羽毛球
最高管理機構 | 羽毛球世界聯會 |
---|---|
起源 | 18世紀 |
特徵 | |
有無身體接觸 | 無 |
隊員 | 單打、雙打 |
分類 | 球拍運動 |
器材 | 羽毛球、羽毛球拍 |
比賽 | |
奧運 | 1992年 - 而家 |
羽毛球係一種波,軟木造嘅,有圈羽毛,用長柄網狀拍去打,主要係室內運動。可以單打或者雙打。
同打法似似地嘅網球比較,羽毛球唔需要好高嘅體格,但係耐力就好重要,所以好啱東方人玩。由1992年開始,羽毛球做咗奧運會嘅正式比賽項目。
歷史
[編輯]![](https://upload.wikimedia.org/wikipedia/commons/thumb/d/df/Battledore_-_Youthful_Sports.png/250px-Battledore_-_Youthful_Sports.png)
羽毛球本來係板羽球,即係用木板打紮住羽毛嘅波(類似毽),唔畀佢落地。其實呢種波已經有成二千年歷史,喺古代歐洲、中國、日本都有人打過[1][2]。其中喺古希臘嚟嘅一種板羽球,更將實木拍變成淨係得木做框、中間綁住緊晒嘅羊皮嘅拍,因為有彈性所以易打過板羽球。呢種遊戲唔單只傳咗去東方嘅印度,重傳到暹羅、中國同日本呢啲國家[3]。總之呢啲遊戲嘅目的都只係要令個波唔落地,同而家嘅羽毛球運動都幾似。
19世紀中,印度西部嘅浦那出現咗現代羽毛球,嗰時個名係用地名「浦那」(Poona)嚟改。駐喺嗰度嘅英國人幾鍾意呢種新運動,所以將佢帶返英國本土。1873年,喺英國告羅士打郡嘅伯明頓莊園舉行咗場公開表演,引起好多人嘅注意,羽毛球就慢慢傳開喇。後來啲人就用嗰場表演嘅莊園名「伯明頓(Badminton)」來稱呼呢個運動,但係喺華語地區,呢個名無普及,而係跟個波而叫做「羽毛球」。
早期嘅英國羽毛球運動係用印度嘅不成文規則,但因為唔夠嚴謹而成日引發爭議。1887年,「巴斯羽毛球俱樂部」經過研究同改良,完成咗第一部書面羽毛球規則[4]。
1893年,英國羽毛球協會成立,重新修訂同統一咗羽毛球比賽嘅規則。1934年,第一個世界性嘅羽毛球組織—國際羽毛球聯合會喺英國成立。喺1981年同嚮1978年成立嘅世界羽毛球聯合會合併,繼續叫國際羽毛球聯合會。2006年9月24號,國際羽毛球聯合會改名做羽毛球世界聯合會,而家有159個會員國或地區。
比賽規則
[編輯]而家羽毛球賽單項有男單、女單、男雙、女雙同混雙,總共5個。由2006年5月份嘅湯姆斯盃同尤伯盃比賽開始,球制由15分制改做直接得分嘅21分制,多數都「三盤兩勝」,每局某方攞到11分嗰時休息90秒,而第一局完同第二局中間、第二局完同第三局中間可以有兩分鐘嘅休息。
球具
[編輯]![](https://upload.wikimedia.org/wikipedia/commons/thumb/5/5c/Shuttlecock.png/120px-Shuttlecock.png)
羽毛球由16條羽毛同球托組成。羽毛長62~70毫米,個頂圍做圓形。球托直徑25~28毫米,重4.74~5.5克,個底係半球體。
羽毛球拍唔可以長過680毫米,拍面嘅長應該細過290毫米,闊細過230毫米。
開波同接開波
[編輯]開波嗰時,兩邊球員一定要企喺對角嘅發球區,兩隻腳掂地,但唔可以踩到發球區條界。開波嗰時塊拍一定要打中球托,波要喺開波嗰個球員條腰下面位置開,而成個開波過程入面,球拍拍頭都應該要指住下面。
- 單打比賽入面,如果開波嗰邊嘅得分係雙數嗰時,球員應該企喺右邊發球區入面開波或者接開波。單數就喺左邊。
- 雙打比賽入面,如果開波嗰邊嘅得分係雙數嗰時,就由右邊嗰個球員企喺右邊發球區入面開波或者接開波。單數就喺左邊。開波之後第一拍,只係接開波嗰個球員先可以打波,之後無所謂,直到其中一邊犯規或者波掂地。
攞分
[編輯]開波之後,場波就叫正式開始,兩邊球員輪流打波,直至其中一邊犯規或者波跌喺其中一邊嘅場區入面。喺21分制係用每球直接得分嘅計法。喺得分嘅時候攞埋發球權,連續得分嘅時候就喺自己左右發球區交替開波。每局雙方打到20平手之後,就刁時,一邊領先兩分就當嗰局羸。唔係無限刁,去到29平手之後就攞到分嗰邊羸。
喺舊制(15分制)比賽裏面,只係得開波嗰邊可以攞分。單打比賽開波嗰邊如果輸波,對面就攞到發球權,重新開波。雙打比賽開波嗰邊兩位選手都有發球權,第一個發球員如果攞唔到分,第二個發球員就重新開波;第二位發球員如果都攞唔到分,對方就攞到發球權,重新開波。當比賽兩邊打成13平、14平,先攞到13或14分嗰一邊,有權決定雙方打多5分或3分(女單出現9平或10平時,可分別要求加打3分或2分)。
犯規
[編輯]喺發球之後去到波掂地之前,接波隊員犯規,另一邊就得分。
- 開波過腰:開波嗰陣擊球點高過腰(腰嘅定義係肋骨下緣,發球嗰陣拍頭一定要向下)
- 任何一方都唔可以非法延誤開波。
- 出界:打波落喺有效區域出面,無過網或穿過網或喺網下面入對手場區。
- 過網打波:唔喺自己嘅場區入面打波,即球員個拍或身體入咗對手場區。
- 持球:將個波打出去之前,個波喺拍上停咗,或者有拖帶動作。
- 連擊:同一球員連續打波多過1次,或者球過網之前隊友連續打波。
- 掂網:球員塊拍、個身或者件衫掂網。
- 阻人打波,或者專登煩住對方球員。
- 球掂到場邊嘅嘢或球員個身,或天花板。
基本打法
[編輯]揸拍同埋擊球
[編輯]![](https://upload.wikimedia.org/wikipedia/commons/thumb/6/6d/Badminton_Schlaegerhaltung.svg/200px-Badminton_Schlaegerhaltung.svg.png)
揸拍時,手嘅「虎口」約莫對住球拍嘅側面,好似攞菜刀咁,所以成日俾人叫做「刀板」。唔好好似揸烏蠅拍咁將虎口對住塊拍正面,雖然咁樣比較自然同埋易啲抽擊正手方向嘅波,但因為施力點喺虎口底部,力臂太短所以唔易打到強而有力嘅波。況且,一旦遇到反手嗰邊嘅波,就唔可以靈活抽擊。
用正規嘅「刀板」揸拍方式打正手方向波嗰陣,應該逆時針(左手持拍者為順時針)稍微轉手腕,令拍面向前,並將食指去前伸小小之後再揮拍,因力臂變長而容易打到強勁嘅波。遇到反手方向波嗰陣,應該將手指公伸前、頂住再揮拍,就容易打到強勁嘅回球。
因為要成日變換食指同手指公嘅位置,方便打揮擊正手拍或反手拍,所以揸拍時掌心應該懸空小小,唔好緊緊握實球拍。
![](https://upload.wikimedia.org/wikipedia/commons/thumb/c/c2/ZonasGolpesBadminton.jpg/180px-ZonasGolpesBadminton.jpg)
對一般人嚟講,打反手拍始終唔夠正手拍嚟得順手,所以會好自然咁擴大正手拍嘅使用範圍。例如用右手揸拍嘅人,當個波喺右方當然會用正手拍,對於正上方,甚至左上方嘅波,都往往會用正手拍回擊。由於用正手拍揮擊左上方來球要將手臂繞過頭上,所以叫做「繞頭」打法。
對於左上方遠少少嘅波,腕力勁啲嘅人,往往會直接用反手拍打返去。嗰時佢哋會先將右腳跨去左邊,將身體轉去左後方,回頭睇住個波,並用反手拍揮擊。相對於「繞頭」打法,咁嘅擊球方式顯得極為優雅而有效率,成日俾人當係衡量球技嘅重要指標之一。但係唔係每個優秀嘅羽毛球員都擅長呢一個打法,曾高倨世界排名第一嘅已退休印尼羽毛球名將阿迪,就幾乎無咁做過。
若果來球啱啱好喺胸前,一般都用反手拍回擊;亦可以將身體略為下蹲,以便用正手拍回擊。
基本球路
[編輯]![](https://upload.wikimedia.org/wikipedia/commons/thumb/1/1b/Cops_badminton.svg/250px-Cops_badminton.svg.png)
羽毛球員喺前場區常用嘅基本球路有:
- 放網或搓球
- 勾對角球
- 挑球
- 撲球
喺中場區常用嘅基本球路有:
- 平推球
- 平抽球
喺後場區常用嘅基本球路有:
- 吊球
- 高遠球
- 殺球
- 抽球
喺中、後場區回擊對方殺球嘅基本球路有:
- 挑殺球
- 推擋殺球
比賽戰術
[編輯]常用嘅戰術如下:
單打打法有「壓後場底線」、「打四方波」、「快拉快吊」、「後場下壓」同「守中反攻」。
雙打打法有「快攻壓網」、「前場打點」、「後攻前封」和「抽壓底線」。
羽毛球員嘅體能要求
[編輯]羽毛球係一樣對身體質素要求最高嘅球類運動之一。要去到高嘅競技水平,羽毛球員唔只要有良好嘅身體質素,重要有優異嘅心理質素同堅強嘅意志。
好似馬丁·柯那普嚮1986年尤尼克斯羽毛球年鑑入面咁講:
一個優秀嘅羽毛球員要有馬拉松選手嘅耐力、短跑手嘅速度、跳高運動員嘅彈跳力、標槍擲手嘅臂力、鐵匠嘅腕力、畫家嘅機敏,劍士嘅反應、象棋手嘅注意力、極地研究員嘅堅強、將軍嘅深思熟虑、登山運動員嘅執着,重有藝術家嘅直覺同幻想。亦正因為對一個人有咁多要求,優秀嘅羽毛球員總係鳳毛麟角。
下面將1985年喺加拿大卡爾加里,中國選手韓健對丹麥選手莫滕·弗洛斯特嘅羽毛球大師賽決賽,同同年温布頓網球賽決賽,德國鮑里斯·貝克爾決戰凱文·庫倫做一個比較[5]:
網球:貝克爾 – 庫倫 | 羽毛球:韓健 – 弗洛斯特 | |
---|---|---|
結果 | 6:3, 6:7, 7:6, 6:4 | 14:18, 15:10, 15:8 |
比賽總時間 | 3 個鐘 18 分鐘 | 1 個鐘 16 分鐘 |
實際比賽時間 | 18 分鐘(= 9 %) | 37 分鐘(= 48 %) |
換波次數 | 299 | 146 |
掂波次數 | 1004 | 1972 |
每個換波嘅掂球次數 | 3.4 | 13.5 |
移動路程 | 大概 3.2 公里 | 大概 6.4 公里 |
羽毛球員喺一半嘅時間入面,跑多網球員兩倍路,打波數都幾乎係網球員嘅兩倍。其實係因為好似貝克爾呢啲開波勁嘅球員,只要跑極短嘅距離就可以攞分,令到對身體嘅要求亦相應降低。
羽毛球嘅球速
[編輯]「扣殺」係羽毛球入面最勁、快嘅擊球方式,會令羽毛球跌去對手嘅中場位置。被扣殺嘅羽毛球嘅最高速度會高過其他用拍打嘅球類運動嘅最高球速。要注意嘅係,所謂「最高速率」係指羽毛球啱啱離開球拍之後嘅初速,羽毛球嘅球速跌得好快。
目前羽毛球嘅最快球速紀錄係中國羽毛球雙打選手傅海峰嚮2005年6月3號蘇迪曼盃中創下嘅332公里/小時。而單打比賽入面最快嘅球速就係310公里/小時,由韓國選手李炫一喺2006年世界錦標賽準決賽中對陣中國選手鮑春來嘅時候創下[6],其次係馬來西亞選手李宗偉所創下嘅307公里/小時[7]。反而世界羽聯所記錄嘅最快殺球球速 - 由印尼選手陶菲克所創下嘅305公里/小時,其實只係世界第三快嘅殺球[8]。
國際組織
[編輯]羽球世界總會(簡稱羽球世總,Badminton World Federation,BWF)係一個國際性羽球運動嘅管理組織。呢個組織嘅前身係國際羽球總會(IBF),1934年成立。2006年9月24號,國際羽球總會正式改名做而家嘅羽球世界總會。
組織總部嚮2005年10月1號以前設喺英國,而家已搬去吉隆坡,而家主席係韓國人姜榮中。
重要賽事
[編輯]- 湯姆斯盃:世界男子羽毛球團體錦標賽,1948年開始有。
- 尤伯盃:世界女子羽毛球團體錦標賽,1956年開始有。
- 蘇迪曼盃:世界羽毛球混合團體錦標賽,1989年開始有。
- 世界羽毛球錦標賽:5個單項賽,1983年開始有。
- 奧林匹克運動會羽毛球比賽:嚮1992年嘅巴塞羅拿奧運開始,羽毛球變左正式比賽項目,而家已經有晒全部5個單項。
- 各項國際羽聯重要賽事嘅男女子單打冠軍可參考羽毛球大賽冠軍一覽。
羽毛球名人
[編輯]![](https://upload.wikimedia.org/wikipedia/commons/thumb/3/32/Badminton_Peter_Gade.jpg/220px-Badminton_Peter_Gade.jpg)
騎呢嘢
[編輯]- 喺2024年,香港教育局發佈咗新嘅性教育教材,入面建議話撳住性衝動方法包括「去球場打羽毛球」,呢單嘢楊威國際,連《紐約時報》、英國《泰晤士報》、《每日電訊報》、《獨立報》都有報,甚至印度嘅《新德里電視台》都報埋一份[9]。
參考
[編輯]- ↑ 梁小牧,《羽毛球》,香港珠海出版有限公司,1991年,第11頁
- ↑ 江明宏編譯,《羽毛球訓練技術》,信宏出版社,1992年,第8頁
- ↑ "Battledore and Shuttlecock", The Online Guide to Traditional Games
- ↑ ""The history of Badminton", The University of Southern Mississippi". 原著喺2009年12月16號歸檔. 喺2010年8月23號搵到.
- ↑ Belastungsvergleich bei worldbadminton.com
- ↑ Lee Hyun Il 310kmh smash - YouTube
- ↑ 2006 World Championships - MS R16 - Lee Chong Wei vs Joachim Persson - YouTube
- ↑ Taufik Hidayat fires a 305 km/h jump smash - YouTube
- ↑ 〈倡「打羽毛球」遏止性衝動 公社科教材衝出國際 《紐時》、《泰晤士報》等至少 5 外媒報道|Yahoo〉.
出面網頁
[編輯]Text is available under the CC BY-SA 4.0 license; additional terms may apply.
Images, videos and audio are available under their respective licenses.