魚蛋（粵語：jyu⁴ daan²）係廣泛分佈喺中國南部、香港、澳門，同東南亞嘅小食，喺香港特別常見。佢係用魚肉同埋澱粉，撈埋調味料整成。佢多數都係圓碌碌形狀，但係亦都有第二啲樣，好似正立方體咁。香港嘅食肆通常寫佢做魚蛋，普通話就通常叫佢做魚旦。

魚蛋喺斯堪的納維亞都可以揾到。

東方嘅魚蛋製法係將先將魚切絲或壓平。然後再將魚肉一面加鹽一面撈均，直至質地軟滑為止。呢個技巧類似蟹柳嘅製作過程，都係靠咁嚟將魚肉入面本來紏纏一齊嘅蛋白質拉開，令肉質變得有彈性。

斯堪的納維亞嘅魚蛋係用完全壓成肉泥嘅魚，牛奶同薯仔粉混合，再揉成球形整出嚟嘅。用呢個方法整嘅魚蛋質地比較柔軟。

福州嘅魚蛋係魚肉同免治豬肉混合整成。

香港嘅魚蛋始於1950年代嘅流動小販。呢種魚蛋用油炸過，外層金黃色，用好平嘅鯊魚肉製作，爽口彈牙。通常用竹籤串起幾粒賣、亦有啲係用紙杯裝住。小食檔每串 / 每杯有幾粒就唔定，價錢視乎食檔喺邊度（大約 4 至 10 蚊一串 / 杯）。有啲小食檔專賣魚蛋，就好似西方嘅熱狗攤。食嗰時通常會落辣椒醬、咖喱醬、甜醬。一般嘅魚蛋檔有辣味同原味兩款魚蛋畀人揀，辣味魚蛋通常浸喺咖喱汁（叫咖喱魚蛋）或者沙爹汁，而原味嘅魚蛋就會浸喺清湯整熱。

2002年嗰陣有人統計過，香港人每日食 55 噸（即係大約 375 萬粒）魚蛋，即係每年大約 13 億粒，又即係每人每年平均食 196 粒魚蛋^[1]。

台灣嘅魚蛋主要用虱目魚肉整成。虱目魚嘅肉令台灣魚蛋有獨特嘅質感同味道。呢個亦都係虱目魚嘅主要食法。

喺印尼，魚蛋叫「bakso ikan」（印尼文，意思係「魚肉丸」）。印尼嘅「bakso」（肉丸）多數用牛肉整，但間中會有用魚肉整嘅。印尼人偏好將呢啲魚肉丸同豆腐，魚肉烏打同湯一齊上。

魚肉丸喺菲律賓係幾受歡迎嘅地道小食。菲律賓最常見嘅魚蛋叫做「bola-bola」（菲律賓文，意思係「球球」），形狀有啲扁扁地，多數用墨魚或者鱈魚整成，再配甜辣醬或者甜酸醬。

喺泰國美食入面通常將魚肉丸炸或者燒。有時會加泰式咖哩。泰式魚肉丸主要用七星飛刀整。

瑞典嘅「Fiskbullar」同挪威嘅「Fiskeboller」通常係罐裝賣。瑞典人鍾意將魚肉丸同薯蓉或者飯一齊上，再配魚子醬或者其他海鮮醬汁。而挪威人就鍾意將佢哋嘅魚肉丸同薯仔加白汁一齊上，或者加咖哩或蘿蔔條。

• 魚片
• 魚腐
• 魚肉春卷