神經線（粵拼：san4 ging1 sin3），又叫神經，係一束神經細胞嘅軸突，係周邊神經系統其中一部份，負責腦同身體其他地方之間嘅資訊傳遞。

每一條神經都由一層叫做外膜嘅結締組織包住。喺外膜入面，又再有一啲由一層扁嘅細胞組成嘅膜，叫束膜，包住一束束嘅軸突。呢一束束嘅軸突就叫神經束。軸突又叫神經纖維，每條都俾神經內膜包住。神經外膜之內又有血管，幫手提供養份畀需要用好多能量嘅神經細胞。

神經可以通過佢哋傳遞資訊方向嚟分類：

• 傳入神經，又叫感知神經，將各種唔同嘅感官訊號傳入中樞神經系統。
• 傳出神經，又叫動作神經，將控制肌肉、內外分泌腺之類嘅訊號由中樞神經系統傳出去。
• 混合神經，同時有傳出同傳入嘅工能。

神經又可以根據佢哋點連住中樞神經系統嚟分類：

• 腦神經，係直接連接住腦部嘅神經線，通常用羅馬數字一（Ｉ）到十二（ＸＩＩ）嚟代表。
• 脊𩪷神經，連接住脊𩪷。佢哋係用字母同數字組合嚟標示（例如：Ｃ１、Ｔ３），代表住佢哋經過邊一塊脊椎骨出嚟。

神經係週邊神經系統嘅一部份，連接住中樞神經系統（即係腦同脊𩪷）同埋身體各部份，喺佢哋之間傳遞資訊。呢啲訊號係由叫神經脈衝（又叫動作電位或者簡稱脈衝）嘅電化學訊號，經由神經入面一條條嘅軸突嚟傳遞。包圍住軸突嘅髓鞘令到呢啲脈衝可以傳得好快，去到每秒120米。同中樞神經系統唔同，喺神經入面，髓鞘係由施旺氏細胞（Schwann cell）組成，而唔係由稀枝細胞（Oligodendrocyte）生成。

有時神經線會受傷，影響到佢哋嘅運作。除咗撞親之類做成嘅物理創傷之外，工作勞損、例如俗稱打字手嘅腕隧道症候群都係搞到神經線受傷嘅原因。神經線俾嘢壓親，例如附近組織受傷腫咗、脊椎唔啱位、大肚之類嘅原因，可以令到人覺得痛、痺、無力甚至郁唔到。好多時呢啲感覺未必會喺壓親嘅地方，而係離開一段距離嘅地方度。呢種情況叫牽連痛或者位移痛（Referred pain），成因係因為壓親嘅地方影響到傳遞自其他地方嘅神經訊號。

傷到神經線嘅仲有其他情況，包括細菌或者病毒感染、糖尿病、神經線附近血管有問題、某啲神經退化病、多發性神經病變／多發性神經痛同埋一啲免疫系統失調例如吉巴氏綜合症。

多發性硬化症係另一種免疫系統失調，令到佢哋攻擊神經系統，整傷啲神經線嘅病。喺呢個病入面，巨噬細胞會攻擊包住軸突嘅𩪷鞘，減慢甚至阻止神經脈衝嘅傳遞。

癌症嘅腫瘤細胞可以沿住神經線擴散。

通常神經科醫生會用身體檢查嚟診斷神經嘅間題，包括睇病人手腳嘅反射、行路同其他動作嘅姿勢、肌肉強度、體感同觸覺。如果有需要可以進一步做其他檢查，例如神經傳導檢查（nerve conduction study, NCS）同肌電圖（electromyography, EMG）。^[1]

• 神經系統
  • 周邊神經系統
  • 腦
• 神經細胞
• 神經編碼

睇 傾 改 神經系統嘅主要部份
研究神經系統嘅科學包括神經科學、神經心理學同神經內科
基礎	神經細胞（細胞體 · 樹突 · 軸突） 突觸 膠質細胞 灰質同白質 神經線 神經通道 膜電勢 動作電位 神經傳遞素 神經編碼 神經生成
中樞	脊髓 腦膜 腦部 睇埋人腦 後腦（延腦 · 橋腦 · 小腦） 中腦（腦導水管） 邊緣系統 前腦（間腦 · 大腦、大腦皮層同腦葉） 腦樑同側化
周邊	軀體 感覺神經 運動神經 腦神經 脊髓神經 自主 交感神經 副交感神經 腸神經
相關領域	神經科學（認知神經科學 · 運算神經科學） 認知科學 人工智能 心理學 語言學（神經語言學） 精神醫學 經濟學（神經經濟學）
神經系統類