新石器時代（粵拼：san1 sek6 hei3 si4 doi6） （英文：Neolithic或者英文：New Stone Age）喺考古學上係石器時代嘅最後一個階段。以磨製石器為主，大概喺1萬年前開始，結束時間距離依家有2000幾至5000幾年不等。

就喺呢個時代，人類開始從事農業同埋畜牧，將植物嘅果實加以栽種，並將野生動物馴服咗攞嚟食。人類唔再剩係依賴大自然提供食物，因此食物來源變得穩定。同時農業同畜牧嘅經營亦令人類由逐水草而居變為定居落嚟，慳返更多時間同精力，而人類亦已經能夠製作陶器、紡織。喺咁嘅基礎上，人類生活得到更進一步改善，開始關注文化事業嘅發展，令人類開始出現文明。喺中國，呢個時代出現咗仰韶文化、河姆渡文化同埋細石器文化等文明。

喺新石器時代完咗之後，人類開始進入青銅器時代。