Крумкачы Мінск
Поўная назва	ТАА «Футбольны клуб НФК»
Мянушкі	Крумкачы
Заснаваны	2011
Горад	Мінск, Беларусь
Стадыён	САК «Алімпійскі» Умяшчальнасць: 1530
Дырэктар	Алег Давідовіч
Галоўны трэнер	Сяргей Казека
Чэмпіянат	Другая ліга
2023	2 месца
Сайт	Афіцыйны сайт
Асноўная форма Гасцявая форма

«Крумкачы» — беларускі футбольны клуб з Мінска. Заснаваны ў 2011 годзе. У 2016—2017 гадах выступаў у Вышэйшай лізе чэмпіянату Беларусі. У цяперашні час выступае ў Другой лізе.

Клуб быў заснаваны ў 2011 годзе і спачатку выступаў у аматарскім чэмпіянаце і кубку МЛФ^[1]. У сезоне 2014 «Крумкачы» былі заяўленыя ў Другую лігу, дзе, заняўшы другое месца, з першай спробы выйшлі ў Першую лігу чэмпіянату Беларусі.

Сезон 2015 у Першай лізе каманда пачала няўдала, пацярпеўшы два паражэнні на старце. У красавіку каманду пакінуў галоўны трэнер Аляксандр Багайчук, на яго месца ў маі быў прызначаны Алег Дулуб, вядомы па працы ў розных клубах Вышэйшай лігі ў якасці асістэнта галоўнага трэнера. Па выніках першага круга каманда здолела апынуцца на пятым месцы. У другой палове сезона «Крумкачы» паказвалі выдатную гульню і пачалі прэтэндаваць на прызавыя месцы. Перад апошнім турам сталічны клуб выйшаў на трэцяе месца, якое быў вымушаны бараніць у заключным матчы ў вочным супрацьстаянні з магілёўскім «Дняпром». Атрымаўшы перамогу (2:0), «Крумкачы» захавалі трэцяе месца і трапілі ў Вышэйшую лігу.

У сезоне 2016 «Крумкачы» дэбютавалі ў Вышэйшай лізе. Захаваўшы лідараў, каманда ўзмацнілася некалькімі вопытнымі ігракамі, а таксама шэрагам легіянераў. У першай палове сезона «Крумкачы» ішлі ў верхняй палове табліцы, прэтэндуючы на медалі, былі атрыманы перамогі над фаварытамі чэмпіянату — салігорскім «Шахцёрам» (2:0) і мінскім «Дынама» (4:1). Аднак, утрымаць пазіцыі каманда не здолела, і ўвосень ужо скацілася ўніз табліцы. У кастрычніку «Крумкачы» пакінуў галоўны трэнер Алег Дулуб, які ўзначаліў клуб украінскай Прэм’ер-лігі «Карпаты». Каманду ўзначаліў Васіль Хамутоўскі, з якім «Крумкачы» захавалі прапіску ў эліце, заняўшы выніковае 11-е месца з 16.

У пачатку 2017 года галоўным трэнерам быў прызначаны ўкраінскі спецыяліст Уладзімір Пяценка. Пасля перамогі ў першым туры над «Віцебскам» і нічыі ў другім з брэсцкім «Дынама» вынікі сталічнага клуба пайшлі на спад, што ў многім было звязана з цяжкай фінансавай сітуацыяй. У маі Пяценка пакінуў пасаду, выканаўцам абавязкаў галоўнага трэнера стаў Аляксей Кучук, які раней працаваў з дублем «Крумкачоў». Пазней каманду з-за фінансавых цяжкасцей сталі пакідаць і ігракі.

29 ліпеня 2017 года, напярэдадні гасцявога матча 16-га тура супраць «Віцебска», 5 вядучых футбалістаў (Дзмітрый Клімовіч, Дзмітрый Яшын, Ягор Сямёнаў, Філіп Іваноў, Яўген Шыкаўка) адмовіліся ехаць на матч з прычыны затрымкі выплат заробку^[2]. У хуткім часе ўсе яны пакінулі клуб (трохі пазней, аднак, у склад вярнуўся Філіп Іваноў). У другой палове сезона 2017 за «Крумкачоў» гуляў фактычна новы склад, куды ўвайшлі ў асноўным дублёры і рэзервісты, а таксама ігракі з ніжэйшых ліг. Вынікі сталі яшчэ горш, аднак сталічны клуб здолеў атрымаць гасцявую перамогу над чэмпіёнам краіны — барысаўскім БАТЭ (3:2). У жніўні 2017 года клуб абвясціў аб пачатку краўдфандзінгавай кампаніі па збору грошай для каманды^[3], у выніку якой было сабрана каля 30 тысяч беларускіх рублёў (23 % ад запланаванай сумы). Атрымаўшы перамогу ў апошнім туры над «Мінскам» (2:1), «Крумкачы» занялі 13-е месца і захавалі месца ў Вышэйшай лізе.

15 снежня 2017 года з-за шматмесячных запазычанасцей клуба перад ігракамі і трэнерамі на яго была накладзена забарона на рэгістрацыю новых футбалістаў. У пачатку 2018 года «Крумкачы», тым не менш, пачалі рыхтавацца да новага сезона, праглядаючы патэнцыйных навічкоў; таксама клуб пачаў выплачваць грошы некаторым ігракам. 26 лютага 2018 года «Крумкачам» было адмоўлена ў прыняцці дакументаў на атрыманне ліцэнзіі на выступленне ў Вышэйшай лізе ў сезоне 2018 у сувязі з парушэннем тэрмінаў падачы. Неўзабаве клуб абвясціў аб прыходзе армянскага інвестара Ваге Марцірасяна, які намераваўся разлічыцца з крэдыторамі і забяспечыць бюджэт на сезон 2018 у памеры 600 тыс. долараў. Аднак, 2 сакавіка ў сувязі з невыкананнем рашэння аб пагашэнні запазычанасцей з каманды былі зняты 2 ачкі ў чэмпіянаце Беларусі 2018 і пацверджана забарона на рэгістрацыю новых ігракоў, а пазней былі адхілены апеляцыя на адмову ў прыняцці дакументаў на атрыманне ліцэнзіі ў Вышэйшай лізе, а таксама просьба «Крумкачоў» аб узняцці пытання аб атрыманні клубам дазволу на праходжанне ліцэнзавання на Канферэнцыі АБФФ 14 сакавіка. Пасля таварыскага матча з салігорскім «Шахцёрам» (4 сакавіка) каманда больш не трэніравалася. Не маючы дастатковай колькасці ігракоў, «Крумкачы» па чарзе адмовіліся ад удзелу ў двух чвэрцьфінальных матчах Кубка Беларусі супраць гродзенскага «Нёмана», за што клуб быў адштрафаваны на 500 базавых велічынь, а за працяг непагашэння знятыя яшчэ 3 ачкі. 19 сакавіка заяву клуба на ўдзел у Вышэйшай лізе разглядаў Футбольны арбітраж АБФФ і таксама адмовіў, такім чынам «Крумкачы» канчаткова былі пазбаўлены месца ў Вышэйшай лізе^[4].

Неўзабаве заўзятары «Крумкачоў», якія не жадалі спынення існавання клуба, ініцыявалі стварэнне новай юрыдычнай асобы, фармальна новы клуб пад назвай НФК «Крумкачы» 30 сакавіка падаў заяўку на ўдзел у Другой лізе^[5]. 3 красавіка «Крумкачы» былі афіцыйна ўключаныя ў склад удзельнікаў турніру^[6]. У сувязі са стварэннем новай юрыдычнай асобы абавязкі і штрафы папярэдніх «Крумкачоў» не распаўсюджваліся на новы клуб. У Другой лізе «Крумкачы» сабралі баяздольны склад, і хутка каманда замацавалася сярод лідараў. Доўгае барацьба з брэсцкім «Рухам» за першы радок скончылася няўдала для «Крумкачоў», якія фінішавалі другімі, аднак пры гэтым за некалькі тураў за заканчэння сезона каманда забяспечыла выхад у Першую лігу.

У пачатку 2019 года клуб змяніў назву на НФК, каб пазбегнуць супадзення назвы са старой юрыдычнай асобай «Крумкачоў» і атрымаць магчымасць уступіць у АБФФ. Клуб добра ўзмацніўся, запрасіўшы ігракоў з вопытам выстапаў у Вышэйшай лізе, дадаўшы да іх некалькі маладых выканаўцаў, таксама вярнуўся шэраг ігракоў былых «Крумкачоў». Камандзе ставілася задача выйсці ў Вышэйшую лігу, аднак сезон пачаўся дрэнна, сталічны клуб апынуўся ў ніжняй палове табліцы. У маі 2019 года быў звольнены галоўны трэнер Аляксей Кучук, на яго месца быў прызначаны Сяргей Кузьмініч. Услед за трэнерам каманду пакінулі некаторыя ігракі, таксама канчаткова адхіліўся ад клуба колішні кіраўнік Дзяніс Шунто. У другой палове сезона каманда паказвала лепшыя вынікі і фінішавала восьмай.

У сакавіку 2020 года каманда вярнула назву «Крумкачы». Добра ўзмацніўшыся, «Крумкачы» адразу апынуліся ўверсе табліцы, доўгі час змагаліся за выхад у Вышэйшую лігу, аднак у выніку занялі трэцяе месца і саступілі ў стыкавых матчах «Слуцку» (0:2, 1:2).

У студзені 2021 года на пасаду галоўнага трэнера вярнуўся Алег Дулуб^[7]. Каманда захавала лідараў, падмацаваўшыся таксама шэрагам маладых гульцоў. У Першай лізе «Крумкачы» хутка апынуліся сярод лідараў, некаторы час змагаліся за першы радок з дзяржынскім «Арсеналам». У чэрвені Дулуб пакінуў клуб, некаторы час камандай кіраваў яго памочнік Сяргей Казека, а ў ліпені новы галоўным трэнерам стаў Алег Кубараў, які да таго быў спартыўным дырэктарам клуба. Пазней «Крумкачы» з-за шэрагу няўдалых матчаў адкаціліся на трэці радок, прапусціўшы наперад «Белшыну», гэтаму становішчу пагражалі іншыя клубы, якія ішлі ўслед, аднак сталічная каманда здолела захаваць трэцяе месца да фінішу турніру і зноў трапіла ў стыкавыя матчы, дзе па выніках дзвюх сустрэч саступіла мазырскай «Славіі» (0:1, 0:0).

У пачатку 2022 года клуб меў істотныя фінансавыя праблемы. Каманду пакінулі амаль усе гульцы, а таксама трэнерскі штаб; у студзені трэніравацца пачалі пераважна ігракі юнацкіх каманд. Дырэкцыя САК «Алімпійскі», дзе ў апошнія гады «Крумкачы» праводзілі хатнія матчы, адмовілася працягваць дагавор арэнды стадыёна; пошук іншых арэн таксама скончыўся беспаспяхова. У выніку 3 лютага 2022 года клуб накіраваў у АБФФ ліст з адмовай ад удзелу ў Першай лізе ў новым сезоне і заявіў аб пераходзе ў Другую лігу^[8]. Тым не меней, для ўдзелу ў Другой лізе клуб здолеў сабраць баяздольны склад, у дывізіёне Мінска «Крумкачы» доўга ішлі ў лідарах, але занялі выніковы другі радок. У плэй-оф каманда дайшла да фіналу, дзе прайграла «Ніве» з Доўбізны (2:5 у дадатковы час) і стала сярэбраным прызёрам.

Па выніках сезона 2022 «Крумкачы» атрымалі права ісці ў Першую лігу і першапачаткова мелі намер туды заявіцца^[9], аднак у студзені 2023 года, не знайшоўшы дастатковага бюджэту, клуб адмовіўся ад павышэння і вырашыў застацца ў Другой лізе^[10]. У Другой лізе «Крумкачы» спачатку змагаліся за выхад у фінальны этап з Мінскага дывізіёна, што атрымалася з другога месца, а затым зноў сталі срэбранымі прызёрамі, саступіўшы ў фінале салігорскаму «Партызану» (2:2, па пенальці 1:4).

• Першая ліга:
  • 3 ! 3-е месца (3): 2015, 2020, 2021

• Другая ліга:
  • 2 ! 2-е месца (4): 2014, 2018, 2022, 2023

Станам на жнівень 2024 года, згодна з афіцыйным сайтам клуба^[11].

№ Паз. Імя Нар. 1 Бр Віталь Зыгмантовіч 2005 21 Бр Кірыл Хоміч 1995 Бр Аляксей Дашкевіч 2005 3 Аб Мікіта Аўсянік 2004 5 Аб Януш Ладуцька (капітан) 1993 16 Аб Яўген Гардзейчык 2002 17 Аб Артур Лукашэвіч 2002 83 Аб Цімафей Мельнік 2006 Аб Мікіта Кухцік 2001 7 ПА Косукэ Намэката 1999 8 ПА Арсеній Старыкаў 2002 18 ПА Аляксей Баранаў 2002

№ Паз. Імя Нар. 21 ПА Яўген Елязаранка 1993 44 ПА Канстанцін Куімаў 1997 77 ПА Вячаслаў Папава 2003 ПА Павел Гераў 2005 ПА Ілья Зайцаў 2005 ПА Аляксей Яўзрэзаў 2003 20 Нап Іван Каленскі 2003 23 Нап Расціслаў Серы 2001 33 Нап Данііл Дарошка 2001 79 Нап Ягор Антановіч 2003 89 Нап Сяргей Лынько 1989

• Сяргей Казека (нар. 1986) — галоўны трэнер
• Уладзімір Бушма (нар. 1983) — трэнер
• Валерый Макарэвіч (нар. 1983) — трэнер брамнікаў

Сезон	Ліга	М	Г	В	Н	П	РМ	А	Кубак	Заўвагі
2014	Другая — Б (Д3)	3	22	13	1	8	48–34	40	1/32 фіналу	Выхад у фінальны этап
	Фінальны этап	2	14[A]	9	2	3	24–14	29		Выхад у Першую лігу
2015	Першая (Д2)	3	30	19	3	8	67–45	60	1/16 фіналу	Выхад у Вышэйшую лігу
2016	Вышэйшая (Д1)	11	30	9	6	15	24–39	33	1/16 фіналу
2017	Вышэйшая (Д1)	13	30	5	10	15	26–47	25	Чвэрцьфінал	Пераход у Другую лігу
2018	Другая (Д3)	2	28	23	3	2	80–16	72	1/32 фіналу	Выхад у Першую лігу
2019	Першая (Д2)	8	28	11	7	10	41–38	40	1/16 фіналу
2020	Першая (Д2)	3	26	16	4	6	46–28	52	1/8 фіналу
	Пераходныя матчы[B]		2	0	0	2	1–4
2021	Першая (Д2)	3	33	17	9	7	58–31	60	1/16 фіналу
	Пераходныя матчы[C]		2	0	1	1	0–1			Пераход у Другую лігу
2022	Другая — Мінскі дывізіён (Д3)	2	16	12	2	2	51–12	38	1/16 фіналу
	Другая — плэй-оф (Д3)	2	7	3	3	1	12–11
2023	Другая — Мінскі дывізіён (Д3)	2	16	11	2	3	61–25	35	1/128 фіналу
	Другая — Фінальны этап — Група 4 (Д3)	1	3	2	1	0	10–1	7
	Другая — плэй-оф (Д3)	2	5	1	4	0	8–6

• Афіцыйны сайт клуба
• «Крумкачы» на football.by
• Профіль на сайце globalsportsarchive.com (англ.)

Другая ліга чэмпіянату Беларусі па футболе 2023
Брэсцкі дывізіён	Захад Агра-Пелішча Атлант Драгічын Івацэвічы Камунальнік Крэчат Порт-СК Пружаны Фармат Цэнтр футбола Усход Ганцавічы ДЮСШ (Столін) ДЮСШ Хваля Іванава Лунінец Ляхавіцкі Волат Мікашэвічы Надзея Новая Прыпяць Стэнлес
Віцебскі дывізіён	Газавік Гарадоцкія львы Глыбокае Мёры Лепель Ніва Орша-ФСК Паставы Полацк-2019 Сянно
Гомельскі дывізіён	Вертыкаль Дняпро ДЮСШ-2 Жлобін Іпуць-ДЮСШ Лясгас МНПЗ Светлагорск
Гродзенскі дывізіён	Захад Змена Масты Нёман-Белкард Свіслач Слонім-Сіці ФСК Гродзенскі Чайка Усход Астравец-2 Ашмяны Дзятлава Ліда-2 Смаргонь-2 Факел Шчучын
Магілёўскі дывізіён	Захад Быхаў Друць Зара Касцюковічы Колас Пціч Спартак Тарпеда Усход Віхра Горкі Дняпро-Юні Дрыбін Клімавічы Краснаполле Ніва Сервалюкс-Агра Слаўгарад Сож
Мінскі дывізіён	БДУ Крумкачы СДЮШАР Дынама Серабранка-Волат Тарпеда Трактар Ураджайная Энергетык-БДАТУ Юні
Дывізіён Мінскай вобласці	Поўдзень Арэса Бабоўня Будаўнік Клецк Кронан Партызан Рэспект Старыя Дарогі Поўнач Адзінства Беразіно Вікторыя Вілія ДЮСШ-4 Колас Крупкі-ДРБУ-164 Фалько