Buerg Aansebuerg

D'Buerg vun Aansebuerg
Typ	Buerg
Land	Lëtzebuerg
Gemeng	Helperknapp
Plaz	Aansebuerg
Koordinaten	49°42'10,5"N, 6°2'15,5"O
Statut	Klasséiert Monument

D'Buerg Aansebuerg (heiansdo "Al Buerg" genannt, fir se vum Schlass Aansebuerg auserneenzehalen) ass eng mëttelalterlech Buerg bei der Uertschaft Aansebuerg. Se ass nach ëmmer bewunnt^[1].

Déi eelst erhale Quell, an där vun der Buerg rieds geet, ass vun 1135, wéi den Hubert (Humbert) vun Aansebuerg do Här war. D'Befestegunge sinn héchstwarscheinlech aus der Mëtt vum 12. Joerhonnert, déi vu virdru missten aus Holz gewiescht sinn.

Uganks vum 14. Joerhonnert goufen, ënner dem Jofroit vun Aansebuerg, d'Paart vum südwestlechen Tuerm an den nërdleche Buergfrid gebaut. Zanter den Zäite vum Jacob II. vu Raville-Aansebuerg, schénge keng gréisser Ännerunge méi un der Buerg gemaach ginn ze sinn. Iwwer der Haaptentrée steet d'Joreszuel 1565.

1683 gouf d'Schlass warscheinlech vun de franséischen Truppe vum Maréchal de Boufflers beschiedegt. Am 17. Joerhonnert hunn d'Famille Bidart a Marchant d'Ansembourg, déi och d'Schlass Aansebuerg baue gelooss hunn, d'Buerg restauréiert^[2].

D'Buerg gehéiert hautdesdaags dem Grof Gaston-Gaëtan de Marchant et d'Ansembourg, deen nom Doud vu sengem Papp an d'Buerg geplënnert ass. Enn 2008 huet d'Lëtzebuerger Regierung d'Bibliothéik an d'Archive vun der Buerg fir 3 Milliounen Euro opkaaft, wouvun d'Haaptstéck de Codex Mariendalensis war, eng mëttelalterlech Handschrëft iwwer d'Liewe vun der Yolanda vu Veianen, déi de Linguist Guy Berg 1999 do erëmfonnt hat^[3].

Den 29. Januar 2010 gouf d'Buerg op d'Lëscht vun de klasséierte Monumenter als nationaalt Monument agedroen^[4].

2011 goufe gréisser Renovatiounsaarbechten ausgeféiert. En Deel vum Gebai gëtt elo als Nobelhotel benotzt.

D'Buerg ass bewunnt a kann net besicht ginn.

• Lobo, Paulo, 2011. 12 Bemerkenswerte Gebäude in Luxemburg: 8. Das alte Schloss von Ansemburg. S. 76-85, Luxédit, ISBN 978-99959-733-0-8

• Schlass Aansebuerg
• Lëscht vun de Lëtzebuerger Buergen a Schlässer
• Lëscht vun den nationale Monumenter an der Gemeng Helperknapp

Commons: Ansembourg Castle – Biller, Videoen oder Audiodateien

1. ↑ "Ansemburg", Tal der 7 Schlösser. (de)
2. ↑ "Die Burg Ansemburg", www.darkplaces.org. (de)
3. ↑ "Der Graf von Ansemburg heiratet", Luxemburger Wort, 25 August 2010. (de)
4. ↑ Institut national pour le patrimoine architectural: Liste des immeubles et objets bénéficiant d'une protection nationale. (Lescht Versioun vum 3. Juli 2024).