勝利日，係納粹德國喺1945年5月8號對蘇聯正式簽訂投降書，宣布喺第二次世界大戰（響蘇聯叫做偉大衛國戰爭）無條件投降嘅紀念日^[1]。 投降書生效嗰日，歐洲中部時間係5月8號，而莫斯科時間係5月9號，因此美國同西歐國家將勝利日定於每年嘅5月8號，俄羅斯同東歐國家就定於每年嘅5月9號^[2][3]。

每年嘅呢日，歐洲各地，尤其是喺二戰中勝利或者曾經受納粹德國佔領同襲擊嘅國家，都會以不同嘅方式紀念第二次世界大戰歐洲戰場嘅結束^[4]。

1945年6月24號，莫斯科舉行咗勝利大遊行；隨後嘅蘇聯時期，成個蘇聯同東歐各國都會舉行勝利日嘅慶祝活動，1963年烏克蘭蘇維埃社會主義共和國同1965年俄羅斯蘇維埃聯邦社會主義共和國更加宣布嗰日係公眾假期。喺蘇聯嘅電影、文學、教科書、藝術同大眾傳媒中，衛國戰爭同投降儀式係一個非常重要嘅題材，慶祝儀式逐漸發展，有會議、講座、酒會、煙花表演等等^[5][6]。

俄羅斯總統普京上台之後，佢為咗凝聚民族自豪感，積極推動發展勝利日同紀念活動。2005年勝利日60周年嘅紀念活動係蘇聯解體之後俄羅斯舉行最盛大嘅慶典^[7][6]。

• 亞美尼亞：自1946年起定5月9號做勝利紀念日。
• 阿塞拜疆：自1946年起定5月9號做勝利紀念日。
• 白俄羅斯：自1946年起定5月9號做勝利紀念日，而且係公眾假期。
• 波蘭：自1946年起定5月9號做勝利紀念日。
• 波斯尼亞：自1946年起定5月9號做勝利紀念日，而且係公眾假期^[8]。
• 格魯吉亞：自1946年起定5月9號做勝利紀念日。
• 德國：官方無認定5月9號做勝利日，但係喺前東德地區一直有慶祝活動。
• 以色列：自2000年起定5月9號做勝利紀念日，但係之前一直有慶祝活動。
• 哈薩克：自1946年起定5月9號做勝利紀念日，而且係公眾假期。
• 吉爾吉斯：自1946年起定5月9號做勝利紀念日。
• 摩爾多瓦：自1951年起定5月9號做勝利紀念日。
• 黑山：定5月9號做反法西斯勝利紀念日，而且係公眾假期。
• 俄羅斯：自1946年起定5月9號做勝利紀念日，而且係公眾假期。如果嗰日係周末，隨後嘅星期一都放假。
• 塞爾維亞：自1946年起定5月9號做勝利紀念日。
• 塔吉克：自1946年起定5月9號做勝利紀念日。
• 土庫曼：自1946年起定5月9號做勝利紀念日。
• 烏克蘭：自1946年起定5月9號做勝利紀念日，而且係公眾假期。同俄羅斯一樣，嗰日係周末，隨後嘅星期一都放假。不過，喺2014年Euromaidan運動同其後嘅克里米亞危機後，烏克蘭跟隨西歐國家喺5月嘅8至9號慶祝勝利日^{[9] [10]}。
• 英國：每年5月9號喺帝國戰爭博物館貝爾法斯特號館慶祝勝利日^[11]。
• 烏茲別克：1946年至1988年間定5月9日做勝利紀念日。