Քրդերը Հայաստանում
| Քրդերը Հայաստանում | |||
|---|---|---|---|
 | |||
| Ընդհանուր քանակ | |||
|
37 470 (2011[1]) | |||
| Բնակեցում | |||
| |||
| Լեզու(ներ) | |||
| քրդերեն (Կուրմանջի), հայերեն, ռուսերեն | |||
| Հավատք(ներ) | |||
| Եզդիականություն |
Քրդերը Հայաստանում (քրդ.՝ Kurdên Ermenistanê) կազմում են հետխորհրդային տարածքում բնակվող պատմականորեն նշանակալի քուրդ բնակչության զգալի մասը, որն ապրում է հիմնականում Հայաստանի արևմտյան մասում։ Նախկին ԽՍՀՄ-ի քրդերը Նոր տնտեսական քաղաքականության տարիներին՝ 1920-ական թվականներին, սկսել են քրդերեն գրել հայերեն տառերով, ապա 1927 թվականին՝ լատինատառ, ապա 1945 թվականին՝ կյուրեղագիր, իսկ հիմա՝ և՛ կյուրեղագիր, և՛ լատինատառ[2]։
Կորենիզացիայի քաղաքականության տարիներին խորհրդային կառավարությունը Հայաստանի քրդերին ապահովել է ռադիոյով, ինչպես նաև մայրենի լեզվով կրթությամբ և մամուլով։ Խորհրդային Հայաստանի իշխանությունները հիմնել են քրդերեն «Ռյա թազա» (Նոր ուղի) թերթը, ինչպես նաև Երևանից հեռարձակվող քրդալեզու ռադիո։ Քրդերի մասին առաջին ֆիլմը՝ Զարեն, նկարահանվել է 1926 թվականին Հայֆիլմի կողմից, իսկ առաջին քրդական վեպը՝ «Քուրդ հովիվը», որը գրվել է Արաբ Շամիլովի կողմից, հրապարակվել է 1935 թվականին Երևանում։ Երևանի պետական համալսարանի արևելագիտության ֆակուլտետում կա քրդական բաժին[2]։
ՀՀ 2011 թվականի մարդահամարի տվյալների համաձայն՝ Հայաստանում բնակվում էր 35 308 եզդի և 2 162 քուրդ բնակիչ[1]։ Քրականան և եզդիական համայնքներն ունեն մեկական ներկայացուցիչ ՀՀ Ազգային ժողովում։ Ազգային ժողովում քրդական համայնքը ներկայումս ներկայացնում է Կնյազ Հասանովը, իսկ եզդիական համայնքը՝ Ռուստամ Բաքոյանը[3][4]։
Քրդերը Հայաստանում
[խմբագրել | խմբագրել կոդը]Քրդական ծագմամբ Շադդադյանների հարստությունը, որը տիրել է ժամանակակից Հայաստանի Հանրապետության տարածքի որոշ հատվածների X-XII դդ․, Արևելյան Հայստանում քրդերի ներկայության առաջին վկայությունն է[5]։ Միջնադարում քրդերի ներկայությունը Հարավային Կովկասում փոքր է եղել[5]։ Քրդական ցեղախմբեր XVIII դարում հարավից սկսել են չվել Արևելյան Հայաստան, հաստատվելով հիմնականում Արարատյան դաշտավայրում[5]։ Որոշ մուսուլման քրդեր հաստատվել էին Արևելյան Հայաստանում XIX դարի սկզբին, սակայն նրանց մեծ մասը մինչև XX դարի սկիզբը վերաբնակվել էր ժամանակակից Ադրբեջանի Հանրապետության տարածքում։ XIX դարի երկրորդ կեսին և XX դարի սկզբին եզդիները հաստատվել են Անդրկովկասում՝ փախչելով Օսմանյան կայսրությունում թուրքերի և քրդերի իրականացրած հալածանքներից[5][6]։
Հայաստանի առաջին հանրապետության տարիներին քրդերը ստացել են քաղաքական իրավունքներ․ Հայաստանի ազգային ժողովի կազմում ընտրվել է նաև քրդական համայնքի ներկաչացուցիչ, իսկ որոշ քրդեր դարձել են հայկական բանակի սպաներ և կազմավորել քրդական կամավորական գնդեր[7]։ Քրդերի մի մասը, մասնավորապես Կարսի մարզում, միացել է Հայաստանի թյուրքախոս բնակչության խռովություններին ընդդեմ Հայաստանի Հանրապետությանը[8]։
Խորհրդային տարիներին Հայաստանում մեծ թվով քրդերեն գրականություն է հրապարակվել, ստեղծվել են ազգային դպրոցներ և ռադիո։ Ըստ Սովետական մեծ հանրագիտարանի՝ Խորհրդային Հայաստանը քրդական գրականության հիմնական կենտրոնն է եղել[9]։ 1925 թվականին Հայաստանի քրդերի համար բացվել են ավելի քան 50 դպրոցներ[10]։
1937 թվականին՝ Ստալինյան բռնաճնշումներ ժամանակ, Հայաստանի շատ քրդեր դարձել են դրանց զոհը և աքսորվել Հայաստանից դեպի Սիբիր և կենտրոնական Ասիայի հանրապետություններ[5][11]։
Ղարաբաղյան հակամարտության բռնկումից հետո Հայաստանում բնակվող քրդերի մեծ մասը լքել է երկիրն ադրբեջանցիների հետ միասին, որոնց հետ փոխկապակցված էին կրոնական, մշակութային և բարեկամական հարաբերություններով[6]։ Այնուհետ նրանք մնացել են Ադրբեջանում կամ արտագաղթել են Ռուսաստանի Դաշնություն (մասնավորապես՝ Կրասնոդար)[5][12]։ Այժմ Հայաստանում չափազանց քիչ քրդեր են մնացել (ըստ քրդագետ Գառնիկ Ասատրյանի՝ 1998 թվականի դրությամբ նրանց թիվը մոտ հարյուր հոգի էր կազմում)[13]։
Խորհրդային ժամանակաշրջանում քրդերն ու եզդիները նույնացվում էին։ 1980-ական թվականներին եզդիական համայնքի որոշ առաջնորդներ պահանջել են իշխանություններից, որպեսզի եզդիները ճանաչվեն իբրև ինքնուրույն և առանձին ազգություն։ 1989 թվականի խորհրդային վերջին մարդահամարի տվյալներով, նախկինում քուրդ համարվող 60 000 հոգուց 52 700 հոգի որպես եզդի է ներկայացել[6]։ 1989 թվականից ի վեր մարդահամարներում քրդերը և եզդիները առանձին են հաշվվում, իսկ եզդիների բարբառը, որը քուրմանջիի բարբառ է, համարվում է առանձին լեզու՝ եզդիերեն (էզդիկի)[6][14]։
Այնուամենայնիվ, որոշ եզդիներ չեն ժխտում իրենց մշակութային և այլ կապերը քրդերի հետ և կամ իրենք իրենց քուրդ են համարում[12][14][15][16]։
Քրդական հետազոտությունների կենտրոնի տնօրենի խոսքով՝ Հայաստանում քրդերի հետ կապված իրավիճակն այսօր նորմալ է և նրանց հանդեպ բացահայտ անհանդուրժողականություն չկա[12]։ Հայաստանի ընտրական օրենսգիրքը քրդական փոքրամասնության ներկայացուցչության համար Ազգային ժողովում նախատեսում է մեկ տեղ[17]։
Ժողովրդագրություն
[խմբագրել | խմբագրել կոդը].png)
| Մարզ | 2001[18] | 2011[19] | ||
|---|---|---|---|---|
| Քանակ | % | Քանակ | % | |
| Հայաստան | 42,139 | 1.3% | 37,470 | 1.2% |
| Արմավիր | 17,793 | 6.4% | 17,063 | 6.4% |
| Արագածոտն | 7,251 | 5.2% | 7,090 | 5.3% |
| Արարատ | 5,972 | 2.2% | 5,001 | 1.9% |
| Երևան | 4,825 | 0.4% | 3,361 | 0.3% |
| Կոտայք | 4,326 | 1.6% | 3,305 | 1.3% |
| Շիրակ | 981 | 0.3% | 763 | 0.3% |
| Լոռի | 802 | 0.3% | 663 | 0.3% |
| Գեղարքունիք | 124 | 0.1% | 114 | 0% |
| Տավուշ | 60 | 0% | 44 | 0% |
| Սյունիք | 4 | 0% | 26 | 0% |
| Վայոց ձոր | 1 | 0% | 10 | 0% |
Հայ-քրդական մշակութային կապեր
[խմբագրել | խմբագրել կոդը]
Ռուսական կայսրությունում քրդերի և եզդիների վերաբերյալ առաջին գիտական աշխատությունը գրել է Խաչատուր Աբովյանը («Քրդեր և եզդիներ» Երկերի լիակատար ժողովածու, հ․ 8, Երևան, 1958)[20]։
Հայտնի հայ երգահան Կոմիտասը գրի է առել հայկական, քրդական և թուրքական մի շարք ազգային երգեր[21], իսկ 1897 թվականին ավարտել է Բեռլինի Հումբոլդտի համալսարան, որտեղ ուսումնասիրում էր քրդական երաժշտություն։
Հայ բանաստեղծ Հովհաննես Շիրազը, օգտագործելով քրդական լեգենդը, գրել է իր հայտնի «Սիամանթո և Խջեզարե» պոեմը։
Տես նաև
[խմբագրել | խմբագրել կոդը]Ծանոթագրություններ
[խմբագրել | խմբագրել կոդը]- ↑ 1,0 1,1 «Մարդահամար 2011. Աղյուսակ 5.1 Բնակչությունը (քաղաքային, գյուղական) ըստ ազգության, սեռի և տարիքի» (PDF).
- ↑ 2,0 2,1 Leezenberg, Michiel (2015). «Soviet Kurdology and Kurdish Orientalism». In Kemper, Michael; Conermann, Stephan (eds.). The Heritage of Soviet Oriental Studies. London: Routledge. էջեր 89–90. ISBN 9780415838207.
- ↑ «Ալեն Սիմոնյանը հանդիպեց Ռուստամ Բաքոյանի հետ». www.parliament.am. 2021 թ․ օգոստոսի 12. Վերցված է 2022 թ․ մայիսի 25-ին.
- ↑ «ԱԺ նախագահը հանդիպեց խորհրդարանում քրդական համայնքի ներկայացուցչի հետ». www.parliament.am. 2021 թ․ օգոստոսի 12. Վերցված է 2022 թ․ մայիսի 25-ին.
- ↑ 5,0 5,1 5,2 5,3 5,4 5,5 McDowall, David (2007). A Modern History of the Kurds. London and New York: I. B. Tauris. էջեր 491–494. ISBN 9781850434160. OCLC 939584596.
- ↑ 6,0 6,1 6,2 6,3 Asatryan, Garnik; Arakelova, Victoria (2002). «THE ETHNIC MINORITIES OF ARMENIA» (PDF). Արխիվացված է օրիգինալից (PDF) 2007 թ․ հուլիսի 10-ին.
- ↑ «Гажар Аскеров КУРДСКАЯ ДИАСПОРА». Արխիվացված է օրիգինալից 2007 թ․ նոյեմբերի 20-ին. Վերցված է 2007 թ․ սեպտեմբերի 28-ին.
- ↑ Hovannisian, Richard G. (1982). The Republic of Armenia, Vol. II: From Versailles to London, 1919–1920. Berkeley: University of California Press. էջեր 80–81. ISBN 0-520-04186-0.
- ↑ «Kurds at Great Soviet Encyclopedia». Արխիվացված է օրիգինալից 2020 թ․ հուլիսի 27-ին. Վերցված է 2020 թ․ հուլիսի 27-ին.
- ↑ Encyclopedia of World Cultures - P 225. by David Levinson
- ↑ Kurdish Culture and Society: An Annotated Bibliography - P. 22. by Lokman I. Meho, Kelly L. Maglaughlin
- ↑ 12,0 12,1 12,2 Минасян, Армила (2006). «Шакро Мгои: «После распада СССР многие курды так и не получили гражданства России»». noev-kovcheg.ru (ռուսերեն). Ноев Ковчег N 13 (108) Сентябрь 2006 года. Վերցված է 2022 թ․ մայիսի 25-ին.
- ↑ Krikorian, Onnik (1998 թ․ հունիսի 8). «An Interview With Professor Garnik Asatrian». www.groong.com. Armenian News Network/Groong. Վերցված է 2022 թ․ մայիսի 25-ին.
- ↑ 14,0 14,1 Krikorian, Onnik (2004). «Being Yezidi». onnik-krikorian.com. Վերցված է 2022 թ․ մայիսի 24-ին.
- ↑ Krikorian, Onnik (2019 թ․ մարտի 10). «Yezidis in Armenia». yazidis.info. Վերցված է 2022 թ․ մայիսի 24-ին.
- ↑ Krikorian, Onnik (1998 թ․ հունիսի 9). «An Interview With Dr. Karlene Chachani». www.groong.com. Armenian News Network/Groong. Վերցված է 2022 թ․ մայիսի 25-ին.
- ↑ «DocumentView». www.arlis.am. Վերցված է 2018 թ․ հունվարի 25-ին.
- ↑ «Ethnic composition: 2001 census». Վերցված է 2018 թ․ օգոստոսի 23-ին.
- ↑ «Armenia ethnicity 2011».
- ↑ Leezenberg, Michiel (2015). «Soviet Kurdology and Kurdish Orientalism». In Kemper, Michael; Conermann, Stephan (eds.). The Heritage of Soviet Oriental Studies. London: Routledge. էջեր 87, 89–91. ISBN 9780415838207.
- ↑ Petsche, Johanna (2015). Gurdjieff and Music: The Gurdjieff/de Hartmann Piano Music and Its Esoteric. էջ 121.
Text is available under the CC BY-SA 4.0 license; additional terms may apply.
Images, videos and audio are available under their respective licenses.
