天下制裁集氣大會情況

天下制裁集氣大會係2020年1月12號下晝一次反逃犯條例修訂集會，喺中環愛丁堡廣場搞。呢次集會由「民間集會團隊」搞，主題係爭取盡快落實政改，如果唔係就會呼籲國際社會制裁香港，同時為下個禮拜原定嘅大遊行造勢。發言人士亦解釋自反修例運動開始以嚟，海外香港人以唔同方式爭取外國同聯合國支持，去令外國知呢場運動重未完。^[1]

主辦單位估計有3.6萬人參加，警方就話高峰期有3,000人。^[2][3]

集會以「立即民主政改，否則天下制裁」做主題，並希望政府快啲回應「實現真普選」訴求，事前亦攞到警方不反對通知書。^[4][5]集會申請人劉頴匡強調，特區政府要喺呢一年實施政改，喺呢年立法會選舉入面實現無功能組別同無政治篩選嘅選舉，唔係就會呼籲國際社會對香港作出制裁。^[1][3]大會話歡迎唔同政治光譜人士參與，重話「不捉鬼」、「不割席」。^[5]

下晝3點幾，已經有一批市民去到現場，有啲人揸住旗幟，亦有人舉起美國國旗同英國國旗。其後，參與者亦即場唱反修例歌曲。喺中環有好多防暴警員把守，仲時不時截查着黑衫嘅市民。^[2]

集會有嚟自加拿大、美國、澳洲同法國等地嘅抗爭者發言，包括外國留學生同埋移咗民嘅港人。佢哋話自反修例運動開始以嚟，一直喺外地透過遊說國會議員、喺大學搞學術交流、搞遊行集會、整連儂牆等唔同方法，去爭取支持。^[1]同場有中國大陸嘅學生話如果選擇沉默，就會冇嗮嗰刻擁有嘅一切。^[2]

香港眾志成員黃奕武話，曾經向歐洲人提出消費嗰時應該考慮中國貨嘅生產過程有冇良心，又話德國同中國訂立嘅貿易條例有需要改變。^[1]香港眾志秘書長黃之鋒同埋青年新政召集人梁頌恆都以台灣已經達致一人一票民主選舉做例子，期望香港人最終都可以選出屬於自己嘅特首同立法會。^[2][3]

劉頴匡批評香港政府同中共對香港人爭取民主「冇啲同情，反而幸災樂禍，落井下石」，重話佢哋一定會有報應。佢又話嚟緊會繼續爭取各國通過香港人權法案，等國際社會繼續留意香港，懲罰獨裁者。^[2]

• 澳洲港人組織NSW Hongkongers事前為活動拍咗段片，呼籲市民參加。^[6]

夜晚大概6點集會完之後，防暴警察就喺中環同埋金鐘近英國駐港總領事館一帶戒備，有多人被截查，亦有人被帶上警車。^[3]

1. ↑ ^{1.0 1.1 1.2 1.3} 〈香港舉行"天下制裁集氣大會"告訴全球抗爭運動未了〉. 《RFI - 法國國際廣播電台》 (繁體中文). 2020-01-13. 原著喺2022-01-29歸檔. 喺2020-01-17搵到.
2. ↑ ^{2.0 2.1 2.2 2.3 2.4} 〈逾3.6萬人參與「天下制裁集氣大會」 內地生：如果沉默，就會失去擁有的一切 | 獨媒報導〉. 《香港獨立媒體網》. 原著喺2020-01-16歸檔. 喺2020-01-17搵到.
3. ↑ ^{3.0 3.1 3.2 3.3} 〈逾 3 萬人參與「天下制裁集氣大會」集會 大批防暴警截查 帶走至少兩人 | 立場報道 | 立場新聞〉. 《立場新聞 Stand News》 (英文). 原著喺2021-07-07歸檔. 喺2020-01-17搵到.
4. ↑ 吳倬安 (2020-01-10). 〈【逃犯條例】民間團隊周日發起集會促政改 獲警發不反對通知書〉. 《香港01》 (香港中文). 原著喺2021-08-03歸檔. 喺2020-01-17搵到.
5. ↑ ^{5.0 5.1} 〈周日中環「天下制裁」集會獲不反對通知書 (17:46) - 20200110 - 港聞〉. 《明報新聞網 - 即時新聞 instant news》 (繁體中文). 原著喺2020-01-11歸檔. 喺2020-01-17搵到.
6. ↑ 《這是 NSW HongKongers為「1.12天下制裁集氣大會」所製作嘅影片。... - 民間集會團隊 Hong Kong Civil Assembly Team》 (簡體中文), 喺2020-01-17搵到