國際標準書號（粵拼：gwok3 zai3 biu1 zeon2 syu1 hou6） （ISBN，英文全寫 international standard book number）係國際通用嘅出版物（唔計期刊）號碼。每一個 ISBN 衹會對應一本出版物。ISBN 嘅前身係「標準書號」（SBN）。好多網站都提供用 ISBN 來搵書嘅功能。

國際標準書號有 13 位同 10 位兩種，分別叫做 ISBN-13 同 ISBN-10。2007年之後嘅 ISBN 都係 13 位，而且頭三位一定係 978 或者 979。ISBN 結構上分成幾個小節，一般畀人睇嘅 ISBN，小節之都間用連接號或者空格隔開。以 ISBN-13 為例，除咗第一節固定嘅 978 或者 979 之外，接落來三節分別係國家語言或區位號碼、出版社號碼、出版物號碼，每節三位。最後一位係校驗碼。校驗碼係用來查錯。如果唔小心將一個有效嘅 ISBN 號碼其中一位打錯咗，得到嘅就唔會係一個有效嘅 ISBN 號碼。

以 ISBN-13 為例，校驗碼要令到個號碼符合下面條件，由左邊數起排喺雙數位置（即係第二、第四、第六個之類，唔使理小節之間嘅間隔）嘅數字全部加埋，再乘以3， 然後再將全部單數位置嘅數加上去，最後得到嘅數個位應該係0， 如果唔係就講明個 ISBN 號有問題^[1]。

ISBN-13 其實即係 EAN 條碼，所以 978 其實係一種國家編號，但係佢代表嘅係一個唔存在嘅國家，叫 ｢書國｣（Bookland）。

雖然 ISBN 結構上有分小節，但係條碼入面嘅只係純數字；喺圖書館用嘅機讀格式，記錄喺 020 號欄位^[2]嘅亦都只係純數字。

• 國際標準期刊號
• 喺爾個維基用 ISBN 去搵網上嘅書

• 喺維基數據搵唔到網站資料；你可以揀人手打，或者擺個官方網址入維基數據。