黃宜坳（英文：Wong Yi Au，舊Wong Ye Au），又寫黃宜凹（凹讀坳），係香港一坳，亦係村。佢喺大埔墟同大埔滘之間，喺元洲仔以西一個山腰度，有大埔公路（元洲仔段）可達。

而黃宜坳又分爲上下。上黃宜坳（英文Sheung Wong Yi Au，舊Sheung Wong Ye Au），又寫做上黃宜凹，喺南便，地勢高啲。下黃宜坳（英文：Ha Wong Yi Au，舊Ha Wong Ye Au），又寫下黃宜凹，喺北面，地勢低啲。而坳東一帶，谷到海，舊時唔少係村民嘅地，所以都叫黃宜坳。

村歸翕和鄉，屬大埔鄉事委員會。

黃宜坳喺草山以北，其中一山脊末端。脊喺大埔河同大埔海之間，脊向北近尾有座山，高二百八十幾米。脊再向北行，近𡰪位處有幾個山頭，山頭之間嘅凹位，即係坳，就係黃宜坳。南面，高啲嗰個坳，就叫上黃宜坳，而北面，低啲嗰個，就叫下黃宜坳。坳東對住大埔海，坳西對住大埔河。坳東谷地，係居民嘅地，有幾條涌流入大埔海，之不過家下起得多屋，都變成暗渠，涌流面目全非。黃宜坳東谷底，舊時係岸，臨大埔海，對住元洲仔，同大埔河匯合，之不過，呢帶都填晒海，變成大馬路。

下黃宜坳嘅西北面，係運頭塘，西面係山塘。上黃宜坳嘅西面係荔枝山。

上下兩坳都各自有村，叫上黃宜坳村同下黃宜坳村，而下黃宜坳村比較發達，就咁叫黃宜坳村。兩村都係大清時，英國未租借新界就有，都係陳氏。上下黃宜坳都喺坳嘅東面，對住大埔海。除咗舊村之外，有啲村地賣咗畀地產商起屋，所以呢帶有皇悅居（Marvelous Villa）、雍宜小築（Chateau De Mansion）、雍怡雅苑（Chateau Royale）、御弘居（Riverain Bayside）。

另外大埔公路以東，近火車路有美援新村（C.A.R.E. New Village或者CARE Village），係條漁民村，由美國經援會所建。村民原本都係漁民，喺1960年代中到1970年代，佢哋住嘅船艇，打風打壞咗，所以就搬入村。村有屋約莫百一間，住咗八百人左右，而每間屋約二百到四百平方呎。村由大埔漁民改善生活有限責任合作社負責。村地係香港政府批畀合作社用，按土地牌照方式^[1][2]。

下黃宜坳村北面𡰪𡰪，有間白屋，叫崇德家福軒（Zonta White House），係香港家庭福利會嘅家庭退修中心。

黃宜坳有大埔公路，係出入呢帶嘅主要通道，有啲巴士小巴經呢度。山腳有九廣鐵路（港鐵東鐵綫）嘅火車路，同埋吐露港公路。之不過公路同火車路同民居分隔，車唔會停黃宜坳上落。

而大埔公路入村，有黃宜坳路同雍宜路。

黃宜坳得間中學，叫靈糧堂劉梅軒中學，喺雍宜路盡頭，雍宜雅園側邊。