底棲，生物住喺海底，生物尤其講動物植物，故此成羣叫底棲生物，或稱海底生物。淡水生物學，亦借用推至湖底同河底甚至涌底。底除咗指底上面之外，亦包底下面沉積物，有啲生物會鑽入沙石下。底棲範圍好大，由近岸嘅潮水帶，落到大陸架，再落到深淵，各處所受水壓差異甚大。生態學而言，底棲所在嘅環境，叫底棲帶。

深海底棲，大多只能適應深海水壓，浮上面淺層就會死。海水會吸收日光，以致深水海底會非常陰暗，至深者不見天日，故此生物以死屍維持成個底棲生態。

底棲生物而言，分大中細。一毫米以上叫大，十分一毫米以下叫細，兩者之間叫中。一般講底棲，都以大而言，如多毛綱嘅蟲，雙殼綱嘅蜆蚌蠔，軟甲綱嘅蝦蟹，棘皮動物門之下嘅海星、海膽、海參之類，渦蟲綱嘅蟲，重有海葵、珊瑚、海綿、海鞘等等，種類繁多。大底棲唔少會食啲中細底棲，亦有啲會食有機物碎片，如生物碎屑。日光可達嘅淺水有藻類可食。

中底棲有種種微蟲，歸綫蟲動物門，歸有孔蟲門，歸緩步動物門，歸腹毛動物門。另外重有啲歸節肢動物門、如此等等。

細底棲有細菌、硅藻、纖毛蟲、變形蟲、鞭毛蟲等。

英文底棲叫Benthos，取名自希臘文 βένθος ，意謂海之深。形容轉為benthic，故此海底生物又寫為benthic organism同benthic biota，前者為生物通稱，後者為生物整體。

維基同享有多媒體嘅嘢：
底棲