自由民主黨，簡稱自民黨，係日本當今執政黨，自1955年成立開始，一路主宰住日本嘅政治。自民黨除咗喺1993年到1994年、2009年到2012年在野之外，一路長期執政。

正式黨徽好似日本皇室徽章十六菊紋章噉，唔同嘅就係中間有「自民」兩隻字。不過只會喺隆重場合，好似黨代表大會先會出現。自民黨通常用兩個細路同一個太陽嘅標誌示人。

而喺用呢一個標誌之前，自民黨係用一隻卡通版嘅大笨象做標誌。

建黨前

日本喺二戰之後，出現咗3個比較大嘅中間派同右翼政黨：日本進步黨、日本自由黨同日本協同黨。呢三個政黨都係自民黨嘅前身。喺1945到1955年之間，呢三個黨不斷出現分合。直至1955年，屬於吉田茂派系嘅自由黨同鳩山一郎嘅民主黨合併做一個統一日本右翼嘅政黨，對抗社會黨同共產主義，史稱「保守合同」，自由民主黨就係噉成立咗。

建黨後

自民黨自1955年成立以嚟，一路都有壓倒性優勢，直至1993年俾非自民·非共產連立政權以些微席數優勢打低，不過連立政權好快因為內部拗撬而散檔。自民黨用首相個位作為條件，拉攏到幾十年嘅老對手社會黨同新黨先驅重組政府，結果自民黨落台都冇一年就重新執政。

直到2009年，自民黨再次下野，席位更加係創黨以嚟最少。不過民主黨執政時期有唔少失誤，包括兌現唔到要求美國搬出沖繩普天間基地嘅承諾、東日本大震災救災太慢等，其中大地震引發嘅一連串事件，包括福島核災難更加重創民主黨民望。之後自民黨成功喺2012年捲土重來，重新執政。

自民黨喺1955年由自由黨同民主黨合併而成，舊自由黨系統嘅派系叫做保守本流，初時又叫做「吉田學校」；而舊民主黨系統嘅就叫做保守傍流，初時自民黨總共有8個派閥，稱為「八個師團」。依家自民黨重有2個派閥，每個派閥都有一個正式嘅名，但係日本傳媒慣性用每個派閥嘅阿頭嚟稱呼。

除咗正式嘅派系之外，自民黨入面重有一啲比較細嘅議員集團。

一直以嚟，自民黨內部都有人打出「解散派閥」嘅旗號，喺1970年代，福田赳夫就已經提出過，但係當時正值「角福戰爭」時期，田中角榮同福田競爭激烈，就連福田自己本身都領住一個派系（八日會），解散派閥一路都係得個講字。

由2023年尾開始，自民黨受到政治獻金醜聞影響，結果掀起咗派閥嘅解散潮，自民黨內大部分派系都宣佈解散或者解散咗，目前只係得麻生派同茂木派兩個仍然存在。

呢件事令派系喺表面上瓦解，實際上派閥仍然以政策集團嘅形式存在，只係運作慢慢走向地下化。^[1]

• 立憲民主黨

睇 傾 改 日本政黨
符合正式政黨條件嘅組織	執政黨 自由民主黨 · 公明黨 在野黨 立憲民主黨 · 日本維新會 · 日本共產黨 · 國民民主黨 · 令和新選組 · 參政黨 · 社會民主黨 · NHK黨
院內會派	沖繩之風 · 碧水會

 自由民主黨 (日本)係日本楔位文，重未完成，麻煩你幫手補充內容。