Ariarathes VIII Epifanes (Grieks:Ἀριαράθης Ἐπιφανής) was van 101 v.C tot 96 v.C en weer in 95 v.C. koning van Kappadosië. Hy was die tweede oudste seun van Ariarathes VI en sy vrou, Laodice, en het in 101 v.C. die troon bestyg nadat die Kappadosiese adel in opstand gekom het teen koning Mithridates VI van Pontus en sy agtjarige seun, Ariarathes IX, wat hy op die troon geplaas het.

Mithridates het Ariarathes egter in 96 v.C. uit die koninkryk verdryf en sy seun op die troon teruggeplaas. Hy het aan die Romeinse Republiek voorgegee dat die seun ’n derde seun van Ariarathes VI en Laodice was.

Die Romeine het egter aan die Kappadosiërs hul vryheid gegee en in 95 v.C. gelas dat Ariarathes IX van die troon gesit word. Ná ’n kort periode van direkte regering deur Pontus en ’n kort herstel van Ariarathes VIII se bewind, het die Romeine probeer om die republiek te herstel.

Die Kappadosiërs wou egter ’n koning hê. Ariarathes VIII het intussen ’n natuurlike dood gesterf en met die dood van albei Ariarathes VI se seuns, Ariarathes VII en VIII, was die koninklike familie van Kappadosië uitgesterf. Die Romeine het die Kappadosiërs toe toegelaat om te kies wie hulle wil as koning. Hulle het Ariobarzanes I Philoromaios gekies.

• Hazel, John; Who's Who in the Greek World, "Ariarathes IV", 1999
• Head, Barclay; Historia Numorum, "Cappadocia", 1911
• Justinus; Epitome of Pompeius Trogus, John Selby Watson (vertaler); Londen, 1886
• Smith, William (red.). Dictionary of Greek and Roman Biography and Mythology, "Ariarathes IV" Geargiveer 4 Junie 2011 op Wayback Machine, Boston, 1867

• 

  Hierdie artikel is vertaal vanuit die Engelse Wikipedia