Grootouerdag, of Oupa- en Oumadag, is 'n dag waarop kinders hulle grootouers eer. Jongmense word aangemoedig om hul grootouers te respekteer en as beskermers van ouer persone se regte en welstand op te tree. In Suid-Afrika word die dag jaarliks op die eerste Sondag van Oktober gevier, kort na die Internasionale Dag vir Ouer Persone, wat op 1 Oktober gedenk word.^[1]

Idees vir kinders om grootouerdag vir ouma en/of oupa spesiaal te maak:

• Skryf 'n briefie om te sê dat hulle die beste ouma/oupa ter wêreld is;
• Neem 'n foto van jou en jou ouma/oupa of teken 'n prent;
• Pluk vir hulle blomme;
• Maak hulle tuin netjies en plant 'n paar lenteblomme.

As jy nie meer grootouers het nie:

• Reël 'n teeparty vir senior burgers;
• Hou 'n intergenerasie-pretdag;
• Besoek 'n ouetehuis en neem 'n grootouer aan;
• Samel geld in ter ondersteuning van ouer mense.

Die gebed van ’n bejaarde (digter onbekend):

As ek oud word O Heer, maak my minsaam en lief As alles te swaar word en so vol ongerief As dit skyn of mense nie meer omgee vir my As ek treurig en alleen voel, wil U tog by my bly. As my liggaamskragte verswak elke dag As alles te swaar word en so vol ongerief As dit skyn dat mense nie omgee vir my As ek treurig en alleen voel, wil U tog by my wees. As ek my kwel en bekommer oor elke klein saak As alles my steur en alles my raak As ek dan vir ander tot las voel, o Heer As ek dan tot U kom, troos my tog teer. As die jare verbygaan so een vir een As ek stil in my kamer soms sit en ween As ek my hart voor U blootlê, o Heer As ek so tot U kom, help my tog weer. As ek miskien binnekort die doodsdal deurgaan As ek eersdaags miskien voor U troon sal moet staan As ek dan voor U kniel met bewing en vrees Laat die bloed van Jesus my beskerming wees.

• Prediker 12 in die Bybel.