Kurtamiš
Куртамыш

Lidnanznam	Flag
Valdkund	Venäma
Eläjiden lugu (2021)	16,401 ristitud
Pind	10 km²
Pämez'	Aleksandr Kučin (sulaku 2019—)
Telefonkod	+7−35 249-xx-xxx
Avtokod	45
Aigvö	UTC+5 (MSK+2)

Kurtamiš (ven.: Куртамыш) om Venäman lidn da lidnankund Kurganan agjan suvipäivlaskmas. Se om Kurtamišan rajonan administrativine keskuz.

Eländpunktan aluz om pandud lidnuseks ühtennimižen jogen randal Isetin agjan kancelärijan käskön mödhe vl 1745. Vodele 1753 saudihe ezmäšt jumalanpertid ümbrištos, phh. Pedroin da Pauloin oiktastuseks, i nimitaškanzihe žilod senno Kurtamiš-jogen mödhe. Jumalanpert' om olmas nügüd'-ki. Vspäi 1756 kätihe žilod makundan keskuseks. 19. voz'sadal 5 jarmankad oleskeli joga vodes. Vn 1956 5. päiväl heinkud žilo sai lidnan statusad.

Kurtamiš šingotase kohenduzmehanižel tegimel i sömtegimištol (sagudtegim, jauhon tehmine).

Lidn sijadase Kurtamiš-jogen randoil (Tobolan hura ližajogi), 110 m ü.m.t. keskmäižel korktusel. Matkad Kurganhasai om 77 km pohjoižpäivnouzmha orhal vai 83 km avtol. Toine lähembaine lidn om Šumih 82 km lodeheze orhal vai 219 km avtotedme.

Kurtamiš om lidnankundan üks'jäine eländpunkt. Lidnankundan pind — 96,71 km².

Vn 2010 Venäman rahvahanlugemižen mödhe eläjiden lugu oli 17 099 ristitud, rajonan viž ühesandest. Kaikiš suremb lidnan ristitišt oli 18..19 tuh. eläjid vll 1989−2003 (19 155 rist. vl 1989).

Kurtamišan maižanduztehnikum^[1] i Kurganan pedagogižen kolledžan filial oma professionaližen opendusen aluzkundoikš.

Edeline lidnan pämez' om Sergei Voroncov (sügüz'ku 2014 — sulaku 2019).

1. ↑ Kurtamišan maižanduztehnikuman sait (kurtamysh-sht.ru).

• Kurtamišan municipaližen ümbrikon oficialine sait (region-kurtamysh.com). (ven.)

Kurtamiš Vikiaitas