黃之鋒 Joshua Wong Chi-fung
2019年10月的黃之鋒
香港眾志秘書長
任期 2016年4月10號－2020年6月30號
副職	周庭 → 郭熙堯
主席	羅冠聰 → 林朗彥
繼任	政黨解散
學民思潮召集人
任期 2011年5月29號－2016年3月20號
前任	林朗彥
繼任	組織解散
個人資料
出世	(1996-10-13) 1996年10月13號（27歲）  英屬香港
國籍	中國（香港）
政黨	無黨籍
其他政黨	學民思潮（2011－2016） 香港眾志（2016－2020）
父母	父：黃偉明[1] 母：吳秋媚[2][3]
居住地	香港
母校	救恩學校 滙基書院（東九龍） 香港公開大學
宗教信仰	基督新教[4]
學歷 救恩學校 滙基書院（東九龍） 香港公開大學政治及公共行政學榮譽社會科學學士
經歷 德育及國民教育科風波 雨傘運動 重奪「公民廣場」行動 旺角清場及驅散行動 2019年反對逃犯條例修訂草案圍堵行動

黃之鋒（Joshua Wong，1996年10月13號—），人稱「G Phone」、「河童」，係前香港學生組織學民思潮召集人，係香港眾志創黨成員、香港公開大學社會科學榮譽學士班（政治及公共行政）學生、香港監犯。

黃之鋒響2012年曾經積極組織反德育及國民教育科活動（反國教運動），最後逼使政府撤回強制推行課程嘅決定。

到2014年9月，黃之鋒有份組織中學生罷課，反對人大對香港政改嘅框架限制，響添馬艦政府總部抗議時同其他人突破防線入咗政府總部東翼前地（「公民廣場」），結果畀警方拉咗，令好多人到場聲援，衝擊警方防線，於是警方動用胡椒噴霧同催淚彈驅趕，結果就令到重更加多人走出嚟抗議，引發咗雨遮革命。

10月頭，美國《時代雜誌》亞洲版將黃之鋒放上封面，標題係「The Face of Protest」（抗爭嘅面孔）^[5]。美國《紐約太陽報》亦發表社論話佢應該獲頒諾貝爾和平獎，表揚佢幫香港年輕一代爭取民主自由^[6]。

2019年，黃之鋒放監之後，積極參與反送中運動，同時宣布參選第6屆香港區議會選舉嘅南區海怡西選區，雖然佢提名期第一日（10月4號）報名，但到舉行抽籤候選人號碼嘅日子（10月24號）都依然未被確認或者取消參選資格，要押後抽籤，去到10月29號，當局正式取消咗佢嘅參選資格，係呢屆區選唯一因政治立場而被取消資格嘅參選人^[7]。

2020年6月30號，因為香港國家安全法通過，黃之鋒、周庭、羅冠聰同敖卓軒都分別喺Facebook宣佈退出香港眾志，香港眾志亦都需要摺埋。^[8]

黃之鋒曾經多次引述Google發畀佢嘅警告表示，自己嘅Gmail戶口受到某啲政府支援嘅黑客攻擊，嘗試竊取密碼^[9]。

喺2019年10月，網上流傳一單流料話黃之鋒，以二千萬購入南區豪宅貝沙灣分層戶，當中指明係貝沙灣南灣六座中高層B室單位，買賣由美聯物業促成。黃之鋒否認事件，美聯物業之後回應話佢哋無幫黃之鋒做過任何買賣，《星島日報》記者去土地註冊處做查冊亦未見嗰個單位易手^[10]。

不過，有啲激進親中派嘅人，仍然攞呢單新聞嚟做文章。例如喺2020年香港立法會選舉民主派初選嘅投票日個陣，黃之鋒喺太古康怡廣場外為袁嘉蔚拉票嘅時候，石房有忽然現身騷擾佢哋嘅拉票活動，用電話拍攝佢哋，又指罵黃之鋒係「漢奸走狗」，用呢單新聞老屈佢。擾攘約10分鐘後，在場好多人指罵石房有，結果石房有自行離開現場^[11]。

2021年5月6號，佢同袁嘉蔚、岑敖暉、梁凱晴承認喺2020年維園六四燭光晚會入面參與非法集結罪，佢被判坐花廳10個月。