音素（粵拼：jam1 sou3；phoneme，英文名可以做粵拼：fung1 nim4），又叫音位，係音韻學術語，解做某特定語言入面可以有意義咁細分而分得最細嘅聲音單位，標音素嘅標音叫做寛式標音（phonemic transcription），會用一對斜線（/ /）括住。

音素嘅實際發音叫單音；喺一個語言入面，會有啲單音，如果用咗第個單音，唔會造成語義上嘅差別，爾啲喺嗰隻話聽落冇分別嘅單音叫同位音（allophones），所有同位音構成嘅集就係音素，另外有啲學者將音素理解做某個單音嘅理想發音，但係唔係個個都咁恁^[1]:78–79。

例如，喺日文，｢が｣（ga）開頭嘅子音 g 可以讀 [g]（gaa1），亦都可以讀 [ŋ]（ngaa1），喺母音之前，單音 [g] 同單音 [ŋ] 嘅分別喺日文並冇意義，所以喺日文係同一個音素，可以用 /g/ 代表。

音素同語音嘅分別可以用來簡化某種特定語言嘅標音系統，粵語嘅黃錫凌式音標就係一個例字。

唔同語言喺音素上可以好唔同：例如廿一世紀初嘅英文有分 [l]（例如 lice）同 [r]（例如 rice）呢兩種聲，而廿一世紀初嘅日本話就冇噉嘅區分，淨係得 [ɽ]（有少少似 [l] 又有少少似 [r]）噉嘅音素，搞到以日本話做母語嘅人學英文嗰陣成日都分唔清 [l] 同 [r] 呢兩隻聲^[2]。事實係語言之間喺音素上嘅差異係學語言嘅一大障礙－啲人學語言嗰陣成日都會遇到一種情況，就係有啲語音係 L2 會分但 L1 唔會分嘅（嗰兩隻語音喺 L1 裏面屬同一隻音素），搞到學習者分唔到好多 L2 會分嘅字詞。

呢隻片假名寫嘅係日本話音節 ra，讀音 [ɾa] ( 聽)。有人指日文入面 r 寫嗰個音明顯唔似英文 r 寫嗰個，但又唔見得完美對應英文 l 個音[3]。

中和（neutralization）指緊嘅，係話兩段原則上音素唔同嘅音節，因為語流音變嘅緣故而變到冇咗差異。一對有差異嘅音素，可能喺某啲環境下會冇咗差異。

語音組合（phonotactics）係講緊一隻語言對於「啲音位可以點樣組合」所作出嘅限制^[4][5]：是但搵一隻語言嚟睇，嗰隻語言實會有若干個音位，不過啲音位嘅組合並唔係任意點擺都得嘅，淨係得一部份嘅音位組合係「可以接受」。舉具體例子說明，用國際音標標示語音：

• 廿一世紀初嘅粵語：粵語可以有 /s/（例：些 · /sɛ:˥/）同 /m/（例：咩 · /mɛ:˥/）呢啲輔音，但係粵語嘅語音組合唔容許 /sm/ 噉嘅開頭輔音，所以如果一個人讀出 /smɔːl/ 噉嘅音節，聽者可以肯定佢唔係講緊粵語；
• 廿一世紀初嘅英文^{[註 1]}：同粵語比起嚟，英文比較多複輔音，可以容許 /sl/（例如 slow · /sləʊ/，慢噉解）以及 /bl/（例如 blaze · /bleɪz/，火焰噉解）等嘅開頭輔音組合，但係 /bn/ 並唔係英文語音組合容許嘅輔音組合—冇任何英文字詞嘅音節會有 /bn/ 噉嘅開頭輔音^[6]:1.2。

• 混合詞
• 形態解析
• 理論語言學
• 詞幹
• 詞綴
• 語素
• 學語言
• 最細對立體

• 浮動音
• 希臘語詞素
• 詞形學