平話係一種廣西嘅主要語言，廣西以「官平壯白客」五種語言為主，官即係官話，平就係「平話」，壯即係壯語，白即係白話，客即係客家話。而平話就係最通行^[出典？]嘅一種。

廣西平話分佈喺古官道（而家嘅鐵路線）兩邊嘅農村地區，平話區由靈川、南去到憑祥、西去到百色、東去到靈山，有超過200萬人使緊^[1]。平話分兩片：桂南平話（柳州以下）同桂北平話（鹿寨以上）。由於桂南平話同週邊啲粵語方言（勾漏片、欽廉片等等）好似，所以平話、特別係桂南平話一直都歸入粵語^[2]，不過實際上佢有自己獨特性，所以學術界都拗緊係咪分出嚟好啲。不過學術界對平話，同湘南土話、粵北土話一樣，都係近年先發現，相關嘅研究都重係起步階段。

平話個平，係同儂智高起義有關，根據《宋史》講，話說皇祐五年（西元1053年）儂智高作反，畀狄青南征平定，因為係平定南部，所以大宋就叫隊軍將做「平南軍」，平南軍之後又留喺廣西駐守，咁佢哋駐守個地方就叫咗做「平南」，而呢個地方用嘅語言，就叫「平話」。平南軍好多人原籍山東，佢哋喺廣西落咗腳之後，原本講嘅山東話溝咗當地嘅粵語^[出典？]，慢慢就演變成平話。