孙武（公元前535年 - ？），孙氏，名武，字长卿。出自妫姓或者姬姓，后人尊称俚为孙子、兵圣。中国古代著名军事家，今朝勒山东、苏州等地，还有供奉孙武个庙，弗少侪叫兵圣庙。

孙武是春秋末期齐国人，出身勒齐国世族田氏，祖先是陈国宗室后来归附齐国个田完，田完个曾孙田桓子有个倪子叫陈书，因为讨伐莒国有功，畀齐景公赐姓孙，改名孙书，封勒乐安作为食邑，是妫姓孙氏个始祖。孙书个倪子孙凭养之孙武。 孙武年纪轻个辰光读之古代军事典籍《军政》，了解黄帝战胜四帝个作战经验还有古代名相伊尹、姜尚、管仲个用兵策略。大概公元前517年，孙武因为受弗了齐国攻争频繁，就离开故乡千乘，到之吴国，勒吴国认得之逃难到吴国个伍子胥，从此变成之朋友。

孙武到之吴国以后，就住勒吴国都城姑苏（今朝苏州）城郊个穹窿山，以务农为乐，勒搿许辰光写成之《孙子兵法》。《孙子兵法》畀尊为世界第一兵书、兵学圣典。

公元前515年，阖闾刺杀吴王僚而即位，孙武意识到阖闾是个有作为个君主，就勒公元前512年，请伍子胥引荐，拿俚个著作《孙子兵法》十三篇送畀阖闾看。吴王阖闾看之过后非常赏识孙武，拜孙武为最高统帅上将军。

公元前512年，孙武刚刚做之将军就帮吴王灭脱楚国个两个保护国钟吾国搭徐国，吴王想乘胜进攻楚国，但不过孙武制止，认为吴军已经疲惫，弗宜再战，吴王只好引兵回国。弗久，伍子胥提出“疲楚误楚”之略，轮番骚扰楚国六年，让楚军认为吴国只敢骚扰，弗敢进攻，放松之警惕。

公元前506年，楚国进犯吴国个保护国蔡国，蔡国问吴国求救，唐国也帮吴国进攻楚国。吴王倾国之力，阖闾亲自带之俚个兄弟夫概、伍子胥、孙武搭伯嚭等领3万吴军奇袭楚国。孙武认为兵贵神速，所以领3500精兵采取迂回战略，避实击虚，勒蔡、唐两国帮助之下，拿下之楚国北面个三个险隘，进抵汉水东岸。

搿许辰光楚昭王大惊，派出囊瓦、沈尹戍等人领兵抵抗吴军。沈尹戍建议主将囊瓦领主力拖牢吴军，自加领兵往方城迂回到吴军侧后，断脱俚哚个退路，封牢三个险隘，再前后夹击吴军，消灭俚哚，本来搿条计策可以成功打败吴军，拯救危急个楚国，但不过囊瓦畀部下挑拨怂恿，贪功之下勒沈尹戍往方城之后改变策略，渡过汉水，弗等沈尹戍包抄吴军侧后，就发动攻击。孙武看见俚渡过汉水攻击，就假装后退，退到大别山，楚军勒吴军后退个辰光连牢打之几场仗，侪输脱，楚军士气弗断下降。

孙武看见楚军处于被动，勒柏举搭楚军决战，阖闾个兄弟夫概进谏:“囊瓦弗受楚人支持，楚军肯定弗愿意死战到底，弗如先用小部队进攻，让楚军混乱，再投入主力攻击，肯定大胜。”但不过阖闾谨慎，弗敢用搿一计，夫概就私下领五千士兵进攻楚军，楚军果然溃乱，阖闾就投入主力攻击，楚军溃败，囊瓦逃奔郑国。吴军发动战略追击，勒柏举西南个清发水重创楚军残部。再追，勒雍澨再大破囊瓦军残部。吴军再搭从方城回救个沈尹戍部队交战，激烈战斗过后楚军大败，沈尹戍伤重而死。之后吴军勒麦城之战再大败楚军，从此吴军五战五胜，成功灭脱楚国，吴军勒柏举之战十日天以后攻破郢都。吴军攻破郢都过后屠城，楚昭王逃到随国。孙武用3万吴军打败20万楚军，攻灭脱之强楚，一战成名，震惊中原各国。

过后楚国大夫申包胥问秦国求救，秦哀公派出500乘兵车来打吴军，秦楚联军击败吴军，吴国本土又发生内乱，吴军只好回到吴国。

公元前496年，吴王阖闾弗听孙武个劝，出兵攻打新即位个越王勾践，结果畀俚打的大败，转来就病杀脱哉。孙武搭伍子胥帮阖闾个倪子夫差治国练兵，帮夫差成功打败勾践，报仇雪恨。之后夫差北上称霸，勒黄池大会诸侯。

勒苏州城北陆墓。

孙武个倪子孙明畀吴王封为富春侯，是为富春孙氏之始。

维基共享资源里向寻得着搭该篇文章搭界个多媒体资源：

孙武