Էփսի Քեմփբել
Էփսի Քեմփբել | |
![]() | |
Կուսակցություն՝ | Citizens' Action Party? |
---|---|
Կրթություն՝ | Կոստա Ռիկայի համալսարան |
Մասնագիտություն՝ | քաղաքական գործիչ և տնտեսագետ |
Ծննդյան օր | հուլիսի 4, 1963 (61 տարեկան) |
Ծննդավայր | Սան Խոսե, Կոստա Ռիկա |
Քաղաքացիություն | ![]() |
Էփսի Քեմփբել Բար (իսպ.՝ Epsy Campbell Barr, հուլիսի 4, 1963, Սան Խոսե, Կոստա Ռիկա), կոստառիկացի քաղաքական գործիչ և տնտեսագետ։ 2018 թվականի մայիսի 8-ից Կոստա Ռիկայի առաջին փոխնախագահն է՝ նախագահ Կառլոս Կեսադա Ալվարադոյի օրոք[1]։ Աֆրիկյան ծագմամբ առաջին կինն է, որը դարձել է փոխնախագահ Կոստա Ռիկայում[2], և երկրորդը (Վիոլա Բերնհեմից հետո)՝ Ամերիկայում։
Մինչև 2018 թվականի դեկտեմբերի 11-ը նաև արտաքին գործերի նախարար էր։ Նա, լինելով քաղաքացիական գործողությունների կուսակցության հիմնադիրներից մեկը, նախկինում՝ 2010 և 2014 թվականներին, առաջադրվել էր նախագահի պաշտոնում և ընտրվել Օրենսդիր ժողովի պատգամավոր[3]։
Կենսագրություն
[խմբագրել | խմբագրել կոդը]Վաղ տարիներ և կրթություն
[խմբագրել | խմբագրել կոդը]Էփսի Քեմփբել Բարը ծնվել է 1963 թվականին Սան Խոսեում, իսկ նրա ծնողները՝ Շիրլի Բար Էյրդը և Լուիս Քեմփբել Փաթերսոնը, ապրել են Սան Ֆրանցիսկո դե Ռիոսում։ Նա հինգ դուստրերից և երկու որդիներից բաղկացած ընտանիքի չորրորդ զավակն է։ Նրա քույրերի շրջանում ճանաչում են ստացել նաև երգչուհի Սաշա Քեմփբել Բարը և բանաստեղծուհի Շիրլի Քեմփբել Բարը։
Էփսի Քեմփբելը կրում է հայրական տատի անունը, որը մանկության տարիներին Ճամայկայից Կոստա Ռիկա է ներգաղթել։ Նրա աֆրոկոստառիկացի պապերը 20-րդ դարի սկզբին մուտք են գործել երկիր և աշխատել երկրի առաջին երկաթուղիների կառուցման վրա։
Էփսին ամուսնացել է երիտասարդ տարիքում և մայրացել, երբ նոր է սկսել սովորել համալսարանում։ Նա ունի երկու դուստր՝ Նարդան և Տանիշան։
Նա սովորել է Լաս Գրավիլիասի տարրական դպրոցում, Ռիկարդո Հիմենես Օրիմունոյի անվան դպրոցում, Կոստա Ռիկայի ազատ վարժարանում և աղջիկների բարձրագույն քոլեջում։ 1976-1983 թվականներին սովորել է նվագել ֆլեյտա և սաքսոֆոն երիտասարդական սիմֆոնիկ նվագախմբի մոտ։
Էփսի Քեմփբելի բարձրագույն կրթությունն սկսվել է Կոստա Ռիկայի համալսարանում, այնուհետև շարունակել Լիմոն նահանգի մարզային համալսարանում, որտեղ նա միաժամանակ սովորել և աշխատել է։ Նա տասը տարի ապրել է Կարիբյան ավազանում, այնուհետև վերադարձել Սան Խոսե, որտեղ 1998 թվականին ավարտել է Կոստա Ռիկայի լատինական համալսարանի տնտեսագիտական ֆակուլտետը։ 2008 թվականին ստացել է մագիստրոսի կոչում իսպանական մշակութային և սոցիալական գիտությունների հիմնադրամից։
Լինելով աֆրիկյան ծագում ունեցող կանանց և անձանց իրավունքների պաշտպանության հետազոտող և ակտիվիստ՝ նա քաղաքականության է անցել։
![](https://upload.wikimedia.org/wikipedia/commons/thumb/7/7c/Epsy_Campbell_PAC_%28cropped%29.jpg/160px-Epsy_Campbell_PAC_%28cropped%29.jpg)
Կազմակերպություններ
[խմբագրել | խմբագրել կոդը]Էփսի Քեմփբելը գլխավորել է այնպիսի կազմակերպություններ, ինչպիսիք են Աֆրիկյան ծագում ունեցող կանանց գործերի կենտրոնը, Լատինական Ամերիկայում և Կարիբյան ավազանում գտնվող աֆրիկյան ծագում ունեցող առաջնորդների դաշինքը, Հյուսիսային և Հարավային Ամերիկայի Սև խորհրդարանը։
Մասնակցել է մի շարք կոնֆերանսների և հանդիպումների ամբողջ աշխարհում, այդ թվում՝ Պեկինում կանանց կարգավիճակի վերաբերյալ 4-րդ համաշխարհային համաժողովին, Դուրբանում (Հարավային Աֆրիկա) ռասիզմի դեմ պայքարի 3-րդ համաշխարհային համաժողովին, Ռիո դե Ժանեյրոյում (Բրազիլիա) Էկո-92 շրջակա միջավայրի համաշխարհային համաժողովին և Լատինական Ամերիկայի ու Կարիբյան ավազանի սևամորթ կանանց առաջին հանդիպմանը, որը տեղի է ունեցել Սանտո Դոմինգոյում (Դոմինիկյան Հանրապետություն)։ Նա աֆրոկարիբացի և աֆրոլատինոամերիկացի կանանց ցանցի Կենտրոնական Ամերիկայի ինտեգրման համաժողովի համակարգողն էր, ինչպես նաև Սան Խոսեում (Կոստա Ռիկա) աֆրոկարիբացի և աֆրոլատինոամերիկացի կանանց երկրորդ հանդիպման կազմակերպիչը։
Քեմփբելը նաև Վաշինգտոնում տեղակայված «Միջամերիկյան երկխոսություն» ինստիտուտի անդամ է[4]։ Նա գրել է գրքեր և հոդվածներ այնպիսի թեմաներով, ինչպիսիք են ժողովրդավարությունը, հավասարությունը, սոցիալական զարգացումը, ներառականությունը, սեքսիզմը, ռասիզմը, կանանց և աֆրիկյան ծագմամբ մարդկանց քաղաքական և տնտեսական մասնակցությունը։
Քաղաքական գործունեություն
[խմբագրել | խմբագրել կոդը]![](https://upload.wikimedia.org/wikipedia/commons/thumb/e/e1/Epsy_Campbell_Barr_%26_Yukiya_Amano_%2805010406%29_%2831153553127%29.jpg/220px-Epsy_Campbell_Barr_%26_Yukiya_Amano_%2805010406%29_%2831153553127%29.jpg)
Քեմփբել Բարը քաղաքացիական գործողությունների ձախակենտրոն (սոցիալ-դեմոկրատական և քրիստոնեա-սոցիալիստական) կուսակցության ստեղծողներից էր, որը գլխավորել է 2005 թվականի փետրվարից մինչև 2009 թվականի փետրվարը։ 2002-2006 թվականներին նա ազգային խորհրդարանում կուսակցության պատգամավոր էր։ 2003-2005 թվականներին գլխավորել է նրա խորհրդարանական խմբակցությունը։ 2006 թվականին Էփսին առաջին անգամ դարձել է փոխնախագահի թեկնածու։
Քեմփբելը, ունենալով պատգամավորի և փոխնախագահի պաշտոնի թեկնածուի անցյալ, իր կուսակցությունից պատրաստվել է առաջադրվել 2010 թվականի և 2014 թվականի նախագահական ընտրություններում՝ երկրում կոռուպցիայի դեմ պայքարի և հաշվետվողականության կարգախոսներով։ 2013 թվականի փետրվարի դրությամբ նա ընդդիմության ամենահանրաճանաչ թեկնածուն էր, սակայն ՔՊԿ-ից 2014 թվականին առաջադրման համար պայքարել է ևս երեք թեկնածու՝ Խուան Կառլոս Մենդոսան, Ռոնալդ Սոլիս Բոլանոսը և Լուիս Գիլյերմո Սոլիսը, և արդյունքում Քեմփբելը դուրս է մնացել մրցապայքարից հօգուտ վերջինիս[5]։
Քեմփբելն իր հերթին պատգամավոր է դարձել երկրի մայրաքաղաքից[6]։ Նախագահ ընտրված Սոլիսը նրան արաջադրել է օրենսդիր ժողովի նախագահի պաշտոնի թեկնածուների թվում[7], չնայած ի վերջո պաշտոնը զբաղեցրել է Հենրի Մորա Խիմենեսը[8]։
Ի սկզբանե Քեմփբելը նաև մտադիր էր մասնակցել 2018 թվականի նախագահական ընտրություններին, սակայն 2017 թվականի մարտի 27-ին դուրս է եկել մրցարշավից։ Արդյունքում նրանք Մարվին Ռոդրիգեսի հետ ընտրվել են նախագահի թեկնածու Կառլոս Կեսադա Ալվարադոյի կողմից՝ որպես փոխնախագահի թեկնածու։ Ալվարադո Կեսադան, ի վերջո, դուրս է եկել երկրորդ փուլ և հաղթել, իսկ Քեմփբելը դարձել է առաջին փոխնախագահը։
Ծանոթագրություններ
[խմբագրել | խմբագրել կոդը]- ↑ Q Costa Rica News. «Epsy Campbell, The First Afrodescendant Vice President Of Cosa Rica». Վերցված է 2018 թ․ ապրիլի 2-ին.
- ↑ «Costa Rica Just Elected A Black Female Vice President, The First In All Of the Americas».
- ↑ Ruiz Ramón, Gerardo (2014 թ․ մարտի 14). «Epsy Campbell no rechazaría oferta de candidatura para presidir el Congreso». La Nacion (իսպաներեն). Արխիվացված է օրիգինալից 2014 թ․ մարտի 17-ին. Վերցված է 2014 թ․ մարտի 18-ին.
- ↑ «Inter-American Dialogue | Experts». www.thedialogue.org. Արխիվացված է օրիգինալից 2020 թ․ փետրվարի 2-ին. Վերցված է 2017 թ․ ապրիլի 11-ին.
- ↑ Font, Alberto. «Presidential Race Grows by One». The Tico Times. The Tico Times. Արխիվացված է օրիգինալից 2013 թ․ փետրվարի 15-ին. Վերցված է 2013 թ․ փետրվարի 15-ին.
- ↑ Partido Accion Ciudadano. «List of Candidates». Արխիվացված է օրիգինալից 2014 թ․ հունվարի 16-ին. Վերցված է 2014 թ․ հունվարի 13-ին.
- ↑ Ruiz Ramón, Gerardo (2014 թ․ մարտի 14). «Epsy Campbell no rechazaría oferta de candidatura para presidir el Congreso». La Nacion. Արխիվացված է օրիգինալից 2014 թ․ մարտի 17-ին. Վերցված է 2014 թ․ մարտի 18-ին.
- ↑ Sequeira, Aarón (2014 թ․ ապրիլի 24). «Dos opositores dan pelea al PAC por la presidencia del Congreso» (իսպաներեն). San Jose. Վերցված է 2014 թ․ ապրիլի 24-ին.
Արտաքին հղումներ
[խմբագրել | խմբագրել կոդը]![]() | Վիքիպահեստն ունի նյութեր, որոնք վերաբերում են «Էփսի Քեմփբել» հոդվածին։ |
Text is available under the CC BY-SA 4.0 license; additional terms may apply.
Images, videos and audio are available under their respective licenses.