Светлана Васильевна Строганова
Светлана Строганова
Марий Эл Республик да Россий Федераций кӱкшытысӧ кино да театр актриса Светлана Строганова. П. Васильевын фотожо.
Шочын	1974 ий 21 ага(1974-05-21) (50 ий)
Шочмо вер	РСФСР, Марий АССР, У Торъял кундем, Шӱвылак ял
Тыршымаш алан	мурызо
Чап пӧлек да премий	Марий Эл Республикын сулло артистше, Марий Эл Республикысе М. Шкетан лӱмеш Кугыжаныш премий, Йыван Кырля лӱмеш театр премий (2005, 2007)

Светлана Строганова (Светлана Васильевна Строганова) (1976 ага 21, РСФСР, Марий АССР, У Торъял кундем, Шӱвылак ял) – марий артистка, мурызо, радиовӱдышӧ, Йыван Кырля лӱмеш театр премийын лауреатше (2005, 2007)), Марий Эл Республикын сулло артистше (2006), Марий Эл Республикысе М. Шкетан лӱмеш Кугыжаныш премийын лауреатше (2007), Марий Эл Республикын Калык артистше (2014).

Светлана Строганова 1976 ийын ага тылзын 21-ше кечынже Марий АССР У Торъял кундем Шӱвылак ялеш шочын.

• 10 класс марте У Торъялысе кыдалаш школышто тунемын.
• 11 классым Тошто Торъял кыдалаш школышто пытарен.
• 1993–1994 ийлаште Олег Иркабаевын вуйлатыме почеш Марий самырык театр пеленысе театр студийыште артист мастарлыкым поген.
• 1994 ийыште М.С.Щепкин лӱмеш кӱшыл театр училищыш (Моско ола) тунемаш пурен, училищым йошкар диплом дене пытарен.
• 2007 ийыште Марий кугыжаныш университетым «Менеджмент организации» специальность дене тунем лектын.

М. Шкетан лӱмеш Марий кугыжаныш драме театрыште икымше рольжо – Маюк «Ачийжат-авийжат» спектакльыште. Моткоч кугу пагалымашым Светлана Строганова Сергей Николаевын пьесыж почеш шындыме «Салика» спектакльыште тӱҥ рольым чоҥымо дене сулен. 1999–2000 ийласе театр тургым иктешлыме почеш Светлана Строганова «Надежда» премий дене палемдалтын.

Талантан актриса семын гына огыл, виян йӱкан мурызо семынат Светлана Строганова ойыртемалтеш. Тӱҥалтышыште театрысе спектакльлаште муро-влакым йоҥгалтарен, вара Марий Эл Радион ротацийышкыж «Мыйын мландем» муро логалын. Тылеч вара Светлана Васильевна чӱчкыдын концертлаште шкешотан мурызо семын мура. 2001 ийыште Моско олаште А.Миронов лӱмеш калык-влак кокласе актёр муро фестивальыште шке мастарлыкшым ончыкта, ты жапыштак Угарман оласе «Поют актеры драматических театров» фестивальын дипломантше лиеш.

2005 ийыште Светлана Строгановам кумдан палыме российысе кинорежиссёр Александр Рогожкин «Перегон» фильмышкыж Валентинан рольжым модаш ӱжын. Вес ийын тиде фильм «Созвездие» киноактёр-влак калык-влак кокласе фестиваль программышкыже пурен. Тиде рольлан Светлана «Эн сай кокымшо план ӱдырамаш роль» номинацийыште сеҥен.

• 2005 ий – «Перегон» – Валентина
• 2010 ий – «Салика» телеспектакль – Салика

• Йыван Кырля лӱмеш театр премийын лауреатше «Эн сай ӱдырамаш роль» номинацийыште С.Николаевын «Салика» спектакльыште Саликан рольжым чоҥымылан» (2005)^[1].
• Тӱнямбалсе киноактёр-влак «Созвездие» фестивальын Дипломжо «Эн сай кокымшо план ӱдырамаш роль» номинацийыште Александр Рогожкинынна «Перегон» киношто Валентинан рольжым чоҥымылан» (2006)^[1].
• Марий Эл Республикын сулло артистше (2006)^[1].
• Йыван Кырля лӱмеш театр премийын лауреатше «Эн сай кокымшо план ӱдырамаш роль» номинацийыште В.Шекспирын «Кожла кокласе омо» («Сон в летнюю ночь») спектакльыште Ошвикин (Гермиян) рольжым чоҥымылан» (2007)^[1].
• Марий Эл Республикысе М. Шкетан лӱмеш Кугыжаныш премийын лауреатше «В.Шекспирын «Кожла кокласе омо» («Сон в летнюю ночь») спектакльыште рольым чоҥымылан» (2007)^[1].
• Марий Эл Республикын Калык артистше (2014)^[1].

• Строганова Светлана Васильевна | Марийский национальный театр драмы им.М.Шкетана.(руш)
• Строганова Светлана Васильевна | Союз театральных деятелей. Марийское региональное отделение.(руш)
• Светлана Строганова | ВКонтакте.(руш)

1. Марийская биографическая энциклопедия / Авт.-сост. В. А. Мочаев. – 2-е изд. – Йошкар-Ола: Марийский биографический центр, 2017. – 606 с. – 1500 экз С. 425.

1. ↑ ^{1,0 1,1 1,2 1,3 1,4 1,5} Строганова Светлана Васильевна | Марийский национальный театр драмы им.М.Шкетана.