海（Hoi²）係地球（或者一粒行星）表面裝住大量鹹水嘅地形，多數連住大洋，當中鹹水係指鹽嘅濃度高3.5%嘅水－每公升嘅鹹水就有超過35克咁多嘅鹽喺裏面^{[註 1][1]}。海同大洋相比更加細，有陸地去部份或者完全圍住四週。

海覆蓋住地球大約71%嘅面積，而且深度不一：近陸地（地球表面冇俾水覆蓋嘅地方）嘅海好多時都好淺水，得嗰幾米深，但離陸地遠啲嘅海就可以深得好交關，例如位於太平洋西部嘅馬里亞納海溝，某啲地方據探測有成超過10公里咁深－大約係廿棟廣州周大福金融中心咁高^[2]。

生命

海同海邊嘅環境特性往往都會對生物嘅生存同進化造成具體嘅影響。舉個例說明，海洋生物嘅一個出名特點係少兩棲類（學名：Amphibia）－兩棲類嘅例子有青蛙，呢個綱嘅動物其中一個特性係啲皮膚有高嘅滲透性，容易俾水或者鹽等嘅物質通過，而通常係鹽會由鹽多嗰邊擴散過去鹽少嗰邊；噉即係話一旦隻兩棲類浸入鹹水，身體（鹽少嗰邊）就會勁俾海水（鹽多嗰邊）嘅鹽入侵；跟住呢樣嘢就會造成隻兩棲類動物體內鹽嘅濃度高得滯，並且搞到佢哋體內嘅化學過程失衡，最後引致死亡。因為噉，絕大多數嘅兩棲類都頂唔順鹹水^{[註 2]}，而自自然然海洋生物學啲研究對象基本上係冇兩棲類咁滯^[3][4]。由呢個例子可見，海洋嘅環境會對生物造成某啲獨特－第啲環境唔會有－嘅挑戰。

註釋

睇埋

維基同享有多媒體嘅嘢：
海

• 海洋學
• 航海
• 海鮮
• 海怪

攷