Li Hongzhi
Si Li Hongzhi (namundag, Mayo 13, 1951) (Chinese: 李洪志; pinyin: Lǐ Hóngzhì) iyo an kagtugdas asin lider espiritwal kan Falun Gong o "Falun Dafa", sarong sistema nin pagpapabagsik sa hawak-isip paagi kan inaapod na tradisyon qigong. Si Li Hongzhi nagpoon pagtukdo kan disiplina nin Falun Gong sa publiko kan 13 Mayo 1992 sa Changchun, dangan naghiwas an paglektura niya asin an pag'ehersisyo susog sa prinsipyo kan Falun gong sa enterong Tsina. Kan 1995 si Li dinara an paglektura kan Falun Gong sa luwas nin Tsina. Kan 1998 si Li pinagmarhay na mag'erok permanente bilang residente sa Estados Unidos. An hiron nin Falun Gong naglakop na gayo asin nagin popular na marhay sa mga empleyado nin gobyerno asin sa mga pag'iribang qigong; alagad, an gobyerno Tsino nagpoon kan taon 1999 na ipiton an kaayonan na ini sa tuyong rumpagon an organisasyon sa pagtubod na ini sobra nang nagin mapangyare asin huli daa ta sarong "kultong heretiko" na dapat paraon. Dakulon an nag'ayon sa hiron na ini ta nagtutubod sinda nabubulong asin naoomayan sinda sa mga helang paagi sana kan pag'ehersisyo asin pagpraktis kan mga tinutunkosan na mga katokdoan igdi. Mala ta kan taon 1999, sabi ni Li igwa nang kaapil an kaayonan nag'aabot 100 na milyon katawo. [1][2]
Kaamayi kan buhay
[baguhon | baguhon an source]Si Li namundag sa Jilin, Tsina sa magurang niyang sinda Li Dan asin Lu Shjuzhen.[3] Kun kasuarin siya namundag, sinasabi kan gobyerno Tsino na siya namundag kan Hulyo 2, 1952 alagad tuyong pinaatras sa Mayo 13, 1951 mansana daa ni Li ngane makasabay sa pagkamundag ni Shakyamuni Buddha, an kagtogdas kan Budhismo.[4]
Si Li sinasabing tagasunod kan praktis na qigong (literalmente, disiplina sa paghangos) na iyo an mga ehersisyong nagpapagantad sa salud paagi nin pagpagpakusog kan bulos kan qi (pwersa nin buhay; hinangos nagtataong buhay) sa gabos na kabtang kan hawak. Kan 1992, si Li sa hustong pagsunod kan qigong asin sa hararom na pag'adal sa lindong kan mga batikanong maestro sa Budhismo asin Daoismo, nagpasigeng magbilog kan sadiri niyang bersyon na sinararo an mga siring na disiplina asin saiyang ipinahayag sa saiyang sinurat na libro, an Zhuan falun (1994' pinalis sa Ingles, "The Revolving Dharma Wheel). An libro niya napalis na sa siyam na lenggwahe asin may sobra nang 500 milyon na myembro an tinogdas niyang hiron na Falun Gong.[5]
Mga pahayag dapit sa sadiri
[baguhon | baguhon an source]Si Li, na nagin nang Amerikanong namamanwaan kan 1997 asin poon pa kan 1998, nakaestar sa Nweba York, Nweba York, may mga naoonambit na mga bagay dapit sa sadiri niya. Sabi niya an mga aliens yaon sana naglilibot-libot sa satong mundo. Siya daa nakakalagbas sa mga lanob asin pwedeng magpawara na garo tagolipdan asin dai na mahiling kan iba. Sabi pa niya gikan siya sa mas halangkaw na lebel asin tuyong matabang sa katawhan na nalulubog na sa makuring karara'tan. An tinotokdo niyang hiron tinata'wan doon an tolong prinsipyo sa buhay: Katotohanan, Pagkamaray-boot sa kapwa, asin Hanot-ginhawa o pagtitios.[6]
Toltolan
[baguhon | baguhon an source]- ↑ https://www.britannica.com/biography/Li-Hongzhi Kinua 19-9-16
- ↑ http://fofg.org/what-is-falun-gong/?utm_source=search&utm_medium=cpc&utm_campaign=falungong&gclid=CICrjcaIm88CFYkIvAodH1oCJw Kinua 10-9-16
- ↑ http://news.bbc.co.uk/2/hi/asia-pacific/1223317.stm Kinua 19-9-16
- ↑ http://news.bbc.co.uk/2/hi/asia-pacific/1223317.stm Kinua 19-916
- ↑ https://www.britannica.com/biography/Li-Hongzhi Kinua 19-9-16t
- ↑ https://www.britannica.com/biography/Li-Hongzhi Kinua 19-9-16
Text is available under the CC BY-SA 4.0 license; additional terms may apply.
Images, videos and audio are available under their respective licenses.