馬來社會對社會賢達同埋王親貴族嘅稱號比較複雜，影響地區唔單只馬來西亞，亦包括汶萊、菲律賓南部嘅棉蘭老島同埋印尼幾個省份。封號唔分男女，男性若果受冊封，佢老婆都會有相應封銜；但係若果女性受冊封，佢老公就無相應嘅封銜。

馬來西亞封銜分咗以下幾級：

敦（Tun）係馬來西亞最高榮譽，全國共有85人獲頒呢個名銜，最近喺2017年受封為敦嘅有三人，其中包括國大黨前主席三美威魯。

敦頭銜喺古代用嚟稱呼王族，由男性世襲，現代就由馬來西亞最高元首頒畀對國家建設有卓越貢獻者，如馬來西亞第四同第七任首相敦馬哈迪、馬華公會第六任總會長敦林良實。凡係獲頒護國瑪哈拉惹勳章或者效忠瑪哈拉惹勳章嘅都可以用敦嘅頭銜。男性敦妻子叫做「杜潘」（如林良實夫人杜潘王維娜）。

上述兩種勳章喺聯邦授勳同嘉獎制度入面屬於第一級別（即係聯邦皇家冊封同王族勳章，只限最高元首同各州屬最高統治者）。馬來西亞擁有敦頭銜者，地位最為尊貴。

丹斯里（Tan Sri）係繼敦之後第二高封銜，同拿督斯里榮譽級別相等，截至2015年12月1號，全國有1,020人擁有呢一個名銜，加上2016年52名、2017年51名受封嘅丹斯里，初步估計有1,123人曾經獲頒呢個銜。

若持有丹斯里封銜係男性，佢嘅太太就叫做潘斯里（Puan Sri）；若果持有封銜嘅係女性，佢嘅丈夫並無特殊名銜。

「丹斯里」嘅頭銜分兩種，P.M.N 同P.S.M.：

P.M.N.在世受封者上限50人，每年只有一兩名或者甚至無，政府首席秘書、總檢察長同總警長等級嘅高官先有機會攞到呢個頭銜；

P.S.M.在世受封者上限為325名，主要以部門秘書長、法官、社團領袖、退任部長同商人為主，如果名額滿咗，就要等到受封者中有人離世後，先可以再次冊封其他人填補^[1]。

由各州蘇丹（最高統治者）或者州元首（只限馬六甲、檳城、沙巴同沙撈越）頒授。

拿督斯里（Dato' Sri / Dato' Seri）係馬來西亞州封銜中最高封銜，呢一個封銜比拿督高級，同聯邦封銜中嘅丹斯里榮譽級別相等。喺馬來西亞擁有拿督斯裏頭銜者，地位崇高、尊貴。例如第四任馬來西亞首相馬哈迪封號都係拿督斯里，2003年10月31號離任後先畀王室封銜敦^[2]。若果擁有Dato' Sri（拿督斯里）頭銜者係男士，佢嘅配偶頭銜係Datin Sri（拿汀斯里）；相反，擁有頭銜者係女士嘅話，佢嘅配偶唔會有任何頭銜。

拿督係馬來西亞一種封銜，比太平局紳頭銜高級。冊封嘅標準係對國家有傑出貢獻，受封儀式都係喺王宮進行。通常喺馬來西亞有拿督榮銜人士都會受到尊敬。拿督封銜有三等級別，Peringkat Pertama (First-Class)為高級拿督、Peringkat Kedua (Second-Class)為二級拿督。

由蘇丹封賜嘅拿督係「Dato'」；由州元首封賜嘅拿督係「Datuk」。若果擁有Dato'頭銜者係男士嘅話，佢嘅配偶頭銜為Datin（拿汀）；相反，擁有頭銜者係女士嘅話，佢嘅配偶唔會有任何頭銜。

例如出名華人國際巨星拿督楊紫瓊（霹靂州二級拿督封銜），羽毛球世界排名第一男單球員拿督李宗偉（檳城州二級拿督封銜）。國際巨星拿督成龍配合2015年2月1號聯邦直轄區日喺馬來西亞國家皇宮受國家元首端姑阿都哈林陛下冊封（聯邦直轄區二級拿督封銜）。

受封「拿督」有一個唔成文嘅年齡條件，一般係30歲以上嘅人先有機會攞到呢一個頭銜。

• 首相署禮儀及國際會議事務組 - 受封者名單