Biblia de Ferrara
La Biblia de Ferrara es una tresladasiyon a la lingua djudeo-espanyola del Tanah. Fue publikada por primera vez en la sivdad italiana de Ferrara enel anyo 1553. La tresladasiyon fue echa para su uzo por los sefardis i fue echa por el portugez Avraam Usque (konosido tambien komo Duarte Pinel), i el espanyol Yom-Tov Atias (konosido komo Jeronimo de Vargas). Esta tresladasiyon era dedikada al Duke de Ferrara, Ercole II d'Este. La Biblia de Ferrara es una versiyon amijorada de una tresladasiyon ke ya egzistia entre los sefardis desde aze munchos anyos. Fueron publikadas dos edisiones; una para el Duke de Ferrara i la otra, echa espesialmente para los djudios, dedikada a la sinyora Gracia Mendes Nasi. Dempués, la Biblia de Ferrara fue yevada a la empremeríya enel syéklo XVII en la sivdad de Amsterdam.
La lingua uzada en esta tresladasion del Tanah es mas serkana a la sentaksis del ivrit ke a la lingua djudeo-espanyola de la kaleja. Una diferensia kon otras tresladasiyones a la lingua djudeo-espanyola es ke se uzó el alefbet latino i no el alefbet ebreo, kon markas i aksanes para amostrar todos los sonetes; para skrivir el Shem ameforash, fue uzado "A.", deke los djudios no dizen el nombre de El Dio, egzepto kuando azen tefilá o meldan teilim.
La Biblia de Ferrara fue endemas una fuente uzada por el kristyano Casiodoro de Reina kuando tresladó el Tanah para azer la Biblia Kristyana en lingua kastilyana.
Referensias
[trocar | trocar el manadero]Atamientos eksternos
[trocar | trocar el manadero]- La Megilat Ester en lingua djudeo-espanyola, topada en la Biblia de Ferrara. Institut Sépharade Européen
Text is available under the CC BY-SA 4.0 license; additional terms may apply.
Images, videos and audio are available under their respective licenses.
