Luis Fernández López
Luis Fernández López![]() | |
---|---|
Vida | |
Nacimientu | Uviéu[1], 29 d'abril de 1900[2] |
Nacionalidá |
![]() |
Muerte | XIII Distritu de París[1], 25 d'ochobre de 1973[2] (73 años) |
Estudios | |
Estudios |
Escuela de la Lonja (es) ![]() |
Llingües falaes |
castellanu francés[4] |
Oficiu | pintor |
Llugares de trabayu | París |
![]() |
Luis Fernández López (29 d'abril de 1900, Uviéu – 25 d'ochobre de 1973, XIII Distritu de París) foi un pintor asturianu.
Biografía
[editar | editar la fonte]Fíu del logroñés Enrique Fernández, catedráticu de la Universidá d'Uviéu. Güérfanu primero de madre y depués de padre, en 1909 él y los sos hermanos treslládense a vivir a Madrid col so güelu maternu, que morrerá poco depués, separtándose los hermanos y diendo él a vivir a Barcelona col so tíu maternu. Ésti va facelu abandonar los estudios, entrando como aprendiz nuna xoyería de les Rambles. En 1912 matricúlase nel turnu nocturnu de la Escuela de Belles Artes de Barcelona, la Llotja, mientres sigue desempeñando diferentes oficios pa pagase los estudios.
Depués de finalizar los sos estudios treslládase en 1924 a París, onde entra en contautu col movimientu artísticu de Montparnasse mientres se gana la vida trabayando nuna imprenta. Ellí conoz a artistes como Brancusi, Braque, Ozenfant... Tamién entra en contautu col escultor Julio González Pellicer, tamién español. Nésti ambiente entrará en contautu socesivamente col Purismu, deriváu del Cubismu, y col Neoplasticismu, a los que siguirá más sero'l Surrealismu. A partir de 1933 dedícase esclusivamente a la pintura. Entama una rellación d'amistá con Picasso, col que collabora en diferentes proyeutos y que tendrá una gran influencia nuna etapa de la so obra.
La obra de Fernández dirá evolucionando de forma progresiva hacia un mundu personal y herméticu. El so trabayu vien marcáu por una manera de trabayar lenta y analítica, na que s'analiza non sólo la forma, sinón tamién l'espíritu del oxetu y nel que cada pincelada alcuéntrase fondamente meditada. La so escasa producción y la mala suerte colos marchantes fadrán qu'a lo llargo de tola so carrera viva al marxe del éxitu económicu que tienen otros artistes de la so xeneración.
Nos sos últimos años la so obra ye recuperada pola crítica, realizándose en 1972 una esposición antolóxica entamada pol Centru Nacional d'Arte Contemporaneu francés en París. Por más qu'esta muestra nun llegará a vese n'España, circunstancia que-y resulta especialmente dolorosa al pintor. Morrió'l 25 d'ochobre de 1973 en París, siendo enterráu, por deséu propiu, en Cantenac, llocalidá próxima a Burdeos, xunto a Esther, la so primer muyer.
La mayor parte de la so obra consérvase na Coleición d'Arte de Telefónica y nel Muséu de Belles Artes d'Asturies.
Bibliografía
[editar | editar la fonte]- Louis Fernández, catalogu de la esposición del Centre National d'Art Contemporain (CNAC), Paris, 28 d'abril - 6 de mayu de 1972.
- Claude Esteban, Luis Fernández et la réalité intérieure, in C. Esteban, Traces, figures, traversées : essais sur la peinture contemporaine, Galilée, 1985.
- Luis Fernández, catalogu de la esposición de la Fundación Arte y Teunoloxía, Palacete del Embarcadero, Santander, setiembre de1993.
Referencies
[editar | editar la fonte]- ↑ 1,0 1,1 «certificado de defunción» páxs. 25. Consultáu'l 26 abril 2024.
- ↑ 2,0 2,1 Biblioteca Nacional de Francia. «autoridaes BNF» (francés). Consultáu'l 10 ochobre 2015.
- ↑ Identificador Design and Artists Copyright Society (anterior): ceb62216-ae24-e111-9c2b-000c29604b72. Data de consulta: 4 xunetu 2020. Apaez como: Spanish.
- ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
Enllaces esternos
[editar | editar la fonte]Text is available under the CC BY-SA 4.0 license; additional terms may apply.
Images, videos and audio are available under their respective licenses.