El sociałismo cristian xe na poxision pulitega, relijoxa e ideoloxega, che la tende a metar insieme i prinsipi fondamentali del sociałismo de area democratega (pì de raro cheli de ideoloxia sociałista liberal, co el sołidarismo cristan-social. El sociałismo cristian l'é duncue na ideoloxia pulitega e cultural de area cristiana, cuanto na filoxofia moral de determinae idee socialiste e socialdemocrateghe. El pole esar meso drento a la fameja dei socialismi relijosi.

Xe on dovere far ła difarensa tra le dixidure "sociałisti cristiani" e "cristian-sociali":

• I sociałisti cristiani, soratuto intra i ani '60 e '70, i jera considerai dei cristiani che i ndava drento al pensiero marxista, inte el so significà sociałista, cavandoghe le exajerasion rivolusionarie de l'estremismo de sanca che le gaveva poxision anticlericałi.
• I cristian-sociali invese i apartien a le corenti pì progresiste del pensiero pulitego democristian.

Exenpi de sociałismo cristian in Italia i xe stai:

• el Partio Cristian Sociałe (1945-1948) de Gerardo Bruni chel ga partesipà a l'Asenblea Costituente e a le elesion pulitighe del 1948 metendose autonomo a sanca
• el Partio de la sanca Cristiana (xa ciamà Movimento dei Catolisi Comunisti) de Franco Rodano che fin dal disembre 1945 el xe nda dentro inte el Partio Comunista Italian (PCI)
• algune corenti del Partio Sociałista Italian (PSI) che inte el '73 i ga fato in Italia el Movimento Cristiani pa'l Sociałismo come che inte l'ano prima jera nato on movimento inte el Cile de Salvador Allende.