Kataisk
Катайск

Lidnanznam
Valdkund	Venäma
Eläjiden lugu (2021)	11,881 ristitud
Pind	24 km²
Pämez'	Sergei Petrovskih (kül'mku 2022—)
Telefonkod	+7−35 251-xx-xxx
Avtokod	45
Aigvö	UTC+5 (MSK+2)

Kataisk (ven.: Ката́йск) om Venäman lidn da lidnankund Kurganan agjan lodehes. Se om Kataiskan rajonan administrativine keskuz.

Eländpunktan aluz om pandud kozakoil vl 1655 kuti Katain lidnuz (ven.: Катайский острог), baškiralaižiden heimoiden karakatajalaižed-ühtištusen (bašk.: Ҡатай) nimen mödhe. Lidnuz kaiči torguindted Tobol'skaspäi Moskvha. Alištui kalaidajiden heimoiden londoile, i vodele 1695 lidnuz oli saudud jo koumanden kerdan. Sid' nimitihe Kataiskai-slabadaks. 19. voz'sadal Kataiskoje-žilo oli villän torguindan järedaks keskuseks. Vll 1911−1913 raudte läbiti žilod, i saudihe stancijad siš. Vn 1944 12. päiväl uhokud žilo sai lidnan statusad Troickoje-žilon, Korablövo-, Odino- i Savino-küliden mülütandanke.

Kataisk šingotase erazvuiččiden pompiden tegimel i maidtegimel.

Lidn sijadase Iset'-jogen hural randal (Tobolan hura ližajogi) Kataik-jogen (ven.: Катайка 22 km pitte) lanktendan sijas, 100 m ü.m.t. keskmäižel korktusel.

Matkad Kurganhasai om 195 km suvipäivnouzmha orhal, 219 km avtol vai raudtedme. Lähembaine lidn om Dalmatovo 25 km päivnouzmha kaikil teil.

Klimat om ven kontinentaline. Tal'vaig om hätkeline. Paneb sadegid 475 mm vodes.

Kataisk om lidnankundan üks'jäižeks eländpunktaks. Lidnankundan pind — 145,5 km².

Edeližed lidnan pämehed (Administracijan pämehed) oma Aleksandr Karnauhov (keväz'ku-reduku 2022), Sabiržan Musalämov (uhoku 2019 — keväz'ku 2022), Valerii Černih (tal'vku 2013 — uhoku 2019). Lidnan Administracii om likvidacijan pordhal vn 2023 semendkuspäi. Lidnan Dum om likvidiruidud vn 2023 kül'mkus, sen likvidacižen laudkundan ezimez' oli Sergei Petrovskih vn 2023 kezakuspäi. Duman jäl'gmäine ezimez' oli Konstantin Pospelov (uhoku 2019 — kezaku 2023), edeline — Sabiržan Musalämov, radoi vn 2019 uhokuhusai.

Vn 2010 Venäman rahvahanlugemižen mödhe lidnan eläjiden lugu oli 14 003 ristitud, rajonan koume videndest, vn 2021 — 11 881 ristitud. Kaik 12 585 eläjad oli lidnas vl 2017. Kaikiš suremb lidnan ristitišt oli 15..16 tuh. eläjid vll 1979−2006 (16 789 rist. vl 1989).

Ortodoksižen hristanuskondan koume jumalanpertid^[1] oma saudud lidnas, niiden kesken Jumalanmaman «Kaikiden gorähižiden ihastuz»-jumalaižen puine pühäpert' om avaitud vl 2010.

Lapsiden opendusen aluzkundad oma kuz' päivkodid, kaks' keskškolad (nomer 1 i 2), ehtal'ne aluzškol, lapsiden da norišton pert', čomamahtoiden škol, sportškol. Kataiskan professionaliž-pedagogine tehnikum^[2] om lidnan professionaližen opendusen aluzkundaks.

• 
  Kataiskan rajonan kodirandantedištandmuzei (2015)
• 
  Jumalanmaman «Kaikiden gorähižiden ihastuz»-jumalaižen pühäpert', vn 2012 nägu
• 
  Kataiskan pomptegimen pätulend vl 2021
• 
  «Lučezar»-kul'turkeskuz (2012)
• 
  Ofispert' (2012)

1. ↑ Kataiskan pühäpertid sobory.ru-saital. (ven.)
2. ↑ Kataiskan professionaliž-pedagogižen tehnikuman sait (кппт.рф). (ven.)

• Lidnan tobmuden aluzkundoiden oficialine sait (katayskgorod.gosuslugi.ru). (ven.)

Kataisk Vikiaitas