Desde 1940 te 1946 Hartog tabata hefe di redaccion di Amigoe di Curaçao, corant catolico cu e momento ey tabatin circulacion na tur e islanan di Kolonia Kòrsou. Bou di su guia Amigoe a converti di un corant semanal (saliendo dos biaha pa siman) den un corant diario.^[3] E tabata fundado y presidente di e Asociacion di Prensa di Kòrsou. Despues di 1946 el a continua como coresponsal di e corant.

Na 1946 el a establece di nobo na Hulanda, despues cu autoridadnan na Kòrsou a nenga un permiso pa regresa e isla.^[6] Aki e ta keda nombra hefe di redaccion di e corant regional "Gooi- en Eemlander" na Hilversum. Desde 1948 el a traha pa Sticusa y tabata enbolbi cu e apertura di un centro cultural na Kòrsou y Aruba.^[7] Na 1950 el a wordo nombra director di e biblioteca di Aruba, net prome cu el a drenta Lagoenweg 11 na Oranjestad. Mas despues e biblioteca ta muda pa Wilhelminastraat, unda Hartog a keda director te su pensioen na 1972.^[8]

Hartog tin un cantidad di publicacion riba su nomber. E tabata skirbi riba un variedad di tema di e islanan di Caribe Hulandes, pero mas tanto di Aruba. Durante su periodo como bibliotecario el a skirbi y publica alrededor di 60 buki; e tabata uni ciencia cu periodismo den su estilo di skirbi.^[1] Mayoria di su bukinan a wordo publica pa e imprenta Arubano VAD (Verenigde Antilliaanse Drukkerijen, antes D.J. de Wit). Di su obranan algun a wordo traduci na idioma Ingles of Spaño. Su obra mas conoci ta Geschiedenis van de Nederlandse Antillen (Historia di Antias Hulandes), un cronica antiano den cuater tomo cu a sali entre 1953 y 1981.^[9] Den e ultimo aña el a saca den forma di un di cincu tomo un registro y bibliografia historico. Su articulonan tabata aparece den revistanan cientifico, manera West-Indische Gids y Caribbean Quarterly. Riba peticion, entre otro di gobierno, el a publica diferente biografia, por ehempel di Tula, Brion y Piar. Pa varios organisacion el a saca bukinan conmemorativo y otro obranan historico.

Na aña 1992 el a wordo condecora como Oficial (Officier) den Orden di Oranje-Nassau.^[10]

Hartog a casa na 1948 cu Elisabeth Wouters, e unico yiu muhe di Gielliam J.J. Wouters (1883-1973), gobernador di Antias Hulandes entre 1936 y 1942.^[11] Huntu nan a biba na La Piccola Marina di 1950 te 1980, ora nan a bandona Aruba pa motibu di salud di Elisabeth.^[12] Hartog ta fayece na 1997, net un luna despues di su esposa y algun dia despues di cumpli 85 aña. El a wordo dera na Salzburg dia 21 di mei 1997.^[13] Su coleccion personal di buki y potret "Caribiana" el a laga atras pa Biblioteca Nacional Aruba.^[14]

• 1944 - Journalistiek leven in Curaçao
• 1947 - Nederland in de West
• 1953-1981 - Geschiedenis van de Nederlandse Antillen, tomo I te cu IV
• 1957 - Bonaire: van indianen tot toeristen
• 1961 - Curaçao: van kolonie tot autonomie: na 1816
• 1962 - Het verhaal der Maduro's en foto-album van Curaçao, 1837-1962 : uitgegeven ter gelegenheid van het honderd vijfentwintigjarig bestaan van S.E.L. Maduro & Sons
• 1964 - De Bovenwindse eilanden : Sint Maarten, Saba, Sint Eustatius : eens gouden rots nu zilveren dollars
• 1967 - The Honen Daliem congregation of St. Eustatius
• 1968 - Luis Brion: de admiraal-financier (hunto cu Philip Louis Pierre Brion)
• 1970 - Mogen de eilanden zich verheugen : geschiedenis van het protestantisme op de Nederlandse Antillen
• 1971 - Honderd jaar gezelligheid in De Gezelligheid, 1871-1971
• 1973 - Tula: verlangen naar vrijheid
• 1974 - The courthouse of Sint Maarten
• 1976 - Geschiedenis van Sint Eustatius
• 1987 - Juwana Morto: Kustbatterij Aruba
• 1989 - Oranje, de Nederlandse Antillen en Aruba
• 1992 - Het gedrukte woord in de Nederlandse Antillen en Aruba
• 1996 - Het oude fort op de berg : gedenkboek bij het tweehonderdjarig bestaan van Fort Nassau op Curaçao
• 1997 - De forten, verdedigingswerken en geschutstellingen van Curaçao en Bonaire : van Van Walbeeck tot Wouters, 1634-1942