ഇംഗ്ലീഷ് വിലാസം

https://ml.wikipedia.org/wiki/Blathur

ബ്ലാത്തൂർ
ബ്ലാത്തൂർ Location of ബ്ലാത്തൂർ in കേരളം and India
രാജ്യം	ഇന്ത്യ
സംസ്ഥാനം	കേരളം
ജില്ല(കൾ)	കണ്ണൂർ
ഉപജില്ല	ഇരിട്ടി
ഏറ്റവും അടുത്ത നഗരം	ഇരിക്കൂർ (8.5 കി.മീ)
ലോകസഭാ മണ്ഡലം	കണ്ണൂർ
നിയമസഭാ മണ്ഡലം	മട്ടന്നൂർ
സിവിക് ഏജൻസി	പടിയൂർ - കല്യാട് ഗ്രാമപഞ്ചായത്ത്
സാക്ഷരത	96%
ഭാഷ(കൾ)	മലയാളം
സമയമേഖല	IST (UTC+5:30)
വിസ്തീർണ്ണം • സമുദ്രനിരപ്പിൽ നിന്നുള്ള ഉയരം	• 169 m (554 ft)
കോഡുകൾ • പിൻകോഡ് • 670593 • ടെലിഫോൺ • +04602

11°59′20″N 75°34′54″E / 11.98889°N 75.58167°E / 11.98889; 75.58167 കണ്ണൂർ ജില്ലയിലെ ഒരു ഗ്രാമമാണ്‌ ബ്ലാത്തൂർ. കണ്ണൂർ നഗരത്തിൽനിന്നും 38 കിലോ മീറ്റർ റോഡ് മാർഗ്ഗം കിഴക്കോട്ട് സഞ്ചരിച്ചാൽ ഇവിടെ എത്താം. കണ്ണൂരിൽ നിന്നും ചാലോട്, ഇരിക്കൂർ വഴിയും, തളിപ്പറമ്പ് നിന്നും ശ്രീകണ്ഠാപുരം വഴിയും, തലശ്ശേരിയിൽ നിന്നും അഞ്ചരക്കണ്ടി-ചാലോട് വഴിയും, ഏകദേശം ഒരേ ദൂരം സഞ്ചരിച്ചാൽ ബ്ലാത്തൂരിൽ എത്താം. ഏറ്റവും അടുത്ത പട്ടണം 8.5 കി.മീ അകലെയുള്ള ഇരിക്കൂർ ആണ്‌. പടിയൂർ ഗ്രാമപഞ്ചായത്തിൽ‌ ഉൾ‌പ്പെടുന്ന ഈ പ്രദേശം ഇരിട്ടി താലൂക്കിൽ സ്ഥിതി ചെയ്യുന്നു. സമുദ്ര നിരപ്പിൽ നിന്നും169 മീറ്റർ ഉയരത്തിൽ പരന്നുകിടക്കുന്ന ഭൂപ്രദേശമാണ്. ബ്ലാത്തൂരും സമീപ സ്ഥലങ്ങളും പൊതുവെ ലാറ്ററൈറ്റ് എന്ന ചെങ്കല്ല് നിറഞ്ഞ പ്രദേശമാണ്.ചെങ്കല്ല് ഖനനത്തിന് ഇവിടം പ്രശസ്തമാണ്. മലബാറിലും കുടക് പ്രദേശത്തും കെട്ടിട ആവശ്യങ്ങൾക്കായി ചെങ്കല്ല് ഏറ്റവും അധികം കൊണ്ടുപോകുന്നത് ഇവിടെ നിന്നാണ്. ഏകദേശം 700 ഹെക്ടർ പ്രദേശത്ത് ചെങ്കൽ ഖനനം നടക്കുന്നുണ്ട്.

1946 ഡിസംബർ 30ന് നടന്ന കാവുമ്പായി കാർഷിക കലാപത്തിൽ ബ്ലാത്തൂരിൽ നിന്നുള്ളവർ പങ്കെടുത്തിരുന്നു. ബ്ലാത്തൂർ കൂടാതെ ചേറ്റുവട്ടി, തിരൂർ, കല്ല്യാട്, ഊരത്തൂർ എന്നീ ദേശങ്ങൾ കൂടി കല്ല്യാട് അംശത്തിൽ ഉൾപ്പെടുന്നു.1962 -ൽ ശ്രീകണ്ഠാപുരം പുഴയ്ക്ക് പാലം വരുന്നതുവരെ തളിപ്പറമ്പിൽനിന്നും യാത്രാസൗകര്യം ഇല്ലായിരുന്നു. ബ്ലാത്തൂരിലേക്കുള്ള യാത്ര എളുപ്പമല്ലാത്തതിനാൽ കണ്ണൂർ ജില്ലയിൽ ബ്ലാ എന്നു പറയുമ്പോൾ ബ്ലാത്തൂരെത്തുമോ എന്ന ചൊല്ല് അനാവശ്യ തിടുക്കം കാട്ടുന്നവരെ സൂചിപ്പിക്കാൻ ഉപയോഗിച്ചിരുന്നു. 1972 -ൽ ഇരിക്കൂർ പുഴയ്ക്ക് കുറുകെ പാലം വന്നതിനുശേഷം കണ്ണൂരുമായി റോഡുമാർഗ്ഗം വാഹനഗതാഗതം തുടങ്ങി.1952 -ൽ ഇരിക്കൂറിൽ ആരംഭിച്ച ധർമ്മാശുപത്രിയാണ് പഴയകാലത്ത് ചികിത്സക്കുണ്ടായിരുന്ന ഏക ആശ്രയം. കല്യാട് താഴത്ത് വീട് ജന്മിമാരായിരുന്നു ഈ പ്രദേശത്തിന്റെ അധികാരി. വയലിൽ കുറച്ച് സ്ഥലം മാത്രം കരക്കാട്ടിടം നായനാരുടെ വക ആയിരുന്നു. ബക്കളം -കടമ്പേരി ക്ഷേത്രത്തിനു കീഴിലായിരുന്നു അതിന്റെ പാട്ടം പിരിച്ചിരുന്നത്.

'പ്ലാത്ത്' അല്ലെങ്കിൽ 'ഞാവൽ' മരങ്ങൾ സമൃദ്ധമായി വളർന്നിരുന്ന ഈ പ്രദേശത്തെ 'പ്ലാത്ത് ഊര് ' എന്നു വിളിച്ചിരുന്നത് പിന്നീട് പ്ലാത്തൂർ എന്നും ബ്ലാത്തൂർ എന്നും ആയി മാറി എന്നു വിശ്വസിക്കപ്പെടുന്നു. വേറൊരു വിശ്വാസം സംസ്കൃത ഭാഷയിൽ ദ്വാരം എന്നർത്ഥമുള്ള 'വില'ത്തിൽ നിന്നാണു 'വിലത്തൂരും' പിന്നീട് 'ബ്ലാത്തൂരും' ഉണ്ടായതെന്നാണ്. നാലുപുറവും ഉയർന്നു നിൽക്കുന്ന വയലിലെ വെള്ളം മഴക്കാലത്ത് പുറത്തേക്ക് ഒഴുകിയിരുന്നത് കരുവാൽ ഓവ് എന്ന ദ്വാരത്തിലൂടെ ആയിരുന്നു.

ഭൂമിശാസ്ത്രപരമായി ഒരു പീഠഭൂമിയുടെ സ്വഭാവമാണ് ബ്ലാത്തൂരിന്. നാലു ഭാഗത്തുനിന്നും ഇവിടെ എത്താൻ കുത്തനെയുള്ള കയറ്റം കയറണം. മുകളിൽ എത്തിയാൽ പരന്നു കിടക്കുന്ന വയലാണ്. വയലിനു ചുറ്റും വീടുകൾ ഉണ്ട്. വടക്കെ ഇന്ത്യൻ ഗ്രാമങ്ങളുടെ രീതിയിൽ അടുത്തടുത്ത് വീടുകൾ ഇവിടെയുണ്ട്. മഴവെള്ളം മാത്രമാണു കൃഷിക്ക് ആശ്രയം. വയലിൽ കെട്ടികിടക്കുന്ന വെള്ളം തെക്കുഭാഗത്തുള്ള 'കരുവാൽ ഓവ്' വഴി കുറേ ദൂരം ഭൂമിക്കടിയിലൂടെ കുന്നിൻ ചെരിവിലൂടെ പുറത്തേക്ക് ഒഴുകി പിന്നീട് തോടായി ഇരിക്കൂർ പുഴയിൽ എത്തുന്നു. ഇത്തരം ഒരു സ്വാഭാവികചാൽ ഇല്ലായിരുന്നുവെങ്കിൽ ബ്ലാത്തൂർ വയലിനുപകരം ഒരു തടാകം ആയിരുന്നു ഉണ്ടായിരിക്കുക. 6000 ഹെക്ടർ വിസ്താരത്തിൽ പരന്നുകിടക്കുന്ന ചെങ്കൽ പാറപ്പരപ്പുകളാണ് ഈ പ്രദേശത്തെജലസംഭരണിയായി പ്രവർത്തിക്കുന്നത്. 2000 മുതൽ ഈ പ്രദേശത്ത് നടക്കുന്ന വ്യാപകമായ ചെങ്കൽ ഖനനം വലിയ ജലക്ഷാമം ഈ പ്രദേശത്ത് ഉണ്ടാക്കാൻ സാദ്ധ്യതയുണ്ട്. നിലവിൽ ഓരോ ദിവസവും ആയിരം ലോറി ചെങ്കല്ല് ഇവിടെനിന്ന് വടക്കൻ കേരളത്തിലും കർണാടകയിലെ കൂർഗ് പ്രദേശത്തേക്കുമായി കൊണ്ടുപോകുന്നുണ്ട്. അപൂർവ്വമായ നിരവധി സസ്യജാതികൾ ഈ പാറപ്പരപ്പുകളിലും പാറക്കുളങ്ങളിലും തിരിച്ചറിഞ്ഞിട്ടുണ്ട്. പലതും വംശനാശഭീഷണിയുടെ വക്കിൽ നിൽക്കുന്ന സസ്യങ്ങളാണ്. ഇവയൊക്കെയും എന്നേക്കുമായി നഷ്ടപ്പെടാൻ സാദ്ധ്യതയുണ്ട്.

ബ്ലാത്തൂരും സമീപ പ്രദേശങ്ങളായ കല്യാട്, ഊരത്തൂർ എന്നീ പ്രദേശങ്ങളും ഒരു പീഠഭൂമിയുടെ സ്വഭാവം പ്രകടിപ്പിക്കുന്നുണ്ട്. ചെങ്കൽ പാറപ്പരപ്പുകളാണ് ഭൂരിഭാഗം സ്ഥലങ്ങളും. വടക്കെ മലബാറിലെ പ്രത്യേകതയായ ഇത്തരം ലാറ്ററൈറ്റ് പാറപ്പരപ്പുകൾ അപൂർവ്വ സസ്യ -ജന്തു വൈവിധ്യം കൊണ്ട് സമ്പന്നമാണ്. സീക്ക്, കേരള ശാസ്ത്ര സാഹിത്യ പരിഷത്ത്, വിക്കിപീഡിയ പ്രവർത്തകരുടെ കൂട്ടായ്മ - വർഷങ്ങളിൽ രണ്ടു ഘട്ടങ്ങളിലായി നടത്തിയ സർവേകളിൽ നിരവധി അപൂർവ്വ സസ്യങ്ങളും , ചിത്രശലഭങ്ങളും ഉഭയജീവികളും ഇവിടെ നിന്നു റിപ്പോർട്ട് ചെയ്തു.^[1]

കേരളത്തിൽ ചെങ്കൽ കുന്നുകൾ കാണപ്പെടുന്നത് പ്രധാനമായും ഉത്തരകേരളത്തിലാണ്. കണ്ണൂർ, കാസർഗോഡ് ജില്ലകളിലെ 16 നദികളിൽ ഷിറിയ, ചന്ദ്രഗിരി, കാര്യങ്കോട്, കുപ്പം, വളപട്ടണം പുഴകൾ ഒഴികെയുള്ള പുഴകളെല്ലാം ഉത്ഭവിക്കുന്നത് ഇടനാടൻ ചെങ്കൽക്കുന്നുകളിൽ നിന്നാണ്. മേൽ സൂചിപ്പിച്ച 5 പുഴകളേയും പോഷിപ്പിക്കുന്ന പ്രധാന നീർച്ചാലുകളുടെ പ്രഭവ കേന്ദ്രങ്ങളും ചെങ്കൽ കുന്നുകൾ തന്നെയാണ്. ഒരു കാലത്ത് നിത്യഹരിത സസ്യ സമൂഹങ്ങൾ നിറഞ്ഞു നിന്നിരുന്ന ഇടനാടൻ കുന്നുകൾ മനുഷ്യന്റെ നിരന്തരമായ ഇടപെടൽ മൂലം മുൾപ്പെന്തകളും (scrub jungle) പുൽമേടുകളും ആയിത്തീർന്നു. മുങ്കാലങ്ങളിൽ കുന്നിൻപ്രദേശങ്ങളിൽ ജീവിച്ചിരുന്ന കുറുക്കൻ (Indian Fox-Vulpus bengalensis) ഇന്ന് നാമാവശേഷമായിരിക്കുന്നു. ഇടനാടൻ ചെങ്കൽ കുന്നുകൾ ജൈവ വൈവിധ്യത്തിന്റെ കലവറകൾ എന്നതിലുപരി ശുദ്ധജലത്തിന്റെ അപാരസ്രോതസ്സുകളുമാണ്.ചെങ്കൽകുന്നുകളുടെ നാശം നമ്മുടെ നാടിനെ കടുത്ത ജലദൗർലഭ്യത്തിലേക്ക് എത്തിച്ചുകൊണ്ടിരിക്കുകയാണ്. ഉത്തര കേരളത്തിലെ നൂറുകണക്കിനു കുന്നുകൾ ഇല്ലാതായിക്കഴിഞ്ഞു. അവശേഷിക്കുന്ന കുന്നുകളും – ക്വാറി- മണ്ണെടുപ്പ് ഭീഷണിയിലുമാണ്. മാടായിപ്പാറ, കാനായി കുന്നുകളെക്കുറിച്ചുള്ള പഠനങ്ങൾ ഇതിനകം പുറത്ത് വന്ന് കഴിഞ്ഞു.ഇടനാടൻ ചെങ്കൽ കുന്നുകളെക്കുറിച്ചുള്ള ആദ്യത്തെ പഠനം നടത്തിയത് സീക്ക് (SEEK) ആയിരുന്നു. ഈ പഠനം പുസ്തകരൂപത്തിൽ ലഭ്യമാണ്.(ഇടനാടൻ ചെങ്കൽകുന്നുകൾ-ഒരു പാരിസ്ഥിതിക പഠനം)

ഉയർന്ന പാറപ്പരപ്പുകൾ ജൈവ വൈവിധ്യത്താൽ സമ്പന്നമായ ആവാസവ്യവസ്ഥകളാണ്. നിത്യ ഹരിത വനങ്ങളുടെ ശേഷിപ്പുകൾ, കാവുകൾ, പുൽമേടുകൾ, താത്കാലിക നീർക്കെട്ടുകൾ(Temporary pools) എന്നിവയുടെ സാന്നിദ്ധ്യമാണ് ഇത്രമാത്രം ജൈവവൈവിധ്യത്തിനു കാരണം. ബ്ലാത്തൂരിലേയും സമീപത്തുള്ള കല്ല്യാട്, ഊരത്തൂർ പ്രദേശങ്ങളിലായി വ്യാപിച്ച് കിടക്കുന്ന നൂറുകണക്കിനു ഹെക്ടർ വിസ്താരമുള്ള പാറപ്പരപ്പുകളിലും മറ്റുമായി നടത്തിയ പഠനങ്ങൾ ബ്ലാത്തൂരിന്റെ ജൈവവൈവിധ്യ സമ്പന്നത വെളിപ്പെടുത്തുന്നതാണ്. 450 ൽ അധികം സപുഷ്പി സസ്യങ്ങളെ ഈ പഠനത്തിൽ കണ്ടെത്തുകയുണ്ടായി. പശ്ചിമഘട്ടത്തിലെ സ്ഥാനികവും വംശനാശ ഭീഷണി നേരിടുന്നതുമായ നായുരിപ്പ് (Hopea parviflora), കൂനൻ പാല (Tabernaemenans alternifolia) ,ലോഹിനപ്പൂ (Neonatis rheadei), മുർഡാനിയപ്പുല്ല് (Murdania crocea) എന്നിവയെ ഇവിടെ കണ്ടെത്താൻ കഴിഞ്ഞു. പുൽവർഗ്ഗസസ്യങ്ങളോട് രൂപസാദൃശ്യമുള്ളതും മൂന്നു നൂറ്റാണ്ടുകൾക്ക് മുമ്പ് പ്രസിദ്ധീകരിച്ചതുമായ ഹോർത്തൂസ് മലബാറിക്കൂസ് എന്ന പ്രശസ്ത സസ്യപഠന പുസ്തകത്തിൽ “നീർമുറി” എന്നു പേരുനൽകീട്ടുള്ളതുമായ (Alysicarpus bupleurifolius)എന്ന സസ്യവും ഇവിടെ ധാരാളമായി വളരുന്നുണ്ട്. കാസർകോട്-കണ്ണൂർ ജില്ലകളിലെ ചെങ്കൽ പാറക്കുളങ്ങളിൽ മാത്രം കണ്ടു വരുന്ന കുഞ്ഞു നെയ്തൽ (Nymphoides parvifolia.) എന്ന ചെറു സസ്യവും ഇവിടെ കണ്ടെത്തി. പശ്ചിമഘട്ട പ്രദേശങ്ങളിൽ മാത്രം വളരുന്ന ചേര് (Holigarna arnottiana) [[ചിറ്റിലപ്ലാവ് (Pterospermum rubiginosum) മരോട്ടി (Hydnocarpus pentandra) , മലയിലഞ്ഞി (Chiyonanthes mala elanji), ജടാമജ്ജി (Dalbergia horrida), ഏകനായകം (Salacia fruticosa), വള്ളിക്കാഞ്ഞിരം (Strychnos vanprukii) എന്നിവയും ഈ പ്രദേശങ്ങളിൽ കണ്ടുവരുന്നു. മാടായിപ്പാറയിൽ നിന്ന് കണ്ടെത്തിയ പുതിയ സപുഷ്പി സസ്യങ്ങളായ റൊട്ടാല മലബാറിക്ക, ജസ്റ്റിഷ്യ ഏക കുസുമ, ലൊപിഡാഗാത്തിസ് കേരളൻസിസ് , യൂഫോർബിയ കത്രാജൻസിസ് വെറൈറ്റി കാസർകോഡെൻസിസ് എന്നിവയും പഠനസമയത്ത് ബ്ലാത്തൂരിൽ നിരീക്ഷിക്കാൻ കഴിഞ്ഞു. കഴിഞ്ഞ വർഷം കാസർകോട് ജില്ലയിലെ സീതാംഗോളിയിൽ നിന്ന് കണ്ടെത്തിയ കാൻസ്കോറ ഭട്ടിയാന യും ഈ വർഷം മാടായിപ്പാറയിൽ നിന്ന് കണ്ടെത്തിയ പാറസൊപ്പൂബിയ ഹോഫ്മാനിയ വറൈറ്റി ആൽബിഫ്ലോറ (Parasopubia hofmannii var. albiflora.)എന്നീ സസ്യങ്ങളും ബ്ലാത്തൂർ-ഊരത്തൂർ പാറയിൽ കാണപ്പെടുന്നുണ്ട് എന്നത് ഈ പ്രദേശത്തിന്റെ സമ്പന്നമായ സസ്യ വൈവിധ്യത്തിന്റെ സൂചകങ്ങളാണ്. 2012 ൽ കേരളത്തിൽ നിന്ന് പുതുതായി കണ്ടെത്തിയ Purple spotted Flitter എന്ന അത്യപൂർവ ചിത്രശലഭത്തിന്റെ ലാർവകൾ ഭക്ഷണമാക്കുന്ന വേട്ടുവക്കുറ്റി (Aganope thyrsiflora var enalata) ഈ പ്രദേശത്ത് വളരുന്നുണ്ട്. സസ്യ വൈവിധ്യം ശലഭവൈവിധ്യത്തിന്റെ സൂചന കൂടിയാണ്.അതിനാൽ നൂറിലധികം ഇനം ചിത്ര ശലഭങ്ങൾ ഈ പ്രദേശത്ത് കാണാൻ സാധ്യതയുണ്ട്.ഇപ്പോൾ നടത്തിയ പഠനത്തിൽ തന്നെ 50 ൽ അധികം ചിത്രശലഭജാതികളെ നിരീക്ഷിക്കാൻ കഴിഞ്ഞു. വയൽ പ്രദേശങ്ങളും നീർച്ചാലുകളും തുമ്പികളുടെ പ്രജനനകേന്ദ്രങ്ങളാണല്ലൊ.ഒരു ദിവസത്തെ നിരീക്ഷണ പഠനത്തിൽ തന്നെ 20 ൽ അധികം തുമ്പി ഇനങ്ങളെ പഠനസംഘത്തിണ് കണ്ടെത്താൻ കഴിഞ്ഞിട്ടുണ്ട്.

ഇനിയും കൂടുതൽ നിരീക്ഷണ പഠനങ്ങൾ നടത്തേണ്ട ഒരു പ്രദേശമാണ് ബ്ലാത്തൂർ.എന്നാൽ മാത്രമേ ബ്ലാത്തൂരിന്റെ സമഗ്രമായ ജൈവവൈവിധ്യ സമ്പന്നത പൂർണ്ണമായും വെളിപ്പെടുകയുള്ളു.ഈ നാടിന്റെ ജലസംഭരണി എന്ന നിലയിലും ജൈവവൈവിധ്യത്തിന്റെ കേന്ദ്രം എന്ന നിലയിലും ബ്ലാത്തൂറിന്റെയും അനുബന്ധപ്രദേശങ്ങളായ കല്ല്യാട് ഊരത്തൂർ എന്നിവിടങ്ങളിലേയും പാറപ്പരപ്പുകൾ സംരക്ഷിച്ചേ മതിയാവൂ.ഇപ്പോൾ നടക്കുന്ന അനിയന്ത്രിത ചെങ്കൽ ഖനനം കർശനമായി പരിമിതപ്പെടുത്തുകയും വിശാലമായതും സർക്കാർ അധീനതയിലുള്ളതുമായ പാറ ഭൂമികൾ സ്വകാര്യ വ്യക്തികൾ കൈയേറി ചെങ്കൽ പണകളാക്കുന്നത് തടയുകയും ചെയ്താൽ മാത്രമേ ഇത് സാദ്ധ്യമാവുകയുള്ളു. ഇതിനായി ജനങ്ങൾക്കിടയിൽ വലിയ രീതിയിലുള്ള പ്രകൃതിഅവബോധം വളർന്നുവരേണ്ടതുണ്ട്. പൊതുവെ ചെങ്കൽ പാറകളെ വെറും തരിശു നിലങ്ങളായി മാത്രമാണ് പലരും കണക്കാക്കുന്നത്. ഈ ധാരണകൾ മാറ്റുന്നതിനായി ജനകീയമായ ഒരു ബോധവത്കരണം ആവശ്യമാണ്.സീക്ക്- കേരള ശാസ്ത്ര സാഹിത്യ പരിഷത്ത്, വിക്കിപീഡിയ പ്രവർത്തകർ ഉൾപ്പെടുന്ന സംഘമാണ് പ്രാഥമിക പഠനങ്ങൾ നടത്തിയത്. വി.സി.ബാലകൃഷ്ണൻ,പി.കെ.ഗിരീഷ്മോഹൻ, വിനയ രാജ്, വിജയകുമാർ ബ്ലാത്തൂർ തുടങ്ങിയവരാണ് സംഘത്തിലുണ്ടായിരുന്നത്. ^[2]

ഉത്തരമലബാറിലെ ചെങ്കൽപ്പാറകളെക്കുറിച്ചുള്ള പഠനത്തിന്റെ ഭാഗമയി സീക്കും,ശാസ്ത്രസാഹിത്യ പരിഷത്തും, വിക്കിപീഡിയ പ്രവർത്തകരും നടത്തുന്ന ബ്ലാത്തൂർ ജൈവവൈവിധ്യപഠനത്തിന്റെ രണ്ടാം ഘട്ടം ആരംഭിച്ചു. നേരത്തെ കണ്ടെത്തിയ 450 സപുഷ്പിസസ്യങ്ങൾക്കു പുറമെ 50 സസ്യങങൾ കൂടി ഇക്കഴിഞ്ഞ ദിവസം നടത്തിയ സർവേയിൽ കണ്ടെത്തി. ഹീമൊദൊരേസിയെ(Haemodoraceae) സസ്യകൂടും ബത്തിൽ ഉൾപ്പെടുന്ന ഓഫിയൊപോഗോൻ ജനുസ്സിൽപ്പെട്ട ഒരു പുതിയ ഇനത്തെക്കൂടി പുതിയ സർവെയിൽ കാണാൻ കഴിഞ്ഞു. ഏഴുവർഷത്തിൽ ഒരിക്കൽ പൂക്കുന്ന പൂമാലക്കുറിഞ്ഞി(Strobilanthes integrifolius) എന്ന സ്ഥാനികസസ്യത്തേയും കണ്ടെത്തി. ഈ മേഖലയിൽ അപൂർവമായതും പശ്ചിമഘട്ടത്തിൽ മാത്രം കാണപ്പെടുന്നതുമായ (Endemic)കാട്ടുകിരിയാത്ത്(Andrographis atropurpurea),കാട്ടശോകം(Humboltia brunonis), തൻബെർജിയ മൈസൂറെൻസിസ്, തുടങ്ങിയ സസ്യങ്ങളെ കൂടി നിരീക്ഷിക്കാൻ കഴിഞ്ഞതാണു ഈ പ്രാവശ്യത്തെ സർവേയുടെ പ്രത്യേകത. കേരളത്തിൽ ചില സീസണിൽ മാത്രം പ്രത്യക്ഷപ്പെടാറുള്ള നിലനീലി(Blue Pansy) ശലഭവും ഇവിടെ നിരീക്ഷിക്കാൻ കഴിഞ്ഞു. ഇതുവരെ നടത്തിയ പഠനത്തിൽ 500 ൽ പരം സപുഷ്പിസസ്യങ്ങൾ, 20 ൽ അധികം ഉഭയജീവികൾ, 40 ഇനം തുമ്പികൾ, 95 ഇനം ചിത്രശലഭങ്ങൾ, 60 ഓളം പക്ഷികൾ, 40 ഇനം ചിലന്തികൾ, 23 ഇനം ഉരഗങ്ങൾ, നൂറിൽപരം വ്യത്യസ്ത ഇനം മറ്റു ഷഡ്പദങ്ങൾ എന്നിവയെ നിരീക്ഷിച്ചിട്ടുണ്ട്. മഴയുടെ കുറവ് തവളകൾ ഉൾപ്പെടെയുള്ള ജീവജാലങ്ങളുടെ പ്രജനനത്തെ കാര്യമായി ബാധിച്ചതായി കാണാൻ കഴിഞ്ഞു. ഇനിയും കൂടുതൽ നിരീക്ഷണ പഠനങ്ങൾ നടത്തേണ്ട ഒരു പ്രദേശമാണ് ബ്ലാത്തൂർ. എന്നാൽ മാത്രമേ ബ്ലാത്തൂരിന്റെ സമഗ്രമായ ജൈവവൈവിധ്യ സമ്പന്നത പൂർണ്ണമായും വെളിപ്പെടുകയുള്ളു. ഈ നാടിന്റെ ജലസംഭരണി എന്ന നിലയിലും ജൈവവൈവിധ്യത്തിന്റെ കേന്ദ്രം എന്ന നിലയിലും ബ്ലാത്തൂറിന്റെയും അനുബന്ധപ്രദേശങ്ങളായ കല്ല്യാട്, ഊരത്തൂർ എന്നിവിടങ്ങളിലേയും പാറപ്പരപ്പുകൾ സംരക്ഷിച്ചേ മതിയാവൂ. ഇപ്പോൾ നടക്കുന്ന അനിയന്ത്രിത ചെങ്കൽ ഖനനം കർശനമായി പരിമിതപ്പെടുത്തുകയും വിശാലമായതും സർക്കാർ അധീനതയിലുള്ളതുമായ പാറഭൂമികൾ സ്വകാര്യ വ്യക്തികൾ കൈയേറി ചെങ്കല്പ്പണകളാക്കുന്നത് തടയുകയും ചെയ്താൽ മാത്രമേ ഇത് സാദ്ധ്യമാവുകയുള്ളു. ഇതിനായി ജനങ്ങൾക്കിടയിൽ വലിയ രീതിയിലുള്ള പ്രകൃതി അവബോധം വളർന്നുവരേണ്ടതുണ്ട്. ഇതിന്നായി പഞ്ചായത്തിന്റെയും റവന്യൂ അധികൃതരുടേയും ഇടപെടലുകൾ ആവശ്യമാണ് എന്ന് പഠനം കാണിക്കുന്നു. ജൈവവൈവിധ്യസമ്പന്നമായ ഈ പ്രദേശം ഒരു ചെങ്കൽപ്പാറജൈവവൈവിധ്യപൈതൃകപ്രദേശമായി(Laterite Biodiversity Heritage Site) മാറ്റണമെന്ന് പഠനസംഘം നിർദ്ദേശം നൽകുകയുണ്ടായി. ഒരുവർഷം നീണ്ടുനിൽക്കുന്ന പഠനത്തിന്റെ തുടർച്ചയായി ഓരോ മാസവും സർവേകളും പഠനക്കേമ്പുകളും നടത്തുന്നതാണു.പൊതുജനങ്ങൾക്കായുള്ള ബോധവൽക്കരണ ക്ലാസ്സുകളും നടത്തും. വി.സി.ബാലകൃഷ്ണൻ, പി.കെ.ഗിരീഷ്മോഹൻ, വിനയരാജ്. വി. ആർ, വിജയകുമാർ ബ്ലാത്തൂർ, ടി.എം.രജേന്ദ്രൻ, ഡോ.ദീപാചന്ദ്രൻ തുടങ്ങിയവരാണ് സംഘത്തിലുണ്ടായിരുന്നത്. ^{[3] [4] [5]}

ബ്ലാത്തൂരിനു വടക്ക് 'ചേറ്റുവട്ടി' കിഴക്ക് "പാലൂൽ' പടിഞ്ഞാറ് 'കരിങ്കക്കുന്ന്' തെക്ക് 'കണ്ണങ്കോട്' എന്നിവിടങ്ങളിൽ നീരരുവികളും വളരെ പ്രാചീന ജനപഥങ്ങളൂടെ അവശിഷ്ടങ്ങളുമുണ്ട്. ചേറ്റുവട്ടിയിൽ പുരാതന ക്ഷേത്രങ്ങളുടെയും കുളങ്ങളുടെയും അവശിഷ്ടങ്ങളുണ്ട്.പാലൂൽ എന്ന സ്ഥലത്ത് മഹാവിഷ്ണുക്ഷേത്ര സമുച്ചയം കണ്ടെത്തി പുനരുദ്ദീകരിച്ചിട്ടുണ്ട്.ഇരിക്കൂറിൽ നിലനിൽക്കുന്ന മാമാനം മഹാദേവി ക്ഷേത്രം ആരൂഢസ്ഥാനമായ കണ്ണങ്കോട് എന്ന സ്ഥലത്ത് വളരെ പഴയ അമ്പല അവശീഷ്ടങ്ങൾ വർഷങ്ങൾക്ക് മുമ്പെതന്നെ കണ്ടെത്തിയിരുന്നുവെങ്കിലും പത്തു വർഷത്തിനു മുമ്പാണു മാമാനം ക്ഷേത്രക്കമ്മറ്റി അതേറ്റെടുത്ത് പുനരുദ്ധാരണം നടത്തിയത്.ബ്രാഹ്മണ ഗ്രാമങ്ങൾ നിലനിന്നിരുന്ന ഈ പ്രദേശത്ത് നിന്നും പൂർണ്ണമായും എല്ലാ കുടുംബങ്ങളും അപ്രത്യക്ഷമായതിനു കാരണം അറിയില്ല.ബ്രാഹ്മണ കുടുംബങ്ങളുടെ ഇല്ലപ്പേരുകൾ ബ്ലാത്തൂരിൽ ഇപ്പോഴും നിലനിൽക്കുന്നുണ്ട്. അതുപോലെതന്നെ ഉയർന്ന ജാതിക്കാരായ നമ്പ്യാർ സമുദായം പരിപാലിച്ചു പോന്നിരുന്ന വേട്ടക്കൊരുമകൻ ഈ ഗ്രാമത്തിൽ പ്രതിഷ്ഠിക്കപ്പെട്ടതിനും കാരണം വ്യക്തമല്ല. ഭൂമിശാസ്ത്രപരമായി വളരെ അനുയോജ്യമായ സമീപ പ്രദേശങ്ങളിലെ ജനജീവിതം എങ്ങനെ ഇല്ലാതായി എന്നും വെള്ളം ലഭിക്കാൻ വളരെ വിഷമമുള്ള ബ്ലാത്തൂരിൽ എങ്ങനെ ജനങ്ങൾ ജീവിതം ആരംഭിച്ചു എന്നതും വിശദീകരിക്കപ്പെട്ടിട്ടില്ല.

നൂറേക്കർ വിസ്താരമുള്ള ബ്ലാത്തൂർ വയലിൽ പ്രധാനമായും ഒരു വിള മാത്രമായിരുന്നു ചെയ്തിരുന്നത്. കുറച്ച് പ്രദേശത്ത് മാത്രം പുഞ്ചകൃഷി ചെയ്തിരുന്നു.കയമ,അയ്യാർ എട്ട്, ജയതുടങ്ങിയ ഇനം നെല് വിത്തുകളാണു ഇവിടെ കൃഷി ചെയ്തിരുന്നത്.വെള്ളരി,മത്തൻ,കുമ്പളം തുടങ്ങിയവ നട്ടിയായി കൃഷി ചെയ്യും .പ്രധാന പൊതു കുളങ്ങളായ പുതിയോട്ടും കുളം,പള്ളിക്കുളം,അമ്പലക്കുളം എന്നിവക്കടുത്ത് വയലിലാണു നാട്ടി നടുക. ഒരു വർഷത്തേക്ക് ആവശ്യമായ പച്ചക്കറികൾ ഇത്തരത്തിൽ കൃഷി ചെയ്യും. ഇവ വിൽക്കാറില്ലായിരുന്നു.വെള്ളരി, മത്തൻ തുടങ്ങിയവ വാഴനാരുകൊണ്ട് മെടഞ്ഞ് കെട്ടി ഉത്തരത്തിൽ തൂക്കി ഇടുക പതിവാണു.ഇപ്പോൾ പുതുതായി കുഴിച്ചിരിക്കുന്ന കുളങ്ങളിൽ നിന്നുള്ള വെള്ളമുപയോഗിച്ച് വ്യാപകമായി വിൽപ്പനക്കായി കൃഷി നടത്തുന്നു. ബ്ലാത്തൂർ വയലിനു ചുറ്റുമുള്ള വീടുകൾക്ക് പുറകിൽ ആൾതാമസം ഇല്ലാത്ത വിശാലമായ കശുവണ്ടി കാടുകളാണു ഉണ്ടായിരുന്നത്. നിരവധി ഹെക്ടർ കശുവണ്ടി കൃഷി ഉണ്ടായിരുന്നു.ശാസ്ത്രീയമായ രീതിയിലുള്ള കൃഷി ആയിരുന്നില്ല. ഇതു കൂടാതെ കുരുമുളക്, മരച്ചീനി എന്നിവയും കൃഷി ചെയ്തിരുന്നു. ഇപ്പോൾ വലിയ തോതിൽ റബ്ബർ കൃഷിക്ക് വേണ്ടി കശുവണ്ടി തോട്ടങ്ങളും, കുരുമുളക് തോട്ടങ്ങളും വെട്ടി മാറ്റിക്കഴിഞ്ഞു.മരച്ചീനി അപൂർവമായി മാത്രമേ കൃഷി ചെയ്യുന്നുള്ളൂ. പഴയകാലത്ത് വറുതിസമയങ്ങളിൽ കേതക്ക എന്ന കാട്ടുകിഴങ്ങായിരുന്നു പ്രധാന ഭക്ഷണം

1939 ജനുവരി 18- ബ്ലാത്തൂർ വയലിൽ നടന്ന കാർഷിക സമ്മേളനത്തിൽ ചിറക്കൽ താലൂക്കില്പെട്ട പല സ്ഥലങ്ങളിൽനിന്നായി ഏഴായിരത്തോളം ആൾക്കാർ പങ്ക് എടുത്തു. പ്രസിദ്ധ സ്വാതന്ത്ര സമര സേനാനി എൻ.ജി. രങ്ക,വിഷ്ണു ഭാരതീയൻ, കേരളീയൻ,കെ.പി.ആർ. ഗോപാലൻ,പി.എം.ഗോപാലൻ,പാട്ടത്തിൽ പത്മനാഭൻ എന്നിവർ പങ്കുകൊണ്ടു.സമ്മേളനം അലങ്കോലപ്പെടുത്താൻ കല്ല്യാട് എശമാന്റെ ആൾക്കാർ ശ്രമിച്ചത്.

• 1946 ജൂലൈ 18- 1940 ലെ മൊറാഴ സംഭവത്തെ തുടർന്ന് പോലീസിൽ നിന്നും ഒളിച്ച് സുബ്രഹ്മണ്യം ഷേണായി ബ്ലാത്തൂരിലും ഭാസ്കരൻ മാഷ് എന്ന പേരിൽ ഒളിവിൽ താമസിച്ചിരുന്നു.1946 ജൂലൈ 18 നു ഇരിക്കൂറിൽ വെച്ച് നടന്ന ഒരു സമ്മേളനത്തിലാണു അദ്ദേഹം ഈ രഹസ്യം നാടകീയമായി പ്രസ്താവിച്ചത്.
• 1949 ഏപ്രിൽ 1 - ബ്ലാത്തൂരിലെ സ്കൂൾ ഔദ്യോഗികമായി പ്രവർത്തനം തുടങ്ങി. കുത്തോതി എന്ന സ്ഥലത്ത് അതിനു മുമ്പ് അപ്പമാഷ്, മയ്യിൽ കൃഷ്ണൻ മാഷ് എന്നിവർ നടത്തിയിരുന്ന സ്കൂൾ പ്രവർത്തിച്ചിരുന്നു.
• 1946 ഡിസംബർ 30- കാവുമ്പായി സമര ദിനം.ബ്ലാത്തൂരുകാരനായ ആലോറമ്പങ്കണ്ടി കൃഷ്ണൻ ആ സമരത്തിൽ വെടിയേറ്റു മരിച്ചു. പുത്തലത്ത് കൃഷ്ണൻ സ്വന്തം നാടൻ തോക്കുപയോഗിച്ച് മലബാർ സ്പെഷൽ പോലീസിലെ ഒരു ജമേദാറുടെ തോളെല്ല് തകർത്തു.
• 1946 ഡിസംബർ 12- കുയിലൂർ കർഷക സംഘം ക്യാമ്പിൽ നിന്നും അറസ്റ്റ് ചെയ്ത് ലോക്കപ്പിലാക്കിയവരെ മോചിപ്പിക്കൻ ഇരിക്കൂർ പോലീസ് സ്റ്റേഷനിലേക്ക് ബ്ലാത്തൂരിലെ അരയാക്കിൽ കുമ്പ, പള്ള്യത്ത് മാധവി എന്നിവരും മറ്റുള്ളവരും ചേർന്ന് നടത്തിയ സ്റ്റേഷൻ ആക്രമണം
• 1955 ൽ ബ്ലാത്തൂർ പ്രദേശത്ത് പടർന്ന് പിടിച്ച പ്രത്യേക കണ്ണു രോഗത്തെക്കുറിച്ച് മദിരാശി അസംബ്ലിയിൽ എം.എൽ.ഏ ടി.സി. നാരായണൻ നമ്പ്യാർ ചോദ്യം ഉന്നയിച്ചതിനെ തുടർന്ന് മന്ത്രി ഏ.ബി. ഷെട്ടി മറുപടി പറയുകയും ഡോ.പി.കെ ആർ. വാര്യരും ഉൾപ്പെട്ട മെഡിക്കൽ സംഘം ബ്ലാത്തൂരിൽ ക്യാമ്പ് നടത്തിയതായി ' ഒരു സർജന്റെ ഡയറിക്കുറിപ്പുകൾ' എന്ന ഡോ.വാര്യരുടെ ആത്മകഥയിൽ പ്രസ്താപിച്ചിട്ടുണ്ട്.
• ലോകസഞ്ചാരത്തിനിടയിൽ എസ്.കെ.പൊറ്റക്കാട് ബാലിദ്വീപിൽ എത്തിയപ്പോൾ ഒരു ഗ്രാമത്തിന്റെ പേരു കേട്ടപ്പോൾ ഇങ്ങനെ എഴുതി-ഈ പേര് കേട്ടപ്പോൾ ഞാനെന്റെ നാട്ടിലെ ബ്ലാത്തൂര് ഓർത്തുപോയി
• 1975 മാർച്ച് 4- ബ്ലാത്തൂരിൽ ആദ്യമായി വൈദ്യുതി എത്തി.

• വൈദ്യുതി - 1975 മാർച്ച് 4 ആദ്യ കണക്ഷൻ ഏ.സി.ലത്തീഫ്
• ടെലഫോൺ കണക്ഷൻ -ആദ്യ ഏ.സി.ലത്തീഫ്
• ആദ്യ ബസ്സ് സർവീസ് - എൻ.കെ.ബി.ടി ബസ്സ് സർവീസ് പേരാവൂരിലേക്ക്
• ആദ്യ സ്കൂൾ - ചാപ്പയിൽ വായനശാല
• ആദ്യമായി കോളേജ് വിദ്യാഭ്യാസം നേടിയ വ്യക്തി - ഏ.സി.കരീം- ദേവഗിരി കോളേജ് കോഴിക്കോട്
• ആദ്യമായി പത്താം തരം പാസ്സായ വനിത- പി.യശോദ
• ആദ്യ ബിരുദധാരി-പി.കെ.ദിവാകരൻ
• ആദ്യ നോവലിസ്റ്റ്-വി.വി.അഷറഫ്

• ഗവൺമെന്റ് ഹോമിയോ ഡിസ്പെൻസറി
• ഗവൺമെന്റ് വെറ്റിനറി ഡിസ്പെൻസറി
• ഗവർമെന്റ് ആയുർവേദ ഡിസ്പെൻസറി
• കുടുംബക്ഷേമ ഉപ കേന്ദ്രം- ഊരത്തൂർ പ്രാഥമികാരോഗ്യ കേന്ദ്രത്തിനു കീഴിൽ
• മാവേലി സ്റ്റോർ

• ബ്ലാത്തൂർ ടെലഫോൺ എക്സ്-ചേഞ്ച്

• സ്റ്റേറ്റ് ബാങ്ക് ഓഫ് ട്രാവൻകൂർ
• ബ്ലാത്തൂർ പബ്ലിക്ക് വെൽഫേർ സഹകരണ സംഘം

കല്യാട് സർവീസ് സഹകരണ ബേങ്ക് സായാഹ്നശാഖ ബ്ലാത്തൂർ ടൗൺ

• ഗാന്ധിവിലാസം ഏ.എൽ.പി.സ്കൂൾ,
• ബ്ലാത്തൂർ തർബിയ്യതുൽ ഉലൂം മദ്രസ

• സി ആർ സി ഗ്രന്ഥാലയം.
• സാംസ്കാരിക നിലയം വെളിച്ചം പാറ (പി.നാരായണൻ നമ്പ്യാർ സ്മാരക മന്ദിരം)
• പള്ള്യത്ത് കുഞ്ഞിക്കണ്ണൻ സ്മാരക വായന ശാല

• മൂത്തേടം വെൽഫേർ സൊസൈറ്റി,മൂത്തേടം ശ്രീ വേട്ടക്കൊരുമകൻ ക്ഷേത്രം,ഭൈരവൻ കോട്ടം (താഴെപള്ളിയത്ത് കോട്ടം)പുതിയോതി കോട്ടം എന്നീ മൂന്നു ആരാധനാലയങ്ങളുടെ നടത്തിപ്പ് ഈ സൊസൈറ്റിക്ക് കീഴിലാണ്.
• ബ്ലാത്തൂർ ജമാ-അത്ത് ഭരണ കമ്മിറ്റി- പാറ്റക്കിൽ, കല്യാട്, ഊര്ത്തൂർ, ബ്ലാത്തൂർ, മഞ്ഞാംകരി എന്നിവിടങ്ങളിലായി 5 സബ്കമ്മറ്റികളും അവയുടെ കീഴിലായി 7 പള്ളികളും 5 മദ്രസകളും ഉള്ള ഒരു മുസ്ലിം ജമാഅത്ത് ഭരണ കമ്മിറ്റിയാണ് ഇത്. സൊസൈറ്റി ആക്റ്റ് പ്രകാരം രജിസ്ടർ ചെയ്ത് സമസ്ത കേരള ജമിയ്യത്തുൽ ഉലമയിലേക്ക് അഫിലിയേറ്റ് ചെയ്ത് പ്രവർത്തിക്കുന്നു.

• ബ്ലാത്തൂർ പബ്ലിക്ക് വെൽഫേർ സഹകരണ സംഘം- കണ്ണൂർ, തളിപ്പറമ്പ്,ഇരിട്ടി താലൂക്കുകൾ, മട്ടന്നൂർ മുനിസിപ്പാലിറ്റി, പായം, കീഴൂർ-ചാവശ്ശേരി പഞ്ചായത്തുകൾ തുടങ്ങിയ പ്രദേശങ്ങൾ പ്രവർത്തന പരിധി ആക്കി 2012 -ഇൽ അന്നത്തെ യൂത്ത് കോൺഗ്രസ്‌ കണ്ണൂർ ലോകസഭ മണ്ഡലം പ്രസിഡന്റ്‌ മുഹമ്മദ്‌ ബ്ലാത്തൂരിന്റെ അധ്യക്ഷതയിൽ ബ്ലാത്തൂർ കേന്ദ്രമാക്കി തുടങ്ങിയ സഹകരണ സ്ഥാപനം.

• കല്യാട് സർവ്വീസ് സഹകരണ ബേങ്കിന്റെ ഒരു സായാഹ്നശാഖ ബ്ലാത്തൂർ ടൗണിൽ പ്രവർത്തിക്കുന്നു. 2018 മെയ് 30 മുതൽ പ്രവർത്തനമാരംഭിച്ച ശാഖ ഉച്ചയ്ക്ക് ശേഷം 1 മണി മുതൽ രാത്രി 8 മണി വരെ പ്രവർത്തിക്കുന്നു. തിങ്കളാഴ്ച അവധിയായ സ്ഥാപനം ഞായറാഴ്ച 1 മണി മുതൽ വൈകുന്നേരം 1 മണി വരെ പ്രവർത്തിക്കും.

ബ്ലാത്തൂർ വയലിന്റെ പടിഞ്ഞാറെക്കരയിൽ ഉള്ള ഈ അമ്പലത്തിന്റെ ഭരണം ബ്ലാത്തൂർ മൂത്തേടം വെൽഫേർ സൊസൈറ്റിയുടെ കീഴിലാണ്.അഞ്ച് കാരണവന്മാരും മൂന്നു അനന്തരവന്മാരും ചേർന്ന സമിതിയും ഉണ്ട്. ബ്ലാത്തൂരിലെ ഭഗവതിക്കോട്ടം ,പള്ള്യത്ത് ഭൈരവൻ കോട്ടം എന്നിവയുടെ ഭരണവും ഈ ക്ഷേത്രത്തിനു കീഴിലാണ്. വേട്ടക്കൊരുമകൻ, ഊർപ്പഴശ്ശി തെയ്യം എന്നീ തെയ്യങ്ങൾ മാത്രമാണിവിടെ കെട്ടിയാടിക്കുന്നത്.ധനു 21 നാണ് എല്ലാ വർഷവും കളിയാട്ടം നടക്കുന്നത്

ബ്ലാത്തൂർ പടിഞ്ഞാറെ കരയിൽ പുതുതായി നരസിംഹമൂർത്തി ക്ഷേത്രം നിർമ്മാണം ആരംഭിച്ചു

തെക്കേ മൂലയിൽ സ്ഥിതിചെയ്യുന്ന ഈ കോട്ടത്ത് വലിയ തമ്പുരാട്ടി,ഭൈരവൻ,കരിയാത്തൻ,കൈക്കോളൻ,കരിവേടൻ എന്നീ തെയ്യങ്ങൾ കെട്ടിയാടിക്കപ്പെടുന്നു.ധനു 23 നാണിവിടെ കളിയാട്ടം

വടക്കേ മൂലയിലായി സ്ഥിതി ചെയ്യുന്ന ഈ കാവിൽ പ്രധാന മൂർത്തി പുതിയ ഭഗവതിയാണ്.കകൂടാതെ വീരൻ,വീരാളി,എന്നീ തെയ്യങ്ങളും ഇവിടെ കെട്ടിയാടിക്കുന്നു.മകരം 13 തീയതിയിലാണ് ഇവിടെ കളിയാട്ടം

കെളമ്പത്ത് കുടുംബത്തിന്റെ നിയന്ത്രണത്തിലുള്ള വീട്ടിലെ സ്ഥാനത്ത് കെട്ടിയാടിക്കുന്ന പ്രധാന തെയ്യം മാഞ്ഞാൾ ഭഗവതിയാണ്

പുരാതനമായ വിഷ്ണു ക്ഷേത്രം,

ബ്ലാത്തൂർ സ്കൂളിനു സമീപം

ബ്ലാത്തൂർ ടൗണിനടുത്തുള്ള കോട്ടം. പൊട്ടൻ,ഗുളികൻ,ശാസ്തപ്പൻ, വസൂരിമാല തുടങ്ങിയ തെയ്യങ്ങൾ കെട്ടിയാടിക്കുന്നു.

ബ്ലാത്തൂർ ടൗണിൽ ഉള്ള പള്ളി

ബ്ലാത്തൂർ-പയ്യാവൂർ രോഡിൽ അരയാൽ എന്ന സ്ഥലത്ത് ഉള്ള നിസ്കാരപ്പള്ളി

കുറത്തി പൊട്ടൻ തുടങ്ങിയ തെയ്യങ്ങൾ ഇവിടെ കെട്ടിയാടിക്കുന്നു.

ബ്ലാത്തൂർ കിഴക്കേക്കരയിൽ സ്ഥിതിചെയ്യുന്ന മുത്തപ്പൻ മടപ്പുര.

ബ്ലാത്തൂരിലെ വിവിധ കോട്ടങ്ങളിലും ദൈവസ്ഥാനങ്ങളിലുമായി എല്ലാ വർഷവും കെട്ടിയാടിക്കപ്പെടുന്ന പ്രധാന തെയ്യങ്ങൾ

• വേട്ടക്കൊരുമകൻ
• ഊർപ്പഴശ്ശി തെയ്യം
• വലിയ തമ്പുരാട്ടി തെയ്യം
• കരിയാത്തനും കൈക്കൊളനും
• ഭൈരവൻ തെയ്യം
• വീരൻ തെയ്യം
• വീരാളി തെയ്യം
• പുതിയ ഭഗവതി
• ധർമ്മ ദൈവം
• മാഞ്ഞാൾ ഭഗവതി
• മുത്തപ്പൻ തെയ്യം
• ശാസ്തപ്പൻ തെയ്യം
• പൊട്ടൻ തെയ്യം
• വസൂരിമാല തെയ്യം
• ഗുളിക൯ തെയ്യം ^{[പ്രവർത്തിക്കാത്ത കണ്ണി]}
• കുറത്തിയമ്മ

ഒന്നാം ലോക മഹായുദ്ധത്തിന്റെ ഫലമായി ഭക്ഷ്യക്ഷാമം രൂക്ഷമായതിനെത്തുടർന്ന് തരിശിട്ടിരിക്കുന്ന വയലുകൾ കയ്യേറി കൃഷിയിറക്കണമെന്ന് കർഷകസംഘം തീരുമാനിച്ചു. പട്ടിണിയും ഭക്ഷ്യക്ഷാമവും നേരിടാൻ ഗ്രാമങ്ങൾ തോറും പ്രൈമറി സഹകരണ സംഘങ്ങൾ (പി സി സി കൾ) സ്ഥാപിച്ചിരുന്നു. ഈ ബോർഡുകളെ തകർക്കാൻ വേണ്ടി ഈ പ്രദേശത്തെ ജന്മിമാർ ഗുണ്ടകളുടെ സഹായത്തോടെ ശ്രമങ്ങൾ നടത്തി. കാവുമ്പായി ഉൾപ്പെടുന്ന ഇരിക്കൂർ ഫർക്കയിലെ ഭൂമി മുഴുവൻ കല്ല്യാട്ടെശ്മാന്റെയും കരക്കാട്ടിടം നായനാരുടേതുമായിരുന്നു. പുനംകൃഷി ചെയ്യാനുള്ള അവകാശം നൽകണമെന്ന് കർഷകർ വർഷങ്ങളായി ആവശ്യമുന്നയിച്ചിരുന്നുവെങ്കിലും ജന്മിമാർ ചെവിക്കൊണ്ടിരുന്നില്ല. പുനം കൊത്തി കൃഷിചെയ്യാനുള്ള ശ്രമങ്ങൾ ഗുണ്ടകളും പൊലീസും പരാജയപ്പെടുത്തി. ഈ കാലത്താണ് കർഷകസംഘത്തിന്റെ പ്രവർത്തനം ഈ പ്രദേശങ്ങളിൽ സജീവമാകുന്നത്. കർഷകസംഘത്തിന്റെ നേതൃത്വത്തിൽ നിവേദനങ്ങളിലൂടെ പ്രശ്‌നം പരിഹരിക്കാൻ ശ്രമിച്ചെങ്കിലും വിജയിച്ചില്ല. ജന്മിമാർ കർഷകദ്രോഹം വർധിപ്പിച്ചു. ഈ സാഹചര്യത്തിൽ പുനം കയ്യേറി കൃഷിയിറക്കാൻ കർഷകർ തീരുമാനിക്കുകയായിരുന്നു.1946 ഒക്ടോബർ 23ന് ബ്ലാത്തൂരിലെ കർഷക നേതാവും ഇരിക്കൂർ പി സി സി ഡയരക്ടർ ബോർഡ് അംഗവുമായിരുന്ന പി നാരായണൻ നമ്പ്യാരുടെ ശവശരീരം ബ്ലാത്തൂർ ചമ്പകശേരി എന്ന വീട്ടിലെ കിണറിൽ കാണപ്പെട്ടു. യോഗശേഷം തനിയെ നടന്നുവരികയായിരുന്ന അദ്ദേഹത്തെ ജന്മിയുടെ സഹായികൾ കൊലപ്പെടുത്തി കിണറ്റിൽ കൊണ്ടുവന്നിട്ടതായി കരുതപ്പെടുന്നു. ഇത് കർഷകർക്കിടയിൽ അമർഷത്തിനും വൻ പ്രതിഷേധത്തിനും ഇടയാക്കി. ഇതേതുടർന്ന് ജന്മിയുടെ ആവശ്യപ്രകാരം കാവുമ്പായിയും പരിസരങ്ങളും മലബാർ സ്പെഷ്യൽ പോലീസിന്റെ ക്യാമ്പായി മാറി. ഈ രക്തസാക്ഷിയുടെ സ്മരണക്കായി ബ്ലാത്തൂരിൽ നാരായണൻ നമ്പ്യാർ സ്മാരക വായനശാലയും സാംസ്കാരിക നിലയവും പ്രവർത്തിക്കുന്നു.^{[അവലംബം ആവശ്യമാണ്]}

• കുഞ്ഞമ്പു ആശാരി- പുലികളെ പിടിക്കാനുള്ള നരി മഞ്ചകൾ പണിയുന്നതിൽ വിദഗ്ദ്ധൻ.*
• അനന്തൻ വൈദ്യർ- നാട്ടു പാരമ്പര്യ ചികിത്സയിൽ പേരുകേട്ട ആയുർവേദ വൈദ്യർ
• മണപ്പാട്ട് രാമൻ പണിക്കർ- കല്ല്യാട് ജന്മിക്കെതിരെ കർഷകസംഘ യോഗത്തിൽ കർഷക ചാമുണ്ടി തെയ്യം കെട്ടിയാടി ജന്മിയെ വിമർശിച്ച് തോറ്റം പാടിയ കലകാരൻ, ചിത്രകാരൻ, നാടകനടൻ, നൂറ്റിയൊന്നു തീചാമുണ്ടികെട്ടി പട്ടും വളയും നേടിയ പെരുമലയൻ.
• മനത്താനത്ത് കുഞ്ഞിരാമൻ-പാട്ടു പുസ്തകങ്ങളുംകീർത്തനങ്ങളും എഴുതി പ്രസിദ്ധീകരിച്ച ആദ്യത്തെ ബ്ലാത്തൂർ കവി
• വട്ടക്കിൽ രാമൻ- ഇരിക്കൂർ ഫർക്കയിലെ പ്രശസ്ത വിഷചികിത്സകൻ. താഴെവീട്ടിൽ കേളപ്പൻ, കുന്നാരത്ത് ഗോപാലൻ എന്നീ വിഷ ചികിത്സകരും ബ്ലാത്തൂരിൽ ജീവിച്ചിരുന്നു.
• വെള്ളുവ കമ്മാരൻ- ടിപ്പു സുൽത്താന്റെ പടത്തലവനായിരുന്ന ഇദ്ദേഹം ബ്ലാത്തൂർ പള്ള്യത്ത്തറവാട്ടിലെ അംഗമാണു.
• നിടിയിൽ നാരായണൻ. സഖാവ് എന്ന അപരനാമത്തിൽ അറിയപ്പെട്ടിരുന്ന ആദ്യ കാല കമ്മ്യൂണിസ്റ്റ് സംഘാടകൻ
• പള്ള്യത്ത് കുഞ്ഞിക്കണ്ണൻ. വളരെക്കാലം പഞ്ചായത്ത് മെംബറായിരുന്ന ഇദ്ദേഹം മെംബർ കണ്ണൻ എന്നായിരുന്നു അറിയപ്പെട്ടിരുന്നത്.ബ്ലാത്തൂർ,കല്യാട്,പയ്യാവൂർ.ഉളിക്കൽ തുടങ്ങിയ പ്രദേശങ്ങളിലും മലയോര പ്രദേശങ്ങളിലും കർഷക പ്രസ്ഥാനങ്ങളേയും കമ്മ്യൂണിസ്റ്റ് പാർട്ടിയേയും വളർത്താൻ പ്രവർത്തിച്ചു.
• ഏ.സി,ശാദുലി- സ്വാതന്ത്ര സമര സേനാനി, 2015 ജൂലയ് 20 ന് അന്തരിച്ചു

• പള്ളിയത്ത് ചന്തുകുട്ടി- കാർഷിക വികസന ബേങ്ക് മുൻ സംസ്ഥാന ഡയരക്ടർ
• മുഹമ്മദ് ബ്ലാത്തൂർ- ഇന്ത്യൻ നാഷണൽ കോൺഗ്രസ്സ് കണ്ണൂർ ജില്ല കോൺഗ്രസ് കമ്മറ്റി സെക്രട്ടറി
• നൗഷാദ് ബ്ലാത്തൂർ- യൂത്ത് കോൺഗ്രസ് സംസ്ഥാന സെക്രട്ടറി
• ടി.വി.നാരായണൻ -കേരള ശാസ്ത്ര സാഹിത്യ പരിഷത്ത് കണ്ണൂർ ജില്ല മുൻ സെക്രട്ടറി, കേന്ദ്ര നിർവാഹക സമിതി അംഗം
• വിജയകുമാർ ബ്ലാത്തൂർ - കേരള ശാസ്ത്ര സാഹിത്യ പരിഷത്ത് എഡിറ്റോറിയൽ സമിതി അംഗം, സ്വതന്ത്രസിനിമ പ്രവർത്തകൻ

1. പയശ്ശായി കുണ്ടം- നാടുവാഴിയായിരുന്ന കല്ല്യാട് യശമാനൻമാർ കുറ്റവിചാരണയ്ക്ക് ശേഷം കൊന്നവരെ കൊണ്ടുപോയിടുന്ന സ്ഥലം .ഇരിക്കൂർ ബ്ലാത്തൂർ റോഡരികിൽ .
2. ബ്രാണികുന്ന്- സമുദ്രനിരപ്പിൽ നിന്നും ഉയർന്ന സ്ഥലം.കല്ല്യാടേക്കുള്ള പ്രവേശനമാർഗ്ഗം.
3. ആലേമാവ് മൈതാനം-ബ്ലാത്തൂർ ടൗൺ നിലനിൽക്കുന്ന സ്ഥലത്തിന്റെ പഴയ പേര്.
4. ആലപ്പട്ടി-. ഗ്രാമത്തിലെ പ്രധാന കുടുംബങ്ങളായ-കരിയിൽ,പള്ളിയത്ത് എന്നിങ്ങനെയുള്ള കുടുംബക്കാരുടെ പശുക്കളെ കെട്ടാൻ നിർമ്മിച്ചിരുന്ന തൊഴുത്തുകളുടെ കൂട്ടം ഉണ്ടായിരുന്ന സ്ഥലം.
5. വാരപ്പീടിക- എശ്ശമാൻ വാരം പിരിക്കാനായി വന്നു ക്യാമ്പ് ചെയ്യുന്ന പീടിക. ഇപ്പോഴത്തെ ബസ്സ് സ്റ്റാന്റ്.

1. ചോലക്കരി- നാൽപ്പതു വർഷം മുമ്പ് വരെ വയൽ പ്രദേശവും കൃഷിയും ഉണ്ടായിരുന്ന കരി പ്രദേശം ആണിത്. ബ്ലാത്തൂർ വയലിൽ നിന്നും ഒരു കിലോമീറ്റർ മാത്രം അകലെ സ്ഥിതിചെയ്യുന്ന ഇവിടം ഇപ്പോൾ ഒരു ഗ്രാമമായി മാറിക്കഴിഞ്ഞു.
2. കുലുങ്ങാട്-
3. മഞ്ഞാംകരി-ബ്ലാത്തൂരിന്റെ കിഴക്ക് ഭാഗത്തേക്കുള്ള കുത്തനെ ഉള്ള ഇറക്കം ഇറങ്ങിയാൽ ആദ്യം കാണുന്ന സ്ഥലം ആണ് മഞ്ഞാംകരി. ഒരു രണ്ടു തലമുറ മുമ്പ് ബ്ലാത്തുരിൽ നിന്ന് കുടിയേറി പാര്തവരാന് ഈ മേഖലയിൽ മുഴുവനും. ബ്ലാത്തൂരിലെ പ്രധാന തറവാട്ടു പേരുകൾ ഇന്നും അവിടെ വീട് പേരുകൾ ആയി ഉപയോഗിക്കപ്പെടുന്നു. ജല സമൃദ്ധി കൊണ്ടും ഇടതൂർന്ന സസ്യലതാദികൾ കൊണ്ടും പ്രകൃതി രമണീയമായ പ്രദേശമാണിത്. ഈ പ്രദേശം ബ്ലാത്തൂരിനെ പയ്യാവൂർ, തിരൂർ, ഉളിക്കൽ, കാഞ്ഞിലേരി തുടങ്ങിയ പ്രദേശങ്ങളുമായി ബന്ധിപ്പിക്കുന്നു. ഈ പ്രദേശത്തുകാർ ബ്ലാത്തൂർ ഗാന്ധി വിലാസം എ. എൽ. പി. സ്ക്കൂളിൽ ആണ് പ്രാഥമിക വിദ്യാഭ്യാസം നേടുന്നത്. മഞ്ഞാംകരിയിൽ ഒരു അംഗന വാടി,ബ്ലാത്തൂർ ജമാ-അത്ത് ഭരണ കമ്മറ്റിയുടെ കീഴിൽ ഒരു മദ്രസയും ജുമാ-അത്ത് പള്ളിയും പ്രവർത്തിക്കുന്നുണ്ട്. . 2012 ജൂൺ മുതൽ മഞ്ഞാംകരി മദ്രസയിൽ ഒരു ഇംഗ്ലീഷ് മീഡിയം ആരംഭിച്ചു. രണ്ടു നിലകളുള്ള സ്വന്തം കെട്ടിടത്തിൽ രാജീവ് ഗാന്ധി ആർട്സ് ആൻഡ്‌ സ്പോർട്സ് ക്ലബ്‌ പ്രവർത്തിക്കുന്നു.
4. കക്കട്ടും പാറ

• തവളപ്പാറ
• വലിയപന്നിപ്പാറ
• ചെറിയ പന്നിപ്പാറ
• മരുതും പാറ
• പൊനാമ്പള്ളി
• നമ്പൂതിരിപ്പാറ
• വെളിച്ചമ്പാറ
• തുക്കപ്പാറ

പോലീസ് ഗ്രാമം എന്ന പേരിലും ബ്ലാത്തൂർ അറിയപ്പെടുന്നു.കേരളത്തിൽ ഏറ്റവും കൂടുതൽ പോലീസുകാരുള്ള ഗ്രാമമാണിത്.^{[അവലംബം ആവശ്യമാണ്]} നാൽപ്പത്തിയഞ്ച് പേർ പോലീസ് സേനയിൽ സേവനം ചെയ്യുന്നു.എല്ലാവരും ബന്ധുക്കളും ആണെന്ന പ്രത്യേകതയും ഉണ്ട്.വളരെ കുറച്ച് അംഗസംഖ്യയുള്ള ഒരു കൊച്ചുപ്രദേശത്തുനിന്ന് ഇത്രയധികം പോലീസുകാർ ജോലി ചെയ്യുന്നത് കേരളത്തിൽ മറ്റെങ്ങുമില്ല.^{[അവലംബം ആവശ്യമാണ്]}

മണിയാണി അല്ലെങ്കിൽ എരുമാൻ, യാദവ എന്ന ഹിന്ദു ജാതി വിഭാഗത്തിൽ പെട്ടവരാണു ബഹു ഭൂരിപക്ഷം ജനങ്ങളും. തീയ്യർ, ആശാരി, കണിശൻ, കൊല്ലൻ, പുലയർ എന്നീ ജാതിയിൽ പെട്ടവരും ഈ ഗ്രാമത്തിൽ ഉണ്ട്. മുസ്ലിം മതത്തിൽ പെട്ടവർ ഇരുപത് ശതമാനത്തോളം വരും. ക്രിസ്ത്യൻ മത വിഭാഗത്തിൽ പെട്ട ആരും ഗ്രാമത്തിൽ ഇല്ല.^{[അവലംബം ആവശ്യമാണ്]} ഒരു നമ്പൂതിരി കുടുംബവും ഉണ്ട്.

കുട്ടമത്ത് കുന്നിയൂർ കുഞ്ഞികൃഷ്ണക്കുറുപ്പ് രചിച്ച ബാലഗോപാലൻ നാടകം ബ്ലാത്തൂരിൽ 1940 കാലത്ത് അവതരിപ്പിച്ചിരുന്നു. കെ. ദാമോദരന്റെ പാട്ടബാക്കി നാടകവും കർഷകസംഘസമ്മേളനത്തോടനുബന്ധിച്ച് അവതരിപ്പിച്ചിട്ടുണ്ട്.

1. സി ആർ.സി.ഗ്രന്ഥാലയം- വളരെ വർഷമായി സജീവമായി പ്രവർത്തിക്കുന്ന സാംസ്കാരിക സംഘം
2. കേരള ശാസ്ത്ര സാഹിത്യ പരിഷത്ത് ബ്ലാത്തൂർ യൂനിറ്റ്- 1985 മുതൽ സജീവം.കണ്ണൂർ ജില്ലയിലെ പ്രധാന യൂണിറ്റുകളിൽ ഒന്ന്.
3. പീപ്പിൾസ് സ്പോർട്സ് ആന്റ് ആർട്സ് ക്ലബ്ബ് (പി.എസ്.ഏ.സി) -1975 മുതൽ 80 വരെ സജീവമായി പ്രവർത്തിച്ചിരുന്ന സാംസ്കാരിക സംഘടന.നിരവധി നാടകങ്ങൾ ഈ സംഘം അവതരിപ്പിച്ചിട്ടുണ്ട്.

1. കളിയരങ്ങ്- സി .ആർ. സി യുടെ നാടകവിഭാഗം
2. സംസ്കാര ബ്ലാത്തുർ.ബ്ലാത്തൂരിലെ സാമൂഹിക- സാംസ്കാരിക കൂട്ടായ്മ
3. ആക്റ്റീവ് യങ്സ്റ്റേഴ്സ് ഓർഗനൈസേഷൻ(ഏ.വൈ.ഒ)-1983 മുതൽ കുറച്ച് വർഷം സജീവം
4. റെഡ് സ്റ്റാർ സ്പോർട്സ് ആന്റ് ആർട്സ് ക്ലബ്ബ്
5. സമഭാവന

1. ഭാരതീയ ജനതാ പാർട്ടി (BJP)
2. ഇന്ത്യൻ നാഷണൽ കോൺഗ്രസ്സ് (INC)
3. കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്) (CPIM)
4. കമ്മ്യൂണിസ്റ്റ് പാർട്ടി ഓഫ് ഇന്ത്യ (CPI)
5. ഇന്ത്യൻ യൂണിയൻ മുസ്ലിം ലീഗ് (IUML)

1. ഹിന്ദു ഐക്യവേദി Archived 2012-04-14 at the Wayback Machine.
2. സമസ്‌ത കേരള സുന്നി സ്‌റ്റുഡന്റ്‌സ്‌ ഫെഡറേഷൻ (SKSSF)
3. അഖില കേരള യാദവ സഭ

താഴെപ്പറയുന്ന വ്യക്തികൾ ബ്ലാത്തൂർ സ്വദേശികളാണ്.

1. രമേശൻ ബ്ലാത്തൂർ ചെറുകഥാകൃത്ത്,നോവലിസ്റ്റ് .
2. വിജയകുമാർ ബ്ലാത്തൂർ ഡോക്കുമെന്ററി സിനിമ സംവിധായകൻ,ശാസ്ത്ര സാഹിത്യകാരൻ, സിനിമ നിരൂപകൻ
3. തമ്പാൻ.സി.വി. നാടക നടൻ, സിനിമ നടൻ
4. കൃതിക സുരേഷ്- അഭിനേത്രി
5. നൗഫൽ ബ്ലാത്തൂർ സിനിമ തിരക്കഥാകൃത്ത്, നാടക സംവിധായകൻ . മോഹൻലാൽ അഭിനയിച്ച റെഡ് വൈൻ എന്ന സിനിമയുടെ തിരക്കഥ ഇദ്ദേഹമാണ് നിർവഹിച്ചത്

• 
  ഓണാഘോഷം
• 
  ഓണാഘോഷം അമ്പലക്കണ്ടിയിൽ
• 
  മാഞ്ഞാൾ ഭഗവതി, കെളമ്പത്ത് കുടുംബക്ഷേത്രം
• 
  തമ്പുരാട്ടി തെയ്യം
• ബ്ലാത്തൂർ വേട്ടക്കൊരുമകൻ ക്ഷേത്രം
  ബ്ലാത്തൂർ വേട്ടക്കൊരുമകൻ ക്ഷേത്രം
• 
  ബ്ലാത്തൂർ താഴേക്കോട്ടം
• 
  ബ്ലാത്തൂർ വേട്ടക്കരുമകൻ ക്ഷേത്രം
• 
  ബ്ലാത്തൂർ വേട്ടക്കൊരുമകൻ തെയ്യം
• 
  തമ്പുരാട്ടി തെയ്യം
• 
  പുതിയ ഭഗവതി തെയ്യം
• വസൂരിമാല തെയ്യം
  വസൂരിമാല തെയ്യം
• 
  ബ്ലാത്തൂർ വയൽ
• 
  ക്ഷേത്രക്കുളത്തിൽ കുട്ടികൾ കുളിക്കുന്നു
• 
  ഓണാഘോഷം
• 
  മുയ്യേരി വെള്ളച്ചാട്ടം
• 
  വേട്ടക്കരുമകൻ ക്ഷേത്രക്കുളം
• 
  മുയ്യേരി വെള്ളച്ചാട്ടം

1. ↑ "ആർക്കൈവ് പകർപ്പ്". Archived from the original on 2016-04-03. Retrieved 2016-04-05.
2. ↑ "ആർക്കൈവ് പകർപ്പ്". Archived from the original on 2014-07-07. Retrieved 2014-07-04.
3. ↑ http://epaper.newindianexpress.com/297294/The-New-Indian-Express-Kannur/02-07-2014#page/3/2
4. ↑ http://www.deshabhimani.com/epaper.php?page=106192&ddate=02-07-2014&edition=Kannur^{[പ്രവർത്തിക്കാത്ത കണ്ണി]}
5. ↑ http://www.thehindu.com/news/cities/kozhikode/biodiversity-survey-finds-rare-species-in-laterite-hills/article6169682.ece

Blathur എന്ന വിഷയവുമായി ബന്ധപ്പെട്ട ചിത്രങ്ങൾ വിക്കിമീഡിയ കോമൺസിലുണ്ട്.

ക സ തി കണ്ണൂർ ജില്ല
ജില്ലാ കേന്ദ്രം: കണ്ണൂർ
കണ്ണൂർ	കണ്ണൂർ അഴീക്കോട് · കണ്ണൂർ · കണ്ണൂർ കന്റോണ്മെന്റ് · ചിറക്കൽ · പള്ളിക്കുന്ന് · പുഴാതി · വളപട്ടണം · കണ്ണാടിപ്പറമ്പ് എടക്കാട് അഞ്ചരക്കണ്ടി · എളയാവൂർ · ഇരിവേരി · മാവിലായി · കാടാച്ചിറ · കാഞ്ഞിരോട് · ചേലോറ · ചാല · മുഴപ്പിലങ്ങാട് · തോട്ടട · പെരളശ്ശേരി · മുണ്ടേരി · നാറാത്ത് · വാരം
തളിപ്പറമ്പ്	തളിപ്പറമ്പ് ആലക്കോട്‌ · ചപ്പാരപ്പടവ്‌ · ചെങ്ങളായി · ചെറുകുന്ന് · കല്ല്യാശ്ശേരി · കണ്ണപുരം · കുറുമാത്തൂർ · നടുവിൽ · നാറാത്ത്‌ · പാപ്പിനിശ്ശേരി · പരിയാരം · പട്ടുവം · ഉദയഗിരി പയ്യന്നൂർ പയ്യന്നൂർ · ചെറുപുഴ · ചെറുതാഴം · എരമം · കുറ്റൂർ · ഏഴോം · കടന്നപ്പള്ളി · പാണപ്പുഴ · കാങ്കോൽ · ആലപ്പടമ്പ · കരിവെള്ളൂർ - പെരളം · കുഞ്ഞിമംഗലം · മാടായി · മാട്ടൂൽ · പെരിങ്ങോം · വയക്കര · രാമന്തളി ഇരിക്കൂർ ഇരിക്കൂർ · ഏരുവേശ്ശി · കൊളച്ചേരി · കുറ്റ്യാട്ടൂർ · മലപ്പട്ടം · മയ്യിൽ · പടിയൂർ-കല്യാട് · പയ്യാവൂർ · ശ്രീകണ്ഠാപുരം · ഉളിക്കൽ
തലശ്ശേരി	തലശ്ശേരി തലശ്ശേരി · ചൊക്ലി · ധർമ്മടം · എരഞ്ഞോളി · കതിരൂർ · കരിയാട്‌ · കോട്ടയം · പെരിങ്ങളം · പിണറായി ഇരിട്ടി മട്ടന്നൂർ · ആറളം · അയ്യൻ കുന്ന് · കീഴല്ലൂർ · കീഴൂർ‍ · ചാവശ്ശേരി · കൂടാളി · പായം · തില്ലങ്കേരി കൂത്തുപറമ്പ് കൂത്തുപറമ്പ് · ചിറ്റാരിപ്പറമ്പ്‌ · കുന്നോത്തുപറമ്പ്‌ · മാങ്ങാട്ടിടം · മൊകേരി · പന്ന്യന്നൂർ · പാനൂർ · പാട്യം · തൃപ്പങ്ങോട്ടൂർ · വേങ്ങാട്‌ പേരാവൂർ പേരാവൂർ · കണിച്ചാർ · കേളകം · കോളയാട്‌ · കൊട്ടിയൂർ · മാലൂർ · മുഴക്കുന്ന്
ക സ തി വിനോദസഞ്ചാര കേന്ദ്രങ്ങൾ സെന്റ് ആഞ്ജലോ കോട്ട · തലശ്ശേരി കോട്ട · മുഴപ്പിലങ്ങാട് ബീച്ച് · പയ്യാമ്പലം · ഏഴിമല · മലയാള കലാഗ്രാമം · പഴശ്ശി അണക്കെട്ട് · പൈതൽ മല · ഗുണ്ടർട്ട് ബംഗ്ലാവ് · പറശ്ശിനിക്കടവ് പാമ്പുവളർത്തൽ കേന്ദ്രം · മാപ്പിള ബേ · പറശ്ശിനിക്കടവ് മുത്തപ്പൻ ക്ഷേത്രം · തിരുവങ്ങാട് ക്ഷേത്രം · തൃച്ചംബരം ക്ഷേത്രം · തലശ്ശേരി മോസ്ക് · മടായി മോസ്ക് · കൊട്ടിയൂർ · ജഗന്നാഥ ക്ഷേത്രം · സെന്റ് ജോൺസ് പള്ളി · അന്നപൂർണ്ണേശ്വരി ക്ഷേത്രം · മീൻ‌കുന്ന് കടപ്പുറം · ധർമ്മടം ദ്വീപ്
ആലപ്പുഴ · എറണാകുളം · ഇടുക്കി · കണ്ണൂർ · കാസർഗോഡ് · കൊല്ലം · കോട്ടയം · കോഴിക്കോട് · മലപ്പുറം · പാലക്കാട് · പത്തനംതിട്ട · തിരുവനന്തപുരം · തൃശ്ശൂർ · വയനാട്