Gemini 4
Gemini 4 (amptelik Gemini IV)[1] was die tweede bemande ruimtevlug van NASA se Gemini-program gedurende 1965. Dit was die tiende bemande Amerikaanse ruimtevlug (insluitend twee vlugte van die X-15); dit is almal vlugte hoër as 100 km d.w.s. hoër as die Kármán-lyn.
Die ruimtevaarders James McDivitt en Ed White het in vier dae 66 keer om die aarde gewentel. Dit is ook die naaste wat 'n Amerikaanse ruimtevlug aan die Russiese Vostok 5 se vyf dae in die ruimte kom. Die hoogtepunt van die sending was die eerste ruimtewandeling deur 'n Amerikaner. Ed White het vir ongeveer twintig minute buite die tuig gesweef, alhoewel hy steeds met 'n lewenskoord aan die tuig verbind was.
Die vlug was ook die eerste waar daar gepoog is om met 'n ander ruimtetuig te dok, McDivitt het probeer om sy tuig tot naby die Titan II GLV (tweede stadium wat dit die ruimte in gestuur het) te bring maar was nie suksesvol nie.
Dit was ook die eerste Amerikaanse vlug waar daar wetenskaplike eksperimente in die ruimte gedoen is, insluitend die gebruik van 'n sekstant om navigasie met behulp van die sterre se posisie te doen, ter voorbereiding vir die Apollo-program.
Bemanning
[wysig | wysig bron]| Posisie | Ruimteman | |
|---|---|---|
| Bevelvoerder | James McDivitt Eerste ruimtevlug | |
| Vlieënier | Ed White Enigste ruimtevlug | |
Verwysings
[wysig | wysig bron]- ↑ Hacker, Barton C.; Grimwood, James M. (September 1974). "Chapter 11 Pillars of Confidence". On the Shoulders of Titans: A History of Project Gemini. NASA History Series. Vol. SP-4203. NASA. p. 239. Geargiveer vanaf die oorspronklike op 13 Januarie 2010. Besoek op 13 Junie 2022. Vanaf Gemini IV, het NASA Romeinse syfers begin gebruik om die Gemini sendingname aan te dui.
Text is available under the CC BY-SA 4.0 license; additional terms may apply.
Images, videos and audio are available under their respective licenses.
