Ջոն Քենեդու հուղարկավորություն
ԱՄՆ 35-րդ նախագահ Ջոն Քենեդու հուղարկավորություն, տեղի է ունեցել 1963 թվականի նոյեմբերի 25-ին Վաշինգտոնում։ Սուրբ Մատթեոս մայր տաճարում մատուցվել է սգո պատարագ, որից հետո Քենեդուն հուղարկավորել են Արլինգտոնի ազգային գերեզմանատանը, որտեղ նրա պատվին վառվել է նրա անմար կրակ։
ԱՄՆ նախագահ Ջոն Քենեդին սպանվել է 1963 թվականի նոյեմբերի 22-ին Դալլասում, իսկ հաջորդ օրը դագաղի մեջ նրա մարմինը նախագահական ինքնաթիռով տեղափոխվել է Վաշինգտոն։ Սգո միջոցառումներին ներկա է եղել 92 երկրից ընդհանուր առմամբ 220 պատվավոր հյուր (ներառյալ 19 պետությունների ղեկավարները)։ ԽՍՀՄ-ը ներկայացրել է Անաստաս Միկոյանը։ «NBC»-ն Էխո-1 արբանյակով 23 երկրում հեռարձակել է հուղարկավորությունը։
Հուղարկավորություն
[խմբագրել | խմբագրել կոդը]
Նահանգների օրենսդիր ժողովների, վարչական շենքերի, բորսաների, դպրոցների, բանտերի, հանրային խանութների և մասնավոր տների շենքերում իջեցվել են պետական դրոշները։ Ենթադրվում է, որ երկրում առաջինն իջեցվել է Փենսիլվանիայի պողոտայի դրոշը[1]։
Հուղարկավորության երթն սկսվել է նոյեմբերի 25-ին՝ ժամը 11:30-ին: Այդ օրն ԱՄՆ Գերագույն դատարանը չեղյալ է հայտարարել Վաշինգտոնում կայանալիք իր նիստը, մայրաքաղաքում ողջ գործարար ակտիվությունը դադարել է։ Թաղման արարողությունն սկսել է Վաշինգտոնի ռազմական շրջանի հրամանատար, գեներալ-մայոր Ֆիլիպ Ուիլը։ Նրան հաջորդել են թմբկահարները, ռազմական սվինը հագած 89 մարդուց բաղկացած ծովային հետևակայինների վաշտը, շտաբների պետերը և Քենեդու երեք ռազմական համհարզները։ Այնուհետև ընթացել է դագաղով կենդանաքաշ հրետասայլը, նախագահական դրոշը, առանց հեծյալի ձին, որի ասպանդակների մեջ, ավանդույթի համաձայն, ետևառաջ տեղադրված էին հեծելազորայինի երկարաճիտ կոշիկներ[2], դագաղի տեղափոխման համար լեյտենանտ Բերդի թիմը, այրու լիմուզինը և Քենեդու այլ բարեկամների ինը մեքենաներ։ Վերջին մեքենային հետևել են Սպիտակ տան մամուլի ներկայացուցիչները։ Թափորն ավարտել է ոտավոր ոստիկանությունը։ Դագաղի երկու կողմում գտնվել են հիսուն նահանգների դրոշները։ Հրետասայլը կանգ է առել Կապիտոլիումի արևելյան մուտքի մոտ, որտեղից պետք է հյուրեր գային։ Այցելուները բարձրացել են վերելակով և հարավային կողմից մտել Ռոտոնդա։ Դագաղի պսակի վրա գրված է եղել. «Նախագահ Ջոնսոնից և ժողովրդից»[1]։ Դեպի հյուսիս գտնվող «Յունիոն Նեյշն» զբոսայգում հրետանային գումարտակը քսանմեկ հրանոթից համազարկ է արձակել, ինչին հետևել է «Փառք առաջնորդին» օրհներգը, որը յուրաքանչյուր 5 վայրկյանը մեկ ընդհատվել է հրետանային մարտկոցների համազարկով։
Սկզբում նախատեսված էր, որ Կապիտոլիումի դռներն այցելուների համար բաց կլինեն մինչև երեկոյան ժամը 9-ը, սակայն շուտով Քենեդուն հրաժեշտ տալու ցանկություն ունեցողների թիվը հասել է 200 000-ի և հետզհետե աճել[1]։ Կեսգիշերին Կապիտոլիում է մտել 100 000 մարդ[1]։ Առավոտյան ժամը 6:15-ին ոստիկանությունը հայտնել է, որ ժամը 8:30 դռները կփակեն, և 85 000 հոգուց ավելի չի կարող գալ[1]։ Իռլանդիայի Հանրապետության զառամյալ և կույր նախագահ Իմոն դե Վալերային Ռոտոնդա են ներս թողել առանց հերթի, իսկ Քենեդու ծառայած «PT-109» ռազմանավակի թիմի անդամները հրաժարվել են առաջարկված արտոնությունից[1]։ Թափորը պետք է կանգ առներ երկու վայրում՝ Սուրբ Մատթեոս մայր տաճարում և Արլինգտոնի գերեզմանատանը։ Հուղարկավորության արարողությանը, ըստ էության, մասնակցել է երեք երթ. նախ զորամասերն ու Քենեդու ընտանիքն ուղեկցել են հրետասայլի դագաղը Կապիտոլիումից մինչև Սպիտակ տուն, ապա այրին քայլել է մինչև Սուրբ Մատթեոս տաճար, և սգո պատարագից հետո թափորը հրետասայլի հետ Սահմանադրության պողոտայով, Լինքոլնի հուշարձանի կողքով, Հիշատակի կամրջով և զոհված հերոսների պողոտայով ուղևորվել է Արլինգտոնի գերեզմանատուն։ Թափորի ամբողջ երթուղու վրա՝ երկու կողմում, մարդկանց բազմություն է եղել կանգնած։
Տես նաև
[խմբագրել | խմբագրել կոդը]Ծանոթագրություններ
[խմբագրել | խմբագրել կոդը]- ↑ 1,0 1,1 1,2 1,3 1,4 1,5 Уильям Манчестер Убийство президента Кеннеди. — Москва: Прогресс, 1969.
- ↑ Բլեք Ջեք անունով սևաթույր ձին ավելի քան հազար անգամ մասնակցել է զինվորական և պետական հուղարկավորություններին, այդ թվում՝ Հերբերտ Հուվերի, Լինդոն Ջոնսոնի և Դուգլաս Մակարթուրի հուղարկավորություններին։ 1976 թվականին այն թաղվել է զինվորական պատիվներով։
Text is available under the CC BY-SA 4.0 license; additional terms may apply.
Images, videos and audio are available under their respective licenses.
