岸 信介
日本第56、57任內閣總理大臣
任期 1957年2月25號－1960年7月19號
君主	昭和天皇
前任	石橋湛山
繼任	池田勇人
日本內閣總理大臣（臨時代理）
任期 1957年1月31號－1957年2月25號
總理	石橋湛山
日本防衛廳長官（臨時代理）
任期 1957年1月31號－1957年2月2號
總理	岸信介（兼）
前任	石橋湛山
繼任	小瀧彬（日文：小瀧彬）
日本第86、87任外務大臣
任期 1956年12月23號－1957年7月10號
總理	石橋湛山 岸信介（兼）
前任	石橋湛山
繼任	藤山愛一郎（日文：藤山愛一郎）
大日本帝國國務大臣
任期 1943年10月8號－1944年7月22號
總理	東條英機
前任	新設立
繼任	職位廢除
大日本帝國第24任商工大臣（日文：商工大臣）
任期 1941年10月18號－1943年10月8號
總理	東條英機
前任	左近司政三（日文：左近司政三）
繼任	東條英機
自由民主黨第3任總裁
任期 1957年3月21號－1960年7月14號
前任	石橋湛山
繼任	池田勇人
自由民主黨第1任幹事長
任期 1955年11月15號－1956年12月14號
前任	新設立
繼任	三木武夫
日本眾議院議員
任期 1953年4月20號－1979年9月7號
繼任	吹田愰（日文：吹田愰）
選區	山口縣第2區（日文：山口県第2区 (中選挙区)）
大日本帝國眾議院議員
任期 1942年5月1號－1943年10月8號
選區	山口縣第2區
個人資料
出世	(1896-11-13)1896年11月13號 大日本帝國山口縣吉敷郡山口町（日文：山口町） （即依家山口市）
死	1987年8月7號(1987-08-07)（90歲） 日本東京都新宿區
墓地	日本山口縣田布施町 日本静岡縣駿東郡富士靈園（日文：冨士霊園）
政黨	（翼賛政治會（日文：翼贊政治会）→） （護國同志會（日文：護国同志会）→） （冇派系→） （日本再建連盟（日文：日本再建聯盟）→） （自由黨→） （冇派系→） （日本民主黨→） 自由民主黨
配偶	岸良子（日文：岸良子）（亦係堂細妹）
仔女	岸信和（日文：岸信和）（大仔） 安倍洋子（日文：岸洋子）（大女）
父母	佐藤秀助（老豆） 佐藤茂世（阿媽） 岸信政（外父、養父、大伯）
親屬	佐藤市郎（日文：佐藤市郎）（大佬） 佐藤榮作（細佬） 佐藤寬子（表妹） 佐藤信二（日文：佐藤信二）（侄仔） 安倍晉太郎（女婿） 安倍寬信（日文：安倍寛信）（外孫） 安倍晉三（外孫） 岸信夫（外孫）
母校	東京帝國大學法學部
簽名

岸信介（日文：岸 信介，1896年11月13號—1987年8月7號），舊姓佐藤，日本政治人、官僚，曾經出任自民黨幹事長、商工大臣、外務大臣、內閣總理大臣、自民黨總裁。花名「昭和之妖怪」。

佐藤信介響山口縣吉敷郡山口町八軒家（即依家山口市）出世，籍貫熊毛郡田布施町，係佐藤秀助同茂世兩公婆嘅第五個細路（第二個仔）。老豆佐藤秀助，食製酒業呢行飯，原本叫岸秀助，後嚟做咗佐藤家嘅入贅女婿，因而改姓。

讀過岡山市立內山下小學校、岡山中學校（即依家岡山縣立岡山朝日高等學校），之後轉校到山口中學校（即依家山口縣立山口高等學校）。中三個年過繼畀大伯岸信政，入繼岸家，因而改名叫「岸信介」。

1920年，佢畢業於東京帝國大學法學部。之後佢成為農商務省官僚，出任過山林局、水產局等事務官。

1925年農商務省分拆成商工省同農林省，岸信介揀咗到商工省。佢同當時嘅上司吉野信次起草「重要產業統制法」，由臨時產業合理局第一部長木戶幸一實施。1933年成為商工大臣官房文書課長，兩年後出任工務局長。

自1936年開始，佢先後出任滿洲國實業部總務司司長、產業部次長同埋總務廳次長。在任期間佢實施滿洲產業開發五年計劃，大膽地結合咗統制經濟。佢同當時關東軍參謀長東條英機、滿洲國總務廳長星野直樹、滿鐵總裁松岡洋右、滿洲重工業開發株式會社會長鯰川義介並稱做「滿洲五巨頭」、「弐キ参スケ」。佢哋共同以鐵手腕管治滿州國。

以「花花公子」著稱嘅岸信介，響滿州國呢四年間，除咗改革經濟之外，仲以飲酒、賭博同搞女人出名。佢呢段時間幾乎響其首都新京（即依家嘅長春市）渡過。

1939年10月，岸畀人調返日本，出任商工次官，因為堅持統制經濟政策同工商大臣小林一三發生爭拗、再加上發生企畫院事件而唔撈。

1941年出任東條內閣嘅商工大臣，曾經響昭和天皇嘅對英美宣戰詔書上面聯署，積極處理太平洋戰爭嘅物質同動員。

1942年當選成為眾議員。同年10月，東條兼任商工大臣，岸信介就擔任無所任大臣、商工次官。一個月之後，由於二戰戰局急劇變化，東條將商工省廢除、改為成立軍需省，東條響出任首相嘅同時兼任軍需大臣、陸軍大臣，而岸信介就被調任軍需次官。突如其來嘅「降職」，令到岸信介開始唔妥東條，兩人關係出現裂痕。

1944年塞班島戰役嘅失敗，好多人開始認為日本冇勝算，質疑東條嘅帶領能力，內大臣木戶幸一就密謀恁冧東條內閣。同年7月，東條想改組內閣，岸信介拒絕請辭，話只有成個內閣請辭佢先至唔撈，只有部份重組係唔可以接受。加上其他元老，就好似木戶幸一，都拒絕東條嘅入閣邀請。最終東條被迫響7月18號內閤總請辭。

1945年，岸成立反東條嘅護國同志會。

1945年8月15號，日本宣佈投降，二戰結束，佢就返去鄉下山口縣。因為曾經響二戰期間擔任重要職位，所以響9月15號GHQ就拉咗岸信介，將佢視為甲級戰犯，關佢響東京巢鴨監獄。1946年東條英機等28名前日本官員畀人起訴，但當中並冇岸信介^[1]。

響坐監個陣，佢曾經嘅老師勸佢自殺，但岸信介認為「比起留芳百世，聖戰嘅正當性更應該要留傳萬世」，堅決唔去死。佢又曾經通宵寫詩，畀一個管理笑：「你都就快死啦，仲寫詩？」岸信介心諗：「日本點解會輸畀呢班蠢蛋？」

GHQ調查咗佢好耐，但最終響1948年12月24號，即東條等七人畀人處死之後第二日，岸信介被無罪釋放，條件係要接受公職追放。釋放理由係：岸信介響一次大本營政府聯絡會議上當面反對東條，建議停戰，令到內閣意見不一，間接令到東條內閣倒台。但有指岸信介係應承同美國合作，創造一個「徹底服從美國嘅日本」，先至獲釋；亦有指係一班「American Council on Japan」嘅美國人遊說東京裁判法庭放咗佢，話岸信介嘅政治理念，有助戰後建立一個親美嘅日本政府。

響獲釋後，佢商界嘅老友藤山愛一郎邀請佢出任日東化學嘅監査役，提供大把錢畀佢。1949年12月，佢成立咗一間以營利做目的嘅股份公司「箕山社」，請嚟大批前日本政府官員。佢又做過東洋紙漿（王子製紙前身）會長。

1952年4月，因為三藩市和約，公職追放解除。同月，佢成立以「制定自主憲法」、「確立自主軍備」、「展開自主外交」做口號嘅日本再建聯盟，出任會長。但係呢個黨響1953年嘅選舉輸到底褲都冇埋，黨員希望轉投社會黨但唔成功，岸於是響1月13號宣佈希望加入自由黨，獲得吉田茂同意，最終響3月18號正式入黨。4月出當選做眾議員。後嚟因為反對吉田「輕武裝、同美協調合作」嘅路線而被踢出自由黨。

1954年同鳩山一郎創立日本民主黨，出任幹事長。1955年10月，左派社會黨同右派社會黨正式統一成為日本社會黨（社會黨再統一）、有望上台執政，保守派為咗同社會黨抗衝，於是響同年11月15號達成保守合同，宣佈自由黨同民主黨統一，組成新黨「自由民主黨」。

1956年自民黨第一屆總裁選舉，岸信介以七票之差輸咗畀石橋湛山。同年12月23號，石橋做咗首相，岸信介出任石橋內閣嘅外務大臣，宣佈咗「強化對美外交」、「推進經濟外交」等五大原則。兩個月後，石橋因病唔撈，岸以外務大臣嘅身份臨時代理首相一職。後嚟石橋指名畀岸接任做首相，於是響1957年2月25號，第一次岸內閣以「整轉內閣」嘅形式誕生，岸響出任首相同時兼任外相。

早響1955年8月，時任外相重光葵就提出修改美日舊安保條約，但係畀美國反對，原因之一係驚日本再度搞事。岸信介覺得非常震驚，認為美日舊安保條約對日本唔公平，希望日本攞返真正嘅主權。加上1957年1月嘅吉拉德事件，一位美國駐日士兵槍殺咗日本農婦，但由於美日舊安保條約並冇包括呢種情況，令到岸信介越嚟越想修改，希望日本可以自主外交。

一上任佢就同美國駐日大使道格拉斯·麥克阿瑟二世進行秘密會談，話「日本多數國民都將安保條約視為日本服從美國嘅象徵，加上日本國民本來就唔中意打仗，咁樣只會增加佢哋對條約嘅厭惡」。

岸信介努力緩和同東南亞、南亞各國嘅緊張關係。1957年5月，岸信介先後出訪印度、巴基斯坦、斯里蘭卡、泰國、中華民國，係二戰後第一位訪問亞洲同東南亞地方嘅日本首相。佢嘅目的唔單止係希望重新確立日本嘅國際地位，同時亦同其他國家商討核實驗問題^[2]。

為咗避免重蹈韓戰嘅覆轍，佢強調日美具有特殊關係。1957年6月，佢訪問美國，同時任美國總統艾森豪威爾見面，傾可唔可以改安保條約。之後佢又同國務卿杜勒斯、參謀長聯席會議主席亞瑟·雷德福見面。響6月20號，佢到美國國會發表演講，講嗮共產主義嘅威脅。響第二日嘅記者會，佢話：「日本絕對唔會走共產主義或者中間主義」，從此確立咗日本以後所走嘅親美路線^[3]。呢次出訪，唔單止成立咗專門研究修改《美日安保條約》嘅委員會，另外仲傾點數，美國要響1958年撤走自日本投降之後就駐紮響日本嘅陸軍部隊。

9月，佢改組內閣，提拔生意人、商界嘅老友藤山愛一郎出任外相，畀佢處理中國事務。同月28號，藤山同支持英中建交嘅英外交大臣素雲·勞埃見面。

10月，佢當選成為聯合國安全理事會非常任理事國，同年12月加入聯合國。響呢個時候，佢表明日本以唔擁有核武器做原則，仲反對英國進行核試驗^[4]。佢又出訪咗澳洲、菲律賓、印度等，面對當地嘅反日情緒咁高漲，佢每到一個國家都講聲對唔住，又積極處理戰爭賠償問題。

1958年4月眾議院解散，佢帶領自民黨響呢次選舉贏咗，攞到過半數議席，同年6月改組內閣。另一方面，自民黨響呢次選舉並冇攞到修憲所需要嘅三分之二議席。

當時岸內閣希望修改警察官職務執行法（簡稱警職法），內容主要係擴大差人嘅權限，畀差人冇票都可以拉人。呢個修正案一出就激起國內反彈，社會黨、總評等表示反對，更加出現市民組織嘅反對活動。面對反對呼聲咁高，岸信介被迫撤回修正案。同時之間，佢亦急於成立防諜法（即秘密保護法），將當時嘅防衛廳升格為省，但都係撤回咗^[5]。

1960年1月，岸信介訪美，同艾森豪威爾見面。同月19號，佢響華盛頓同美國簽訂新美日安保條約（Treaty of Mutual Cooperation and Security between the United States and Japan），取代響1951年簽嘅美日舊安保條約。

岸信介為咗修改安保條約可以話係「不惜一切」，但佢亦都激發咗社會黨同自民黨之間嘅鬥爭，為第日發生嘅安保鬥爭埋下伏筆。執政自民黨希望條約可以響國會通過，但係最大在野黨社會黨抵制、要求廢除條約，條約一直通過唔到，令到自民黨好頭痛。

響5月19號嘅國會會議，由朝早開會開到半夜。當時國會外聚集咗多個反安保嘅抗爭團體，其中包括全學連。由於社會黨盡全力抵制條約，自民黨一直冇辦法同社會黨達成共識，於是自民黨就利用人頭多呢個優勢，直接將社會黨議員趕出議場，強行通過新安保條約。5月20號凌晨12點幾，新安保條約響社會黨被趕出場嘅情況下通過。由於日本法律規定，對外簽署嘅條約，只要眾議院通過，就算參議院未審，30日後亦都自動有法律效力。

自民黨內部部份人對於「強行通過」嘅做法非常不滿，所以揀咗缺席或者棄權，其中有石橋湛山、河野一郎、松村謙三、三木武夫。岸嘅做法亦徹底激嬲市民同響一直響國會外嘅抗爭團體，認為岸信介係破壞緊民主，示威大隊漏夜守響首相官邸之前，「反安保」、「打底岸內閣」嘅口號不斷。

岸信介意識到事情嚴重，認為單靠差人嘅能力係唔可能震壓到呢場示威活動，所以佢搵嚟黑社會成員兒玉譽士夫，而錦政會會長稻川角二、住吉會會長磧上義光、關東尾津組組長尾津喜之助（成班都係暴力團，即中文嘅黑幫）都同意出面幫手；跟住岸又拉埋新日本協議會、全日本愛國者團體會議、日本郷友會（即係退役軍人會，成員都係二戰時嘅軍人）。佢哋一致同意，要盡力保障艾森豪威爾響訪問日本嗰陣嘅安全。據傳日本政府仲將直升機、貨車、食物等物資畀嗮班黑社會人士。

因為日本政府強硬嘅姿態同處理手法，加上反美意識濃，令到示威越嚟越犀利，響6月10號嘅示威人數高達五百八十萬人。響同日，白宮發言人占士·哈加提（James Hagerty）到達日本，為艾森豪威爾訪日做準備。當哈加提一到東京國際機場就畀示威者包圍，出唔到去，最後要由直升機護送離開。面對咁大型嘅示威活動，多位前首相都勸岸信介辭職走人。

6月15號，示威大隊響國會議事堂外聚集，在場嘅黑社會人士聯同差人出手打佢哋、仲出動埋「機動隊」攻擊示威者，大批示威者受傷，其中東京大學學生領袖樺美智子畀差人亂棍打死（雖然警方話佢係跌死）。響6月15號至18號呢三日期間，30萬左右嘅市民出現響東京街頭，高舉「為樺美智子報仇」嘅標語。岸信介要求防衛廳長官赤城宗德以「治安出動」為理由出動自衛隊，畀赤城以「唔能夠命令自衛隊傷害同胞」而拒絕。6月19日，安保條約最終因為過咗三十日而自然成立，自民黨鬆咗一口氣。6月23號，岸信介話要為呢次「動亂」埋單，宣佈將會辭職。

7月14號，岸信介參加自民黨新任總裁、即佢點名嘅首相接班人池田勇人嘅招待會嗰陣，畀右翼團體「大化會」成員荒牧退助刺傷。第二日，岸信介正式唔撈，臨走前佢話：「歷史會判斷我嘅所作所為。」

響唔撈首相之後，佢搬到靜岡縣御殿場市住。因為佢響政、商界人脈好廣，所以佢依然響政界保持住影響力，做咗日本保守派領袖之一。

1963年，佢嘅女婿安倍晉太郎響參選眾議員嗰陣失敗。岸信介於是同細佬佐藤榮作拜訪當時係周東英維後援會會長嘅藤本萬次郎，希望佢擔任安倍晉太郎嘅後援會會長，藤本最後應承咗。響得到藤本同外父嘅支持下，安倍響1967年當選成為眾議員。

響1968年，佢出任皇學館大學校長，而且做到佢響1987年死為止。

1969年，佢嘅親信今松治朗希望秘書森喜朗繼承今松嘅地盤，岸信介宣佈支持森喜朗，令到森喜朗成功當選。

原先嘅岸信介派「十日會」響1962年開始重新形成以福田赳夫做中心嘅「黨風刷新聯盟」，所以岸信介亦視福田係自己嘅接班人，好希望福田可以做首相，更加響角福戰爭入面以福田嘅政治監護人身份全力支持佢。

1979年宣佈唔撈眾議員兼退出政壇。

1987年8月7號，岸信介響東京醫科大學醫院過身，虛齡92歲（實際上係90歳）。之後葬響鄉下山口縣田布施町，同埋靜岡縣駿東郡小山町富士靈園。

岸信介主張「對美自主外交」，希望日本唔再有戰敗國呢個地位。任內佢強化同美國嘅關係。

美國CIA承認釋放佢係因為佢可以幫美國打壓日本嘅左派勢力，加上佢反共、親美嘅政治傾向，認為佢係「創造一個服從美國嘅日本」嘅最佳人選。

岸信介同中華民國前總統蔣中正關係密切，一直支持中華民國反攻大陸。1954年岸秘密成立反共聯盟，響1957年6月、即出任首相三個月之後就訪問台灣，係戰後第一位訪問台灣嘅日本首相；佢仲同蔣中正見面，組織咗日華合作委員會。而岸響落台後依然成日去台灣，同台灣政界人士見面。響蔣中正死後，佢響東京成立「蔣公遺德顯彰會」，唔單止響蔣嘅畫像前舉起酒杯祝「中日兩國友誼永固」，仲遊走日本各地、豎立好多蔣中正石碑。

作家古澤襄話，岸信介只要一個名片就可以同蔣中正、蔣經國兩個人見面。

不過，岸信介並唔係完全支持老蔣。對於引唔引渡響日本境內反老蔣、支持台灣獨立嘅人士返台灣，佢響呢方面有住巨大影響力，唔會隨便就將佢哋引渡。

民進黨創黨成員、美麗島事件重要人物之一黃信介，原本叫黃金龍，因為仰慕岸信介而改名叫黃信介。

岸信介嘅前兩任首相鳩山一郎、石橋湛山，係幫中國嘅。鳩山希望同周恩來結盟；石橋就支持中日建交。但係岸信介上台後，由於佢親美，於是就反中，承認台灣係正統，令到中日關係變差。佢亦對自民黨內部形成重大影響，從此自民黨就走親美路線。

岸信介響唔撈首相後，致力於日韓關係嘅恢復。作為曾經嘅滿洲國官員，響當年認識前滿洲國軍、前韓國總統朴正熙，岸信介、朴正熙同椎名悅三郎、兒玉譽士夫、丁一權等人形成「滿洲人脈」，對日本保守政營同之後嘅韓國獨裁時期有住好大影響。響日韓恢復建交後，佢哋建立咗「日韓癒着」嘅政治蜜月關係。

阿太佐藤信寛係江戶時代嘅長州藩藩士，佐藤家第十代當主。阿公佐藤信彥係一位優秀嘅漢學家。老豆佐藤秀助，本名岸秀助，岸信祐三仔，做咗佐藤家嘅入贅女婿。阿媽佐藤茂世，係佐藤信彥嘅大女。而岸嘅養父係岸信政，即佢嘅大伯兼外父，係士族。

岸信介有一個大佬佐藤市郎，係一位軍人，軍銜係中將；而細佬佐藤榮作亦係政治人、前首相。

1919年，佢同堂細妹岸良子（養父、伯父岸信政個女）結婚。兩個人有一對仔女：阿仔岸信和同阿女岸洋子。

• 大仔：岸信和
  • 新抱：岸仲子（田邊讓個女，後嚟同岸信和離婚）
• 大女：岸洋子
  • 女婿：安倍晉太郎（國會議員安倍寬個仔）
    • 外孫：安倍寬信
    • 外孫：安倍晉三
    • 外孫：岸信夫