William Lassell
Gebore	18 Junie 1799 Bolton, Engeland
Sterf	5 Oktober 1880 Maidenhead, England
Nasionaliteit	Engeland
Beroep	Sterrekundige
Bekend vir	Ontdekking van verskeie mane

William Lassell (1799 - 1880) was 'n Engelse handelaar en sterrekundige. Lassell het verskeie mane in die Sonnestelsel ontdek. Die krater genaamd Lassell op die Maan, 'n krater op Mars, die asteroïde 2636 Lassell en 'n ring van Neptunus is na hom vernoem.

Lassell is op 18 Junie 1799 in Bolton, Lancashire in Engeland gebore en is in Rochdale opgevoed. Na sy pa se dood was hy van 1814 tot 1821 'n vakleerling van 'n handelaar in Liverpool. Daarna het hy 'n fortuin as 'n bierbrouer gemaak, wat hy gebruik het om sy belangstelling in sterrekunde uit te brei.

Hy wen in 1849 die Royal Astronomical Society se goue medalje, en dien van 1870 vir twee jaar as president van die organisasie. Hy is ook in 1849 as 'n genoot (fellow) van die Royal Society aangewys en wen in 1858 hulle Royal-medalje.^[1]

Lassell is op 5 Oktober 1880, op 81-jarige ouderdom in Maidenhead oorlede. Hy het 'n fortuin van £ 80 000 agtergelaat (ongeveer 8,8 miljoen Amerikaanse dollars in vandag se terme). Sy teleskoop is aan die Royal Observatory in Greenwich geskenk.

Op 10 Oktober 1846 ontdek hy Triton, die grootste maan van die planeet Neptunus.

Hy ontdek Huperion, een van die mane van Saturnus, in 1848. Hy het die maan onafhanklik van William Cranch Bond ontdek.

Op 24 Oktober 1851 ontdek hy Umbriël en Ariël, twee mane van die planeet Uranus.