無綫新聞對香港非建制派嘅唔公平對待

建議將無綫新聞對香港非建制派嘅唔公平對待改名做無綫電視嘅政治立場偏頗問題。講明理由，撐、反都得。（即搬）

無綫新聞一般被視為親中派媒體，報導嘅觀點偏向北京或香港政府官方嘅聲音。喺處理一啲同香港非建制派有關嘅新聞時，無綫新聞有時會被部分嘅人批評，唔公平咁對待非建制派，反而會畀親中派充足嘅時間解釋佢哋嘅觀點。加上部分無綫新聞嘅高層同親中派嘅關係，喺社會上有一定爭議。喺呢啲問題上，有時無綫新聞都會回應否認。

事件

2015年港大法律學院前院長陳文敏競選副校事件

2015年，香港大學法律學院前院長陳文敏競選副校嗰陣，引起咗坊間一啲討論。而陳文敏本身同民主派關係唔錯，之前又曾經批評全國人大作「行政決定」侵蝕香港嘅司法權同埋高度自治^[1]，一啲親中派媒體亦一直對陳文敏攻擊。之後，時任行政長官梁振英就被報道干預學術自主，介入事件，遊說校委會成員唔好委任陳文敏。但係無綫新聞除咗梁振英嘅公開回應之外，其他相關新聞無綫一律無報導^[2]。

2015年錯誤報導民主、公民黨反對大嶼山新路

喺2015年10月，汲水門大橋因為有船撞橋而封閉，搞到大嶼山有兩個鐘變咗孤島，無綫新聞之後報導重提2002年連接大嶼山同元朗嘅十號幹線方案，錯誤報導民主黨同公民黨反對方案。但當時公民黨未成立，民主黨議員投票贊成，反而係民建聯同自由黨聯手否決。通訊局裁定投訴成立，向無綫同無綫網絡電視出警告。不過，無綫新聞只係低調更正報道，無正式更正聲明或者道歉^[3]。

2016年香港立法會選舉

喺選舉投票日之前，有好幾個民主派候選人宣布退選，希望佢哋嘅支持者集中票源畀其他民主派嘅候選人。不過，無綫新聞就被指為咗幫助親中派選情，特登唔報導呢單新聞^[4]。

香港反送中運動

喺香港反送中運動期間，無綫電視（特別係無綫新聞）對運動採取負面態度，喺新聞同其他節目內容上都偏頗政府，結果引起唔少市民不滿，喺一啲抗議現場，經常發生示威者包圍TVB記者同採訪車嘅情況。有傳媒比較報導篇幅，亦發現無綫畀反送中運動示威者解釋立場嘅機會比起其他媒體為少，甚至喺剪接上嘗試塑造反送中示威人士「先撩者賤自作自受」嘅訊息^[5]。

無綫新聞同親中派嘅關係

無綫新聞同親中派亦被指友好，令一啲人對無綫新聞有所批評^[4]。有啲激進親共派組織，甚至公開稱讚無綫新聞。

曾經喺2015年招攬民建聯前總幹事陸漢德擔任新聞部編輯主任(Managing Editor) 一職，主力負責本地政治新聞嘅審稿工作。事件引起好多人擔心會唔會有進一步嘅政治審查，但無綫當時就否認事件^[2]^[6]^[7]。不過，有現職員工喺接受《立場新聞》訪問嘅時候就話，打死都唔信上層請人冇政治考慮^[8]。前無綫新聞部主播柳俊江就話，無綫咁做，佢哋嘅政治新聞直程唔使睇，又話佢並唔係普通有政治背景嘅人，而係曾經統籌民建聯選舉工程嘅人，根本唔應該請佢^[9]。

另外，喺2016年2月立法會新界東補選，無綫新聞亦得到民建聯嘅協助。雖然選舉管理委員會設立咗實時點票嘅結果，但無綫就反而用民建聯嘅點票數據，引來質疑。當時無綫就話民建聯嘅數據快啲，但呢個說法就亦唔係個個都接納^[10]。

2019年7月16號，激進親共派組織珍惜群組到香港記者協會會址請願，聲稱記協濫權同立場偏頗，與此同時，召集人李璧而又點名又讚揚無綫新聞「走位好」^[11]。