孙权（182年7月5号－252年5月21号），字仲谋，吴郡富春（㬮朝浙江富阳）人，三国东吴开国君主，尊号大帝。十九岁辰光阿哥孙策遇刺身亡，渠就掌权成为一方诸侯。222年称吴王，建立吴国；229年称帝。统治江东地区长达五十两年，是三国时代统治者里向辰光顶长个。

孙权籍贯吴郡富春，养拉东汉光和五年。渠出生个家族是东汉阿末阶段冒出个富阳孙氏。渠场阿爸孙坚搭阿哥孙策，来拉东汉末年个局面当中，建立孙家个军阀势力，外加慢慢然担渠自个故乡吴越扩充到自个控制范围里向。建安五年（200年），孙策死脱，十八岁个孙权即位，成为江东事实丄个统治者。

建安十三年（208年），孙权面对吞脱荆州个曹操，拣择搭流窜军头刘备结盟，让渠自个大将周瑜担任大都督，赤壁之战击破北方军队，奠定三国鼎立局面。之后，孙权担首都迁到建业（㬮朝南京）。居个也是南京正式建立大城市个开始。建安廿四年，孙权派吴越民族英雄吕蒙，击败赖拉荆州个山西人关羽，吞併荆楚，从此把牢东南全境，领土大险。毛一年后，渠麾下另一位吴越豪杰陆逊貤在夷陵之战灭著刘备个军队，从此，东吴疆域稳固。

公元222年，魏国册封孙权当吴王，孙吴事实独立，並开始使用自个年号黄武。七年之后，孙权正式称帝独立，年号改成功黄龙。孙权称帝后，执行搭蜀汉接近，拉拢蛮夷，对付魏国个策略，让魏国弗好南侵。同时，为扩大渠自个直辖编户齐民，渠也妆起剿抚山越个策略。同时，派人到海外捉百越人当渠自个人力，黄龙两年（公元230年），渠个臣子卫温、诸葛直便走臺湾，捉著交关百越人当奴隶。

孙权寿命长险，活著七十几岁，然也造成渠自来拉继承人问题丄有反覆，引发臣子内斗，朝政混乱。太元元年，孙权死拉建业，享年六十九岁。渠在位三十年，谥号大帝，庙号太祖。坟头来拉南京老城东面梅花山上向。

孙权确立对江东实际统治个同时，北许个曹操率领大军南落，吴越人来拉江东个存亡受到威胁。孙权手下个大将周瑜来拉赤壁担曹操个主力部队灭脱，彻底让曹操统一帝国个幻想破灭，保存著吴越独立性，为之后江东个发展奠定著基础，影响邪气深远。

孙权对吴越个贡献，搭渠自个人格魅力，让渠受著交关好评，司马光赞许渠“大帝承父兄之烈，师友忠贤，以成前志，赤壁之役，决策定虑，以摧大敌，非明而有勇能如是乎？奄有荆扬，薄于南海，传祚累世，宜矣”。却情，渠自个一眼缺陷，也畀后人直言弗讳然指出，《三国志》个作者陈寿就讲渠晚年反覆无常，埋落祸根。^[1]

阿爷

• 孙锺 孙坚拉爷

爷孃

• 孙坚 爷，孙权称帝后追谥武烈皇帝
• 吴太夫人 孃，孙权称帝后追谥武烈皇后

兄弟

• 孙策 长兄，东吴奠基者，孙权称帝后追谥长沙桓王
• 孙翊 三弟，丹杨太守，性格骁悍果烈，有孙策之风
• 孙匡 四弟，孙策让出孙坚之乌程侯爵位畀渠承袭，早逝
• 孙朗 五弟（庶），因违反军令烧毁自家军用而受禁锢

姊妹

• 孙氏 阿姐，嫁畀曲阿人弘咨
• 孙氏 阿姐，嫁畀陈氏

• 孙夫人 阿妹，嫁畀刘备，《三国演义》讴孙仁，《甘露寺》讴孙尚香

妻妾（有记录个十位）

• 谢夫人，会稽名士谢煚之女，谢承之姐。
• 徐夫人，孙登之养母。
• 步夫人，搭丞相步骘同宗，生孙鲁班、孙鲁育二女。
• 王夫人，谥号大懿皇后，王卢九之女，生孙和、孙霸。
• 王夫人，谥号敬怀皇后，生孙休。
• 潘皇后，生孙亮。
• 袁夫人，袁术之女。
• 赵夫人，赵达之妹，为中国顶早记载个女画家、蚊帐发明者，有得针绝、机绝、丝绝三绝之称。
• 仲姬，生孙奋。
• 谢姬，孙霸子孙基搭孙壹拉阿孃祖母，应该是孙霸拉孃。

儿子

• 孙登，字子高，孙权长子。
• 孙虑，字子智，孙权次子。
• 孙和，字子孝，孙权三子。
• 孙霸，字子威，孙权四子。
• 孙奋，字子扬，孙权五子。
• 孙休，字子烈，孙权六子，拥立为吴国第三任皇帝。
• 孙亮，字子明，孙权七子，继任为吴国第二任皇帝。

• 孙鲁班，字大虎，孙权长女，先配周循，后配全琮。
• 孙氏（待考），孙权次女。刘纂妻，早卒。
• 孙鲁育，字小虎，孙权三女，先配朱据，后配刘纂。
• 孙氏（待考），滕胤妻。

维基共享资源里向寻得着搭该篇文章搭界个多媒体资源：

孙权

1. ↑ 陈寿. 三国志 吴书二. 国学原典.