Schlass Aansebuerg

D'Schlass Aansebuerg vu vir
Typ	Schlass
Land	Lëtzebuerg
Gemeng	Helperknapp
Koordinaten	49°42'3"N, 6°2'48"O
Proprietär	Sûkyô Mahikari
Statut	Klasséiert Monument

D'Schlass vun Aansebuerg (och alt "Ënnescht Schlass" oder "Grousst Schlass" genannt, fir et vun der Buerg Aansebuerg z'ënnerscheeden) ass e Schlass bei Aansebuerg, dat 1639 vum Schmelzhär Thomas Bidart baue gelooss gouf.^[1]

1639 huet den Thomas Bidart den zentralen Deel vum haitege Schlass baue gelooss, deen deemools en Haus mat Tierm an enger Mauer ronderëm war, vun deenen der haut nach zwou do stinn. Hien huet et Maison des Forges genannt.

1719 gouf d'Haus vun der Famill Marchant, déi et geierft hat, ëmgebaut an e Schlass wéi et haut nach do steet: Zwéi Fligele goufen op de Säite bäigebaut an op der Südentrée gouf e sculptéierte Bou opgeriicht, deem seng Statuen déi 4 Kontinenter symboliséieren. De Gaart gouf ugeluecht, mat Blummebeeter an engem Sprangbur, a mam Schlass duerch eng Arkad verbonnen. Tëscht 1740 a 1750 huet de Lambert Joseph de Marchant et d'Ansembourg d'Gäert weider ausgebaut an d'Gebaier op der Nordsäit vum Haff zu Ställ an Dingschtwunningen ëmgebaut. 1759, huet de Grof Lambert Joseph eng impressionant Barockpaart ubrénge gelooss, mat de Wope vun den de Marchant d'Ansembourg et Velbruck.^[1],[2]

Zanter 1987 gehéiert d'Schlass der japanescher spiritueller Organisatioun Sûkyô Mahikari, déi et mat der Ënnerstëtzung vum Service des sites et monuments nationaux restauréiere gelooss huet.

Et ass zanter dem 18. Mäerz 1988 als nationaalt Monument klasséiert.^[3]

D'Gäert vum Schlass sinn op fir de Public.

• 
  Haapt-Entréespaart
• 
  Südfassad
• 
  d'Gäert, no Oste gekuckt
• 
  Haaptpaart

• Buerg Aansebuerg
• Lëscht vun de Lëtzebuerger Buergen a Schlässer
• Lëscht vun den nationale Monumenter an der Gemeng Helperknapp

Commons: Schlass Aansebuerg – Biller, Videoen oder Audiodateien

• Grand Château d'Ansembourg (fr)
• Sûkyô Mahikari - d'Websäit vum Siège fir Europa an Afrika zu Aansebuerg (de)

1. ↑ ^{1,0 1,1} "Jardin du grand château d'Ansembourg", Service des Sites et Monuments Nationaux.
2. ↑ "Plus de details sur l'histoire...", Grand Château d'Ansembourg.
3. ↑ Institut national pour le patrimoine architectural: Liste des immeubles et objets bénéficiant d'une protection nationale. (Lescht Versioun vum 3. Juli 2024).